Diniy ekstremizm va aqidaparastlikka qarshi targʻibot tadbiri oʻtkazildi

Bugungi globallashuv davrida tinchlik va osoyishtalikni asrash, yoshlarni turli yot gʻoyalar taʼsiridan himoya qilish har qachongidan ham dolzarb masalaga aylanmoqda. Ayniqsa, diniy aqidaparastlik, ekstremizm va terrorizm kabi tahdidlar jamiyat barqarorligi, millatlararo totuvlik hamda inson xavfsizligiga jiddiy xavf tugʻdirayotgani bois bu illatlarga qarshi maʼrifat bilan kurashish muhim ahamiyat kasb etmoqda.

Shu maqsadda Qoraqalpogʻiston Respublikasi Vazirlar Kengashi tomonidan tasdiqlangan ish-rejaga muvofiq, Amudaryo tumanida “Jaholatga qarshi maʼrifat” shiori ostida diniy aqidaparastlik, ekstremizm va terrorizm tahdidlarining oldini olishga qaratilgan keng qamrovli targʻibot tadbiri tashkil etildi.

Tuman hokimligi majlislar zalida oʻtkazilgan tadbirni tuman hokimi oʻrinbosari Nodirbek Kamolov olib bordi. Unda davlat va jamoat tashkilotlari vakillari, mahalla faollari, taʼlim sohasi xodimlari, xotin-qizlar faollari hamda yoshlar ishtirok etdi.

Tadbirning asosiy maqsadi jamiyatda hushyorlikni kuchaytirish, ayniqsa yosh avlodni turli buzgʻunchi gʻoyalar taʼsiridan asrash, diniy bagʻrikenglik va millatlararo totuvlikni mustahkamlashdan iborat boʻldi.

Tadbir davomida Din ishlari qoʻmitasining Qoraqalpogʻiston Respublikasi hududiy boshqarmasi bosh mutaxassisi Nurulla Jamolov diniy aqidaparastlikning asl mohiyati, uning jamiyat uchun xavfli jihatlari haqida atroflicha toʻxtaldi. Taʼkidlanganidek, aqidaparastlik — bu diniy tushunchalarni notoʻgʻri talqin qilish, murosasizlikni targʻib etish va jamiyatda nizolarni keltirib chiqarishga xizmat qiluvchi zararli oqimdir. Bunday gʻoyalar yoshlarning ongini zaharlab, ularni ota-ona, Vatan va jamiyat manfaatlariga zid yoʻllarga boshlashi mumkinligi alohida qayd etildi.

Shuningdek, ekstremistik oqimlar internet va ijtimoiy tarmoqlar orqali yoshlarni oʻz domiga tortishga urinayotgani, turli yolgʻon vaʼdalar, diniy shiorlar bilan ularning ishonchidan foydalanayotgani haqida ogohlantirildi. Mutaxassislar bugungi kunda axborot xurujlariga qarshi eng kuchli qurol — bu ilm, tafakkur va mustahkam maʼnaviyat ekanini taʼkidladi.

Din ishlari boʻyicha qoʻmitaning Qoraqalpogʻiston Respublikasi boshqarmasi xotin-qizlar masalalari boʻyicha yetakchi mutaxassis Xurayim Ibragimova oiladagi sogʻlom muhit, farzand tarbiyasi va onalarning hushyorligi masalasiga alohida eʼtibor qaratdi. Uning taʼkidlashicha, farzand tarbiyasiga befarqlik, nazoratning sustligi va maʼnaviy boʻshliq ayrim yoshlarning yot gʻoyalar taʼsiriga tushib qolishiga sabab boʻlishi mumkin. Shu bois oilada kitobxonlikni rivojlantirish, farzandlar bilan doimiy muloqot qilish va ularning qiziqishlariga eʼtibor berish muhim omil ekani qayd etildi.

Qoraqalpogʻiston Respublikasi Ichki ishlar vazirligi masʼul vakili Nurabulla Minajov esa terrorizm va ekstremizmning bugungi xavfli koʻrinishlari, ularning jamiyat xavfsizligiga salbiy taʼsiri haqida tahliliy maʼlumotlar berdi. Terrorizmning hech qanday millat va din tanlamasligi, u insoniyatga qarshi jinoyat ekani taʼkidlandi. Dunyoning turli hududlarida sodir boʻlayotgan terrorchilik harakatlari minglab begunoh insonlarning hayotiga zomin boʻlayotgani, iqtisodiy va ijtimoiy barqarorlikka katta zarar yetkazayotgani misollar orqali tushuntirildi.

Tadbirda diniy bagʻrikenglik, oʻzaro hurmat va hamjihatlik xalqimizning azaliy qadriyati ekani alohida eʼtirof etildi. Oʻzbekistonda barcha millat va din vakillarining tinch-totuv yashashi uchun yaratilgan imkoniyatlar, davlat tomonidan olib borilayotgan insonparvar siyosat yurtimizdagi osoyishtalikning muhim omili ekani qayd qilindi.

Yigʻilishda tuman hokimi oʻrinbosari, Oila va xotin-qizlar boʻlimi boshligʻi Goʻzal Saburova, mahalla yettiligi hamda tegishli tashkilot vakillari ham ishtirok etib, joylarda profilaktik tadbirlarni kuchaytirish, yoshlar bilan manzilli ishlash va maʼnaviy-maʼrifiy targʻibotni yanada faollashtirish yuzasidan fikr almashdilar.

Darhaqiqat, bugungi murakkab zamonda har bir fuqaroning hushyorligi, farzand tarbiyasiga masʼuliyat bilan yondashuvi hamda maʼnaviy qadriyatlarga sodiqligi yurt tinchligi va jamiyat osoyishtaligining eng muhim kafolatidir.

Charos Arslonova, tuman hokimligining Axborot xizmati rahbari.