Sayyor qabullar – xalq va davlat oʻrtasidagi muloqotning eng samarali koʻprigi

Amudaryo tumani Bobur nomli ovul fuqarolar yigʻini binosida Qoraqalpogʻiston Respublikasi Vazirlar Kengashi Raisining turizm, madaniyat, madaniy meros va ommaviy kommunikatsiyalar masalalari boʻyicha oʻrinbosari Rasul Zarekeyev ishtirokida navbatdagi sayyor qabul boʻlib oʻtdi. Tadbirda tuman hokimining oʻrinbosarlari, idora va tashkilotlar rahbarlari, fuqarolar hamda ommaviy axborot vositalari vakillari qatnashdilar.

Sayyor qabul jarayonida aholining dolzarb masalalari eshitilib, ularning yechimlari boʻyicha mutasaddi rahbarlarga aniq topshiriqlar berildi. Aholi vakillaridan uy-joyini shiferlash, oqar suv yetkazib berish, elektr transformatorini almashtirish, tibbiy yordam bilan taʼminlash kabi masalalarda murojaatlar qabul qilindi. Har bir murojaatchining masalasi individual tartibda oʻrganilib, ijobiy hal qilish boʻyicha masʼullarga aniq muddat belgilangan vazifalar yuklandi.

Xususan, ovulda yashovchi Matyakub Qoʻchqarov elektr transformator eskirganligi sababli uni yangisiga almashtirishda amaliy yordam berish haqida, Ikrom Atajanov davolanishi uchun moddiy yordam ajratib berish masalasida, Shukurulla Tajiyev kelinini davolatishi uchun moddiy yordam ajratib berish boʻyicha, Oʻrolbay Rahimov koʻchalarga qoʻshimcha elektr simlari tortish hamda “Hamroz-2” koʻchasi yoʻllarni chiqarib berish masalasida amaliy yordam soʻrab murojaat qildi. Davlatboy Abdullayev esa tomorqa yerlarini sugʻorish uchun oqar suv yetkazib berishda amaliy yordam soʻrab murojaat qildi. Murojaatlarning barchasi tegishli tartibda oʻrganilib, ularga ijobiy yechim topish maqsadida tegishli mutasaddilarga yoʻnaltirildi.

Bugun sayyor qabullar oddiy uchrashuv emas, balki davlatning xalq bilan yuzma-yuz muloqot qilishining eng samarali mexanizmlaridan biriga aylangan. Aholi oʻz dardini, muammosini mahallaning oʻzida, rahbarlarga bevosita yetkazish imkoniga ega. Bu esa masalalarni joyida hal etish, turli byurokratik toʻsiqlarni kamaytirish, fuqarolarning davlat idoralariga boʻlgan ishonchini mustahkamlashga xizmat qilmoqda.

Qoraqalpogʻiston Respublikasi Vazirlar Kengashi Raisi oʻrinbosari Rasul Zarekeyevning Bobur ovulidagi sayyor qabuli ham aynan shu maqsad – xalqning murojaatini eshitish, hayotiy muammolariga yechim topish va joylarda aholining yashash sharoitlarini yaxshilashga qaratilgani bilan ahamiyatli boʻldi. Qabul davomida koʻtarilgan har bir masala boʻyicha masʼullar zimmasiga aniq topshiriqlar berilgani esa sayyor qabullarning amaliy ishlar maydoni ekanidan dalolat beradi.

Amudaryo tumanida oʻtkazilayotgan har bir sayyor qabul mahallalardagi hayot sifatini yaxshilash, aholi muammolarini oʻz vaqtida koʻrib chiqish va davlat xizmatlarining aholiga yanada yaqin boʻlishini taʼminlash yoʻlida muhim vositaga aylanmoqda.

Charos Arslonova, tuman hokimligining Axborot xizmati rahbari.