Xavfsiz mahalla — osoyishta hayot

Bugungi shiddatli davrda jamiyat osoyishtaligi va fuqarolar xavfsizligini taʼminlash har qachongidan ham dolzarb ahamiyat kasb etmoqda. Ayniqsa, aholi gavjum boʻladigan hududlarda, savdo majmualari va aholi xonadonlarida xavfsiz muhitni shakllantirish davlat siyosatining ustuvor yoʻnalishlaridan biriga aylandi. Bu borada Oʻzbekiston Respublikasi Prezidentining 2026-yil 5-yanvardagi “Respublika mahallalarida xavfsiz muhitni yaratish yoʻnalishida yaxlit manzilli ishlash tizimini joriy etishga qaratilgan qoʻshimcha chora-tadbirlar toʻgʻrisida”gi Qarori muhim huquqiy asos boʻlib xizmat qilmoqda. Mazkur hujjat ijrosini taʼminlash, mahallalarda tinchlik va barqarorlikni mustahkamlash maqsadida Amudaryo tumanida ham keng koʻlamli amaliy ishlar olib borilmoqda.

Tuman Ichki ishlar boʻlimi huzuridagi Qoʻriqlash xizmati xodimlari tomonidan amalga oshirilayotgan chora-tadbirlar zamirida avvalo inson qadrini ulugʻlash va uning mol-mulkini turli tajovuzlardan himoya qilishdek ezgu maqsad mujassam. 2026-yil davomida belgilangan ish rejaga muvofiq, tuman mahallalarida huquqbuzarliklarning barvaqt oldini olish va jinoyatchilikka qarshi kurashish tizimi sifat jihatidan yangi bosqichga koʻtarilmoqda.

Qoraqalpogʻiston Respublikasi Ichki ishlar vazirligi huzuridagi Qoʻriqlash xizmatining targʻibot ishlari boʻyicha tasdiqlangan rejasiga asosan, hududlardagi kriminogen vaziyat chuqur tahlil qilinib, alohida eʼtibor talab etuvchi, yaʼni “qizil” toifaga kiritilgan mahallalarda manzilli oʻrganishlar olib borilmoqda. Mazkur xatlov ishlari natijasida zaif nuqtalar aniqlanib, zamonaviy texnika vositalari yordamida xavfsizlikni kuchaytirish choralari koʻrilmoqda.

Joriy yilning 8-aprel kuni Amudaryo tumanining Navoiy mahallasi hududida joylashgan “Mangʻit dehqon bozori” masʼuliyati cheklangan jamiyati hududida navbatdagi profilaktik tadbir va targʻibot ishlari tashkil etildi. Tadbir doirasida bozor hududida faoliyat yuritayotgan 45 nafardan ziyod tadbirkor bilan yuzma-yuz muloqot oʻtkazilib, ularga oʻz mulklarini saqlashda zamonaviy qoʻriqlash tizimlarining afzalliklari, tezkor harakatlanuvchi guruhlarning imkoniyatlari va texnik vositalarning ishonchliligi yuzasidan batafsil maʼlumotlar berildi.

Professional yondashuv va tushuntirish ishlari oʻz samarasini bermay qolmadi. Tadbirkorlar bilan oʻtkazilgan muloqotlar davomida xavfsizlik tizimi nafaqat moddiy boyliklarni, balki insonlarning ruhiy xotirjamligini ham taʼminlovchi omil ekanligi alohida taʼkidlandi. Natijada, bozor hududida faoliyat yuritayotgan 7 ta zargarlik doʻkoni egalari zamonaviy himoya vositalarini oʻrnatishga qaror qilishdi. Maʼlumki, zargarlik buyumlari savdosi bilan shugʻullanuvchi nuqtalar doimo yuqori xavf ostida boʻladi, shu bois ularni “Tashvish” tugmachasi orqali markazlashgan qoʻriqlash punktiga ulash eng maqbul yechim hisoblanadi.

Bundan tashqari, nafaqat tadbirkorlik subʼektlari, balki oddiy fuqarolar ham oʻz xonadonlari xavfsizligiga befarq emasliklarini koʻrsatishdi. Targʻibot natijasida ikki nafar fuqaroning turar joyi ham mazkur tizimga ulanib, yuqori darajadagi xavfsizlik nazorati ostiga olindi. Endilikda ushbu obʼektlarda biror-bir noxush holat yoki tahdid yuzaga kelgan taqdirda, “Tashvish” tugmachasining bir marta bosilishi bilan Qoʻriqlash xizmatining tezkor guruhlari bir necha daqiqa ichida voqea joyiga yetib borishi kafolatlanadi.

Bu kabi tizimli ishlarning amalga oshirilishi Amudaryo tumani mahallalarida jinoyatchilikning oldini olish va jamoat tartibini saqlashda muhim poydevor boʻlib xizmat qiladi. Prezident qarori ijrosi doirasida olib borilayotgan bunday manzilli chora-tadbirlar faqatgina maʼlum bir kun yoki tadbir bilan cheklanib qolmaydi. Bu jarayon yil davomida izchil davom ettirilib, har bir xonadon va har bir tadbirkorlik nuqtasi xavfsiz makonga aylantirilishi koʻzda tutilgan.