EL-YuRTGA BAXShIDA UMR

Hayot qancha totli boʻlmasin, intihosi bor, kimdir uzoq, kimdir qisqa umr koʻradi. Shu masofa oraligʻida qilgan ishlari, ezgu amallari umrini bezaydi, mangulikka daxldor qiladi.

Muhtaram Prezidentimiz I.Karimov vafotidan chuqur qaygʻuga botgan tumanimiz xalqini 2016-yilning 8-sentyabr tongida yana bir mudhish xabar qarshi oldi: tumanimiz hokimi, Amu elining fidoyi va jonkuyar farzandi, gʻamxoʻr rahbar, talabchan ustozimiz Rajapbay aka Yoʻldashev ogʻir kasallikdan vafot etdi. Ushbu qaygʻuli damlarda men ustozimizning oila aʼzolariga, barcha qarindosh-urugʻlariga va butun tumanimiz xalqiga oʻz hamdardligimni bildiraman.

Men Rajapbay Yoʻldashev bilan uzoq yillar, avval "Amudaryo haqiqati” gazetasi muharriri, keyinchalik hokim muovini sifatida birga ishlashga, u kishining maslahatlarini, yoʻl-yoʻriqlarini olishga va oʻz faoliyatim davomida ulardan foydalanishga musharraf boʻlganimdan faxrlanaman.

Xuddi hozirgiday esimda, u kishi hokimlik masʼul xodimlari bilan yo korxona, tashkilotlar rahbarlari bilan qanday masalada yigʻilish oʻtkazmasin, bir gapni koʻp takrorlardilar: "Bizga tumanimiz xalqi suyanadi, umid bilan qaraydi, xalq gazsiz, elektr energiyasisiz yo suvsiz oʻtirsa, yo boshqa muammolar girdobida qolib ketsa... unda bizning nima keragimiz bor, biz kimman deb bosh koʻtarib yuramiz?”

Rajapbay Yoʻldashev tumanga rahbarlik qilgan yillarida xalqimizni qanchalik farovon, turmushini obod koʻrishni istagan boʻlsa, fidoyi mehnatlari tufayli, odamlarni ham shu niyatlari yoʻlidan boshlab, maqsadlariga erishdilar, deb ayta olaman. Tumanimizdagi barcha sohalarda erishilgan yutuqlar, yuksalishlar, dasturxonlarimiz toʻkinligi, turmushimizning obodonligi zamirida u kishining mashaqqatli mehnatlari mujassamdir.

Hech esimdan chiqmaydi: 2005-yilning izgʻirinli kuz kunlarida Amudaryoning ostidan tumanimizga gaz tarmogʻi tortilgan damlarda charchaganiga, sovuq yeganiga ham qaramay, Rajapbay aka jarayonning  boshida turdi. Tezroq xalqimizning tabiiy gaz bilan taʼminlanishiga oshiqdi.

Oʻsha hudud aholisi, tumanimizdagi korxona, tashkilotlar rahbarlari, fermerlar ishlovchilarga navbatma-navbat ovqat, choy tashib turganini koʻrib:

- Shunday ahil, borini el bilan baham koʻradigan odamlarimiz uchun har qancha xizmat qilsak oz, - degandilar quvonib.

Tumanimiz xalqi oʻz rahbarini, jonkuyarini, fidoyi oʻgʻlonini qanchalik  sevmasin, Yaratganning hukmi oldida  ojiz. Katta-yu kichik cheksiz qaygʻu bilan, alamli yoshlari bilan Rajapbay Yoʻldashevni soʻnggi yoʻlga kuzatdi. Uning xotirasi qalblarimizda abadiy saqlanib qoladi.

Xonimjon RAJABOVA,

"Barkamol avlod” bolalar markazi direktori, Qoraqalpogʻiston Respublikasida xizmat koʻrsatgan madaniyat xodimi.

***

Necha oylarki, tumanimiz mehnatkashlari  tumanimiz rahbari, talabchan va ayni paytda gʻamxoʻr, qatʼiyatli ustozimizning sogʻ-salomat safga qaytishini tilab, u kishining yoʻqligini bildirmay, sidqidildan mehnat qilib, barcha sohalarda yutuqlarga erishib, u kishining dardini yengillatishga harakat qilishmoqda edi.

Afsus, Qoraqalpogʻiston Respublikasi Joʻqorgʻi Kengesi va tuman Kengashi deputati, "Shuhrat” medali, "Mehnat shuhrati” ordeni sohibi, Qoraqalpogʻiston Respublikasida xizmat koʻrsatgan iqtisodchi, iqtisod fanlari nomzodi Rajapbay Yoʻldashev oramizdan juda erta ketdi.

Men oʻzim rahbarlik qilayotgan "Amirxon” fermer xoʻjaligimizning yillik paxta topshirish rejasini bajarganimni u kishiga quvonib aytishga chogʻlangan vaqtimda shu mashʼum xabarni eshitdim. Rajapbay akaga kichkina boʻlsa-da xushxabar aytsak, oʻzida yoʻq quvonar, hali sizlarning  qoʻlingizdan koʻp ishlar  keladi, deya yana ham ishga shoʻngʻib ketishga ruhlantirar edilar.

U kishining yoʻl-yoʻriqlari, maslahatlarini olib ishlab, kam boʻlmadim. 2008-yilda "Qilichboy” MMTP raisligini, 2012-yilda tuman fermerlar Kengashi raisligini menga ishonib topshirgan boʻlsalar, bu vazifalarni sidqidildan ado etishga harakat qildim. Umuman, Rajapbay aka barcha rahbarlarni  ham qoʻllar, kerak paytda muammolarini tinglab, yechim topishiga koʻmaklashardi. Dala kezib yurgan yo  tuman hayotiga oid boshqa muammolar bilan shugʻullanayotgan boʻlsa-da, oddiy xalqning hayotini hech nazardan qochirmas, hudud rahbarlariga doim ana shu odamlar uchun ishlayotganingizni unutmang, deb uqdirardi.

Rajapbay aka Yoʻldashev oʻzining ishchanligi, bilimdonligi, tumanimizda barcha jabhalarning taraqqiyoti uchun birday qaygʻuradigan fidoyi va jonkuyarligi bilan barchaga namuna edi.

Aziz ustozimizning xotirasi qalblarimizda abadiy saqlanib qoladi.

Otaxon QURBONIYoZOV,

"Amirxon” fermer xoʻjaligi raisi, Qoraqalpogʻiston Respublikasida xizmat koʻrsatgan qishloq xoʻjaligi xodimi.