Butunjahon silga qarshi kurashish kuni munosabati bilan "Sogʻlom ovqatlanish" yarmarkasi tashkil qilindi

Insoniyat tsivilizatsiyasi tarixida salomatlik eng oliy qadriyat boʻlib kelgan va bugungi shiddatli davrda ham bu haqiqat oʻz dolzarbligini yoʻqotgani yoʻq. Ayniqsa, yuqumli kasalliklarga qarshi kurashish, aholi orasida tibbiy madaniyatni yuksaltirish har bir davlatning strategik maqsadiga aylangan. Shu maʼnoda, har yili dunyo miqyosida keng nishonlanadigan 24-mart – Butunjahon silga qarshi kurashish kuni nafaqat soha mutaxassislari, balki keng jamoatchilik uchun ham muhim ogohlik qoʻngʻirogʻi boʻlib xizmat qilmoqda.

Ushbu sana munosabati bilan yurtimizning barcha hududlarida boʻlgani kabi, Amudaryo tumanida ham aholi salomatligini muhofaza qilish, kasallikning oldini olish va sogʻlom turmush tarzini targʻib qilishga qaratilgan keng koʻlamli tadbirlar oʻtkazildi. Ana shunday tadbirlardan biri Mangʻit dehqon bozorida Qoraqalpogʻiston Respublikasi Salomatlik va strategik rivojlanish institutining Amudaryo tumani boʻlimi va koʻp tarmoqli markaziy poliklinika shifokorlari tomonidan tashkil qilindi.

Aholi gavjum boʻlgan Mangʻit dehqon bozori hududida "Sogʻlom ovqatlanish" yarmarkasining tashkil etilishi bejiz emas, zero bozor — aholi bilan bevosita muloqot qilish, ularga tibbiy maslahatlar berish va kasallikning oldini olish choralarini tushuntirish uchun eng qulay maydondir.

Tadbirda ishtirok etgan malakali mutaxassislar — valeolog Tamara Saidova, ftiziatrlar Gulora Abdullayeva hamda Muborak Allamurodovalar oʻzlarining koʻp yillik tajribalari va tibbiy bilimlari bilan fuqarolarga yaqindan koʻmak berdilar.

Ftiziatr Gulora Abdullayeva yigʻilganlarga sil kasalligining kelib chiqish sabablari, uning belgilari va patologik jarayonlari haqida batafsil maʼlumot berib oʻtdi. Shifokorning taʼkidlashicha, sil kasalligi — bu faqatgina tibbiy emas, balki ijtimoiy muammo hamdir. Uning belgilarini erta aniqlash, davolash jarayonini oʻz vaqtida boshlash nafaqat bemorning sogʻayishini taʼminlaydi, balki atrofdagilarning ham xavfsizligini kafolatlaydi. Shu bois, yoʻtalning uzoq davom etishi, holsizlik, vazn yoʻqotish kabi alomatlarga befarq boʻlmaslik zarurligi alohida qayd etildi.

Shu bilan birga, kasallikka qarshi kurashishda faqatgina tibbiy muolajalar emas, balki inson organizmining ichki himoya kuchlari — immunitet tizimi ham muhim rol oʻynaydi. Bu borada valeolog Tamara Saidova oʻz tavsiyalari bilan oʻrtoqlashdi. Uning soʻzlariga koʻra, sil kasalligidan saqlanishning eng samarali yoʻli — bu sogʻlom turmush tarziga qatʼiy rioya qilishdir. Sogʻlom ovqatlanish tamoyillari, jismoniy faollikni oshirish, shaxsiy gigiyena qoidalariga amal qilish va ruhiy xotirjamlikni saqlash inson organizmini turli infektsiyalarga qarshi chidamli qiladi.

Shuningdek, mutaxassis zararli odatlar, xususan, kashandalik va boshqa illatlar oʻpka tizimiga qanchalik salbiy taʼsir koʻrsatishi, bu esa sil bakteriyalari uchun qulay muhit yaratishini alohida taʼkidlab oʻtdi. "Sogʻlom ovqatlanish" yarmarkasi doirasida namoyish etilgan mahsulotlar va taqdim etilgan maʼlumotlar aholining kundalik ratsionini toʻgʻri shakllantirish boʻyicha amaliy qoʻllanma vazifasini oʻtadi.

Tibbiyotning asosiy tamoyillaridan biri — kasallikni davolashdan koʻra, uning oldini olishga harakat qilishdir. Ftiziatr Muborak Allamurodova aynan shu jihatga toʻxtalar ekan, profilaktika choralarining ahamiyatini yuqori baholadi. Ayniqsa, ehtiyotdan emlash tadbirlari, rejali tibbiy koʻriklardan oʻtish va aholining flyuorografiya tekshiruvlariga faol jalb etilishi xalqimiz salomatligini asrashning kaliti ekanligini taʼkidladi. Shifokorning fikricha, har bir inson oʻz sogʻligʻiga masʼuliyat bilan yondashsa, davlatimiz tomonidan yaratilgan tibbiy imkoniyatlardan unumli foydalansa, nafaqat sil kasalligini jilovlash, balki xalqimizning oʻrtacha umr koʻrish darajasini sezilarli darajada oshirishga erishish mumkin.

Bu kabi tadbirlar aholining tibbiy savodxonligini oshirish bilan bir qatorda, ularda oʻz salomatligiga boʻlgan eʼtiborni kuchaytirishga ham xizmat qiladi.