NURONIYLAR MASLAHATLARI BILAN – KAMBAGʻALLIKDAN FAROVONLIK SARI

Inson qadri ulugʻlangan yurtda har bir fuqaroning farovon yashashi, ijtimoiy himoyaga muhtoj qatlamlarning qoʻllab-quvvatlanishi davlat siyosatining ustuvor yoʻnalishiga aylanadi. Xalqimiz azaldan mahalla oqsoqollarining pand-nasihatlariga, hayotiy tajribasiga tayanib ish koʻrgan, ogʻir damlarda keksalarning duosi va yoʻl-yoʻrigʻi bilan mushkulini oson qilgan. Bugungi kunda bu anʼana yangicha mazmun kasb etib, tizimli islohotlarning ajralmas qismiga aylandi. Davlatimiz rahbarining 2024-yil 25-noyabrdagi “Kambagʻallikdan farovonlik sari” dasturini amalga oshirishga faol nuroniylarni jalb etish chora-tadbirlari toʻgʻrisida”gi qarori ana shunday ezgu maqsadlarga xizmat qilayotgan muhim hujjat boʻldi.

Mazkur qaror asosida 2025-yilning yanvar oyidan boshlab mamlakatimizning har bir mahallasida uch nafardan boy hayotiy tajribaga ega boʻlgan faol nuroniylarning har biriga beshtadan kambagʻal oila biriktirildi. Bu nafaqat moddiy yordam, balki ijtimoiy-maʼnaviy muhitni sogʻlomlashtirish, muhtoj oilalarga ruhiy dalda berish va ularni mehnat orqali yuqori natijalarga yoʻnaltirish demakdir. Ushbu xayrli tashabbus Amudaryo tumanida ham keng quloch yoyib, koʻplab xonadonlarga quvonch va qut-baraka olib kirmoqda.

Tumanning Mangʻit shahridagi Durunki mahallasida istiqomat qiluvchi Muxtor Haytakov xonadoni bir paytlar kambagʻal oilalar reyestrida edi. Bu oilaning farovonlik sari tashlagan ilk qadamlarida nuroniy onaxon Omongul Qayupovaning xizmatlari beqiyos. Masʼul sifatida biriktirilgan onaxon avvalo oilaning ichki imkoniyatlarini oʻrgandi, ularning dardu tashvishlariga sherik boʻldi. Koʻrsatilgan amaliy koʻmak natijasida oila boshligʻi va uning turmush oʻrtogʻi doimiy ish oʻrniga ega boʻldi. Shuningdek, “Mahalla yettiligi” bilan hamkorlikda xonadonda parrandachilik faoliyati yoʻlga qoʻyildi. Bugungi kunda ushbu oila nafaqat kambagʻallik reyestridan chiqarildi, balki oʻz mehnati orqali barqaror daromad manbaini yaratishga muvaffaq boʻldi. Nuroniylarning har bir xonadonga kirib borishi, oila aʼzolari bilan uchrashib, ularning muammolarini yechishga koʻmaklashishi jamiyatda jipslik va mehr-oqibat rishtalarini mustahkamlamoqda.

Xuddi shunday ijobiy oʻzgarishlarni Olmazor mahallasida yashovchi Dilbar Atajanova xonadoni misolida ham koʻrish mumkin. Ushbu oilaga mahalla faoli Ozod Madraimov masʼul qilib biriktirilgan. Uning tavsiyasi va “Mahalla yettiligi”ning koʻmagi bilan oilaning elektr energiyasiga boʻlgan ehtiyojini qoplash va xarajatlarni kamaytirish maqsadida xonadonga quyosh panellari oʻrnatib berildi. Ozod Madraimovning bevosita yordami bilan oilaga imtiyozli kredit ajratildi va bu mablagʻ evaziga chorva mollari sotib olindi. Hozirda xonadonda chorvachilik kengaytirilib, roʻzgʻorning kam-koʻsti toʻldirilmoqda.

Raqamlarga eʼtibor qaratadigan boʻlsak, “Kambagʻallikdan farovonlik sari” dasturining ijrosi tumanda qanchalik samarali ketayotgani yaqqol namoyon boʻladi. Xususan, 2025-yilning birinchi bosqichida 138 nafar nuroniyga 668 ta oila, ikkinchi bosqichida esa 144 nafar nuroniyga 719 ta oila biriktirildi. Olib borilgan izchil ishlar natijasida birgina 2025-yilning oʻzida jami 664 ta oila kambagʻallikdan chiqarildi.

Bogʻ mahallasida yashovchi Azamat Toʻrayev oilasi ham bugun kambagʻal oilalar reyestrida yoʻq. Unga masʼul etib tayinlangan Qurolboy Eshchanov oilaning tadbirkorlikka boʻlgan ishtiyoqini toʻgʻri yoʻnaltira oldi. Koʻrsatilgan amaliy yordam va bankdan olingan kredit evaziga Azamat Toʻrayev chorva mollari sonini koʻpaytirishga erishdi. Bu bilan cheklanmay, kichik ishlab chiqarish tsexini ham tashkil etdi. Bu esa oilaning iqtisodiy qudratini oshirish bilan birga yangi ish oʻrinlaring yaratilishiga ham xizmat qilmoqda.

Shu mahallada istiqomat qiluvchi Marhabo Haytakova oilasiga tajribali nuroniy onaxon Zulfiya Ollayorova masʼul qilib biriktirilgan. Bu yerda ham tizimli yondashuv oʻz samarasini berdi: oila kredit mablagʻlari hisobiga chorvachilikni kengaytirib, kambagʻal oilalar reyestridan chiqarildi.

Bugungi kunda Amudaryo tumanida bu xayrli ishlar izchil davom ettirilmoqda. 2026-yilning birinchi bosqichida 144 nafar nuroniyga 720 ta oila biriktirilib, ularni kambagʻallikdan chiqarish boʻyicha amaliy rejalar hayotga tatbiq etilmoqda.

Oilalarning oʻzini oʻzi band qilishi uchun imtiyozli kreditlar ajratilishi, nuroniylarning tomorqadan unumli foydalanish va mehnat intizomi borasidagi maslahatlari kambagʻallikka qarshi kurashishda asosiy omil boʻlib xizmat qilmoqda.

Nuroniylar orqali ularga biriktirilgan har bir oilada sogʻlom maʼnaviy muhit qaror topib, oila aʼzolarida mehnatga boʻlgan ishtiyoq va ertangi kunga ishonch paydo boʻlmoqda. Ushbu tizim natijasida oʻz daromadiga ega boʻlgan, yashash sharoitlari yaxshilangan yurtdoshlarimiz yaratilgan imkoniyatlar va koʻrsatilayotgan yuksak eʼtibor uchun Prezidentimizga oʻzlarining samimiy minnatdorliklarini izhor etmoqdalar. Zero, xalq roziligi – islohotlarning oliy maqsadi, nuroniylarning duosi va yoshlarning shijoati esa farovon kelajak garovidir.

Bekman ALLABERGANOV, “Nuroniy” jamgʻarmasining Amudaryo tuman boʻlimi raisi