ILM-U MAʼRIFATGA BAXShIDA UMR

Doʻrmanliklarning katta-yu kichigi xalq taʼlimi faxriysi, umrini el bolalarini ham oʻz farzandlariday ilmli, odobli, barkamol boʻlib voyaga yetkazish uchun baxshida qilgan Ozod aka Otajonovni oʻzlariga ustoz deb bilishadi. Boisi, u 41-yil mobaynida shu el bolalariga taʼlim-tarbiya bergan boʻlsa, ovulida oilalarning tinch-totuv yashashi, oʻzaro ogʻzibirchilik va hamjihatlik mustahkam boʻlishi uchun ham harakat qildi. Xonadoni eshigi hol-ahvol soʻrashgani, biron muammosini hal qilishga yoʻl-yoʻriq soʻrab kelgan odamlar uchun doimo ochiq turadi. Ustoz hech kimdan vaqtini ham, maslahatini ham ayamaydi.

Ozod Otajonov Buxoro Davlat pedagogika oliygohining biologiya fakultetini tugatib qishlogʻiga qaytgach, ish faoliyatini dastlab 20-maktabda bolalarga dars berishdan boshladi. U paytlarda bolalar oʻqish-oʻrganishdan koʻra, koʻproq paxtani parvarishlashdan tortib, yigʻishtirib olishgacha boʻlgan ishlarda band boʻlar, yosh oʻqituvchi imkon topib bolalarga ilm-u maʼrifat ulashishga intilardi. Shuning uchun ham 1978-yildan boshlab maktab ilmiy boʻlim mudiri boʻldi. 1993-yildan 2008-yilgacha 70-sonli umumtaʼlim maktabiga direktorlik qildi. Yosh bolalar qalbida ilm-maʼrifatga qiziqish uygʻotishda va oʻqituvchilar jamoasiga rahbarlik qilishda oʻziga xos maktab yaratdi.

Ozod Otajonov xalqimizning oʻzligini anglashga, tarixini oʻrganishga intilishi qattiq qatagʻon etilgan oʻtgan asrning saksoninchi yillarida safdosh doʻsti, jonkuyar oʻqituvchi Kenja aka Jumaniyozov (joyi jannatda boʻlsin!) bilan Doʻrmanninggina emas, balki butun Qilichboy elining, tumanimizning tarixiga oid koʻpgina maʼlumotlar toʻplashga erishdi. Ikkinchi jahon urushida shahid boʻlgan, bedarak ketgan qilichboylik yuz nafarga yaqin yurtdoshlarimizning ism-familiyalarini aniqlab, "Xotira kitobi”ga kiritilishiga erishdi. Eng diqqatga sazovor joyi – ustoz bu maʼlumotlarning hammasini hozir ham yodida saqlab qola olgan va bemalol aytib bera oladi.

- Oyogʻimiz ostidagi tilsiz zamin ne-ne talotoʻplarni koʻrmagan, necha-necha bugungiday farovon hayotni orzu qilib kurashgan ajdodlarimizni bagʻriga olmagan deysiz? Qilichboy tarixi bilan qiziqib, izlanib, oʻtmishimizning biror sahifasini boʻlsa-da yoritishga, bularni boshqalarga ham oʻrgatishga intildim. Hozir ham qiziquvchilarga jonim bilan bularni oʻrgataman, - deydi Ozod Otajonov.

Ustoz bilan bir bor suhbatlashgan odam shuuri oydinlashganday boʻladi, tiriklikdek bebaho neʼmatning qadrini teranroq anglaydi.

Oʻqituvchilik kasbi zarracha qadrlanmagan davrlarda ham ana shunday fidoyilik bilan 41-yil ishlagan Ozod Otajonov 2008-yildan beri nafaqada. Davlatbika Tursunova bilan ahil yashab, kamolga yetkazgan 4 qiz, ikki oʻgʻilning ardogʻida keksalik gashtini surib yashayapti. Qizlarining hammasi uyli-joyli boʻlib, oʻsib-unib, oʻzliridan tinchib ketishdi. Oʻgʻillari Hamidullo, Xayrullo, ikkala kelin ham ota kasbini davom ettirishayapti.

Ularning oila qurganiga bu yil kuzda 40-yil toʻldi. 40-yil sen-menga bormay, ahil-inoq yashab, farzandlarini ham odobli, ilmli, halol va el koriga yaraydigan insonlar qilib voyaga yetkazishdi. Shuning uchun ham ularning oilasi joriy yilda "Mahalla” xayriya jamoat fondi tuman boʻlinmasi OFY, MFYlar bilan hamkorlikda oʻtkazgan "Eng ibratli oila” koʻrik-tanlovining ovul bosqichi gʻolibi, deb eʼtirof etilib, tuman miqyosidagi bosqichda ishtirok etishdi.

- Opangiz ikkimiz ham keksalikka kirdik, deb qarab oʻtirmaymiz, doimo el bilan birgamiz, boʻsh vaqtlarimizda nevaralarimizni yonimizga olib, tomorqa ishlariga, mol-tovuqqa qaraymiz, - deydi Ozod aka kulib.

Shuning uchun ham ularning hovlisi atrofi yam-yashil daraxtlar, gullar bilan juda tarovatli. 18 nafar nevara, bir chevara quvonchini koʻrgan ustoz esa baribir tinim bilmaydi, gʻayratli, koʻnglida ertangi kun rejalari. Bularning barida kishini ezgulikka, intilishga chorlaguvchi ajib bir hikmat mujassam. Bu hikmatdan koʻpchilik oʻrnak olsa arzigulik.

Oygul RAJABOVA.