Xotira va qadrlash kuniga bagʻishlangan ommaviy sport tadbirlari oʻtkazildi

Yurtimizda har yili keng nishonlanadigan 9-may — Xotira va qadrlash kuni nafaqat oʻtganlarni xotirlash, ularning jasorati oldida bosh egish, balki bugungi tinch, erkin va osoyishta hayotimizning qadriga yetish, shu bilan birga, kelajak egalari boʻlmish yoshlarni sogʻlom va barkamol qilib tarbiyalash maqsadlarini ham oʻz ichiga oladi. 8-may kuni Amudaryo tumanida ham shu maqsadda ommaviy sport tadbirlari boʻlib oʻtdi.

Tuman hokimligi hamda tuman Sport maktabining oʻzaro hamkorligida tashkil etilgan mazkur sport bayrami aholi, xususan, yoshlar oʻrtasida sogʻlom turmush tarzini keng targʻib qilish, ularning boʻsh vaqtlarini mazmunli oʻtkazish va bayram shukuhini yanada oshirishdek olijanob maqsadlarga xizmat qildi. Ushbu ommaviy musobaqa doirasida ishtirokchilar sportning velomarafon hamda yengil atletika turlari boʻyicha oʻz kuch, tezlik va imkoniyatlarini sinovdan oʻtkazdilar.

Sport bellashuvlarida umumiy hisobda 200 dan ortiq mahalla yoshlari faol ishtirok etib, oʻzlarining mustahkam irodasi, jismoniy tayyorgarligi va gʻalabaga boʻlgan cheksiz intilishlarini namoyish etishdi. Musobaqa nafaqat sport bellashuvi, balki chinakam doʻstlik va salomatlik bayramiga aylanib ketdi.

Tadbir davomida ishtirokchilarning xavfsizligi, tibbiy muhofazasi va salomatligini taʼminlash masalasiga ham tashkilotchilar tomonidan katta etibor qaratildi. Xususan, Amudaryo tumani tibbiyot birlashmasining maxsus tez tibbiy yordam mashinalari va malakali hamshiralari butun tadbir davomida shay holatda, hushyor turdi. Shuningdek, tuman Ichki ishlar boʻlimi xodimlarining bevosita nazorati ostida jamoat tartibi va harakat xavfsizligi taʼminlanib, bellashuvlarning yuqori surʼatda, hech qanday noxush holatlarsiz oʻtishiga erishildi.

Juda qizgʻin va murosasiz kechgan bahslar yakuniga koʻra turli yoʻnalishlar boʻyicha gʻoliblar aniqlandi. Yengil atletika yoʻnalishida erkaklar oʻrtasida kechgan shiddatli bahsda Azamat Oʻrozboyev marra chizigʻini hammadan oldin kesib oʻtib, faxrli 1-oʻrinni qoʻlga kiritdi. Undan keyingi natijalarni esa Diyorbek Shomuratov va Alibek Oʻrazmetovlar band etishdi. Qizlar oʻrtasidagi yengil atletika musobaqasida Oybek mahallasidan tashrif buyurgan Dinora Ozodova barcha raqiblarini ortda qoldirib, 1-oʻringa sazovor boʻldi. Amir Temur nomli ovul vakili Tovus Murotboyeva 2-oʻrinni, Xolimbeg ovulidan kelgan Barchinoy Zaripboyeva esa 3-oʻrinni egalladi.

Velomarafon bahslarida esa Navoiy mahallasi vakili Ahmad Oʻrozboyev eng tezkor natija qayd etib, 1-oʻrinni egallagan boʻlsa, Olmazor mahallasi sharafini himoya qilgan Javohir Maqsetov hamda Bunyod Bahodirovlar mos ravishda 2 va 3-oʻrinlarga loyiq deb topildi va shohsupaga koʻtarildi.

Tashkilotchilar tomonidan nafaqat gʻoliblar, balki oʻzlarining faolligi bilan boshqalarga oʻrnak boʻlgan qatnashchilar ham munosib eʼtirof etildi. Jumladan, Xolimbeg ovulidan Javohir Yoʻldoshev va Oʻrta qalʼa ovulidan Bobur Jumaboyevlar musobaqaning eng yoshi kichik ishtirokchilari sifatida alohida eʼtiborga tushdi va ragʻbatlantirildi. Shuningdek, Haytiboy Chovdirov velomarafon boʻyicha, Rufat Babajanov esa yengil atletika boʻyicha “Eng yoshi katta ishtirokchi” nominatsiyalariga munosib koʻrildi.

9-may — Xotira va qadrlash kuniga bagʻishlab oʻtkazilgan mazkur sport tadbiri tuman aholisining jismoniy tayyorgarligi va sogʻlom turmush tarziga boʻlgan mehrini namoyish etish bilan birga, ular qalbida vatanparvarlik, oʻzaro oqibat, hurmat va milliy anʼanalarimizga boʻlgan sadoqat tuygʻularini yanada mustahkamlashga xizmat qildi. Bu kabi keng qamrovli ommaviy tadbirlar aholi salomatligini mustahkamlabgina qolmay, jamiyatimizda sogʻlom turmush tarzini qaror toptirishdek eng muhim vazifani bajarishi bilan ham beqiyos ahamiyatga egadir.