BUNDA ALPLAR KAMOL TOPADI

Mustaqillik yillarida muhtaram Prezidentimiz Islom Karimov rahnamoligida hayotimizning barcha jabhalarini, shuningdek sport sohasini tubdan isloh qilish borasida keng koʻlamli ishlar amalga oshirildi. Jumladan, Prezidentimiz tashabbusi bilan tashkil etilgan Bolalar sportini rivojlantirish jamgʻarmasi mamlakatimizda sport harakatini yanada kengaytirishda, jismonan sogʻlom va maʼnan barkamol avlodni tarbiyalashda alohida ahamiyat kasb etmoqda. Davlatimiz rahbarining 2002-yilning 24-oktyabridagi "Oʻzbekiston Bolalar sportini rivojlantirish jamgʻarmasini tuzish toʻgʻrisida”gi va 2004-yilning 29-avgustidagi "Oʻzbekiston Bolalar sportini rivojlantirish jamgʻarmasi faoliyatini takomillashtirish chora-tadbirlari toʻgʻrisida”gi Farmonlari mamlakatimizda bolalar sportini rivojlantirish borasida muhim dasturilamal boʻlib xizmat qilmoqda.

Bolalar sportini rivojlantirish jamgʻarmasining samarali faoliyati natijasida Vatanimizning eng chekka hududlarida ham yoshlar sport bilan muntazam shugʻullanish imkoniyatiga ega boʻlmoqdalar. Buning uchun esa mamlakatimizda barcha sharoitlar yaratilgan. Qishloq joylarida koʻplab zamonaviy sport inshootlari barpo etilib, ular zamonaviy sport jihozlari va anjomlari bilan taʼminlanmoqda.

Ayni paytda mamlakatimizda bunday imkoniyatlardan samarali foydalanishni tashkil etish maqsadida keng koʻlamli ishlar olib borilayapti. Jismoniy tarbiya va sportni rivojlantirish davlatimiz siyosatining ustuvor yoʻnalishlaridan biriga aylandi.

Joriy yilning 5-sentyabridan kuchga kirgan Oʻzbekiston Respublikasining yangi tahrirdagi "Jismoniy tarbiya va sport toʻgʻrisida”gi Qonuni bu fikrimizning yorqin ifodasidir.

Ushbu Qonunning 4-bobi, 29-moddasida: "taʼlim oluvchilarni jismoniy tarbiya va sport mashgʻulotlariga jalb etish uchun shart-sharoitlar yaratish, shu jumladan yoshlarning jismoniy tarbiya-sport tayyorgarligi boʻyicha tadbirlar majmuini oʻtkazish uchun sport jihozlari va anjomlari bilan taʼminlash” vazifasi aniq belgilab qoʻyildi.

Ayni kunda bizning tumanimizda Yurtboshimiz Islom Karimov va hukumatimiz tomonidan yosh avlodning jismonan baquvvat boʻlib oʻsishlari uchun koʻrsatilayotgan gʻamxoʻrliklarga javoban keng koʻlamli ishlar amalga oshirilayotir. Tumanimizdagi mavjud 3 ta Bolalar va oʻsmirlar sport maktablarida, umumtaʼlim maktablari qoshida qurilgan 54 ta sport  inshootlarida, shuningdek Akademik litsey va kasb-hunar kollejlari qoshidagi mavjud 10 ta sport zallarida 20 mingdan ziyod oʻquvchi-yoshlar sportning 16 ta turi boʻyicha  shugʻullanib, oʻzlarining qobiliyat va isteʼdodlarini toʻla namoyon etish uchun harakat qilmoqdalar.

Mangʻit shahridagi 2-sonli BOʻSMda Bolalar sportini rivojlantirish, yoshlarning, ayniqsa maktab oʻquvchilarining sportga boʻlgan qiziqishlarini oshirish borasida tizimli ishlar amalga oshirilmoqda.

1994-yilda tashkil topgan 2-sonli BOʻSM Mangʻit shahridagi markaziy oʻyingoh binosiga joylashtirilgan edi. Keyinchalik ushbu maktab binosini taʼmirlash maqsadida Bolalar sportini rivojlantirish jamgʻarmasi tomonidan 773,5 million soʻm pul mablagʻi ajratildi va rekonstruktsiya ishlari amalga oshirildi.

Hozirgi paytda barcha sharoitlar mavjud boʻlgan ushbu Bolalar va oʻsmirlar sport maktabida sportning 7 ta turi boʻyicha 14 nafar tajribali murabbiylar tomonidan mashgʻulotlar oʻtkazilmoqda.

- Bolalarda sportning oʻzlari tanlagan turiga boʻlgan qiziqishlarini yanada oshirishda, ularda mashgʻulotlarga boʻlgan koʻnikmalarni shakllantirishda murabbiylarning tajribasi va mahorati katta  ahamiyatga ega, - deydi biz bilan suhbatda 2-sonli BOʻSM direktori Chorsham Tojimurodov. – Shu boisdan ham bizning maktabimizda barcha sport murabbiylari oldiga qoʻyiladigan talablar katta.

Maktabimizda bolalarga sportning sir-asrorlarini oʻrgatayotgan 14 nafar murabbiylarimizdan 8 nafari oliy jismoniy tarbiya va sport maʼlumotiga, 6 nafari esa oʻrta maxsus jismoniy tarbiya maʼlumotiga ega.

Biz Tozaboy Matchonov, Poʻlat Kumekov, Sarvar Davletov, Hamid Qurboniyozov, Rahmatjon Raximov va Rahimjon Qoʻshayevlar kabi tajribali va jonkuyar murabbiylarimiz bilan har qancha faxrlansak arziydi. Chunki ular oʻz shogirdlariga sport sirlarini oʻrgatishda jonkuyarlik namunalarini koʻrsatmoqdalar.

Maktab direktorining sport murabbiylari haqida faxrlanib gapirishida jon bor. Haqiqatan ham murabbiylarning sidqidildan qilgan mehnatlari ayni kunda oʻz samarasini berayapti.

Oʻtgan yilning oxirida dzyu-do kurashi boʻyicha oʻtkazilgan "Umid nihollari - 2015” sport musobaqalarining Qoraqalpogʻiston Respublikasi 3-bosqichida Poʻlat Kumekov murabbiyligida shugʻullanayotgan Maʼrufjon Komilov 55 kg. vaznda, Tozaboy Matchonov murabbiyligida shugʻullanayotgan Muhiddin Madiyorov 66 kg. vazn toifasida gʻoliblikni qoʻlga qiritib, Qoraqalpogʻiston Respublikasi terma jamoasi tarkibiga qabul qilindi va Oʻzbekiston Respublikasi xalq taʼlimi vazirligining  maxsus sertifikatini olishga, bu bilan esa musobaqaning final oʻyinlarida ishtirok etish huquqini qoʻlga kiritishga muvaffaq boʻldilar.

Joriy yilning  11-12-aprel kunlarida kurash boʻyicha oʻtkazilgan Qoraqalpogʻiston Respublikasi chempionatida Zokir Rajabov 55 kg. vazn toifasida 1-oʻrinni egalladi. Dzyu-do kurashi boʻyicha 25-26-aprel kunlarida oʻtkazilgan Qoraqalpogʻiston  Respublikasi chempionatida Javohir Yoʻldoshev 73 kg. vaznda 1-oʻrinni, kurash boʻyicha 30-31-may kunlari Qoraoʻzak tumanida oʻtkazilgan Qoraqalpogʻiston Respublikasi chempionatida Xursandbek Joʻlliboyev 46 kg. vazn toifasida 1-oʻrinni egalladilar.

2-sonli Bolalar va oʻsmirlar sport maktabida shugʻullanayotgan yosh sportchilar tomonidan qoʻlga kiritilayotgan yutuqlar tobora koʻpayib borayapti.

"Yoz – 2015” sport musobaqalarining Qoraqalpogʻiston Respublikasi final bosqichida maktab  jamoasi dzyu-do va shaxmat oʻyinlari boʻyicha faxrli ikkinchi oʻrinni egalladi. Shuningdek, sport maktabi shugʻullanuvchilaridan 50 nafari Qoraqalpogʻiston Respublikasi va 30 nafari Oʻzbekiston Respublikasi chempionatlarida, kuboklarida va turnirlarida faol ishtirok etdilar.

Mazkur oʻquv yilida Olimpiada oʻyinlari dasturiga kiritilgan taekvondo – WTF va ogʻir atletika turlaridan guruhlar tashkil qilinib, ular oʻz faoliyatini boshladilar. Taekvondo - WTF  boʻyicha Urganchdagi Olimpiya zaxiralari kollejini bitkazib kelgan murabbiy Oybek Abdullayev 19-sonli maktabda, Oʻzbekiston Davlat jismoniy tarbiya institutini bitkazgan Anvar Boboniyozov ogʻir atletika boʻyicha 21-sonli maktabda oʻquvchilarga sport sirlarini oʻrgatmoqdalar.

2-sonli Bolalar va oʻsmirlar sport maktabining murabbiylar va yosh sportchilar jamoasi shu maktabdan yetishib chiqqan Feruza Haytimbetova, Zulhijja Xudoyorova, Elyor Masharipov, Sharofiddin Boltaboyev va Umida Matyoqubova singari mashhur sportchilar bilan haqli ravishda faxrlanadilar. Chunki Elyor Masharipov dzyu-do kurashi boʻyicha Yevropa ochiq chempionatida faxrli birinchi oʻrinni, Sharofiddin Boltaboyev Osiyo chempionatida faxrli ikkinchi oʻrinni, Yevropa ochiq chempionatida esa faxrli uchinchi oʻrinni, Umida Matyoqubova kurash boʻyicha Osiyo oʻyinlarida uchinchi oʻrinni egallashga muvaffaq boʻlgan edilar. Feruza Haytimbetova va Zulhijja Xudoyorovalar jahon chempionlari, xalqaro toifadagi sport ustalari hisoblanadilar.

Hozirgi kunda 2-sonli Bolalar va oʻsmirlar sport maktabida shugʻullangan 10 nafardan ziyod yosh sportchilar Toshkent, Chirchiq, Urganch va Nukus shaharlaridagi Olimpiya sport kollejlarida taʼlim-tarbiya olmoqdalar.

Biz soʻz yuritayotgan 2-sonli Bolalar va oʻsmirlar sport maktabida ustoz va shogird oʻrtasidagi bir-birovga boʻlgan qatʼiy ishonch va hurmat tobora mustahkamlanib borayapti. Shu boisdan ham ustozni eshitsangiz, shogirdi haqida faxrlanib gapiradi, shogirdga soʻz bersangiz, ustozini maqtaydi. Eʼtibor bering:

- Dzyu-do  kurashiga kichkinalik paytimdan qiziqaman, - deydi yosh sportchi Maʼrufjon Komilov. – Mendagi sportning bu turiga boʻlgan qiziqishimni oshirishda ustozim Poʻlat Kumekovning xizmatlari katta boʻldi. Murabbiyimning talabchanligi, sportda shoshma-shosharlikka yoʻl qoʻymaslik, bosiq, sabr-toqatli boʻlish yuzasidan bergan nasihatlari mening koʻpgina musobaqalarda gʻoliblikni qoʻlga kiritishimga asos boʻlmoqda. Shu boisdan ham koʻpgina bellashuvlarda  oʻz vazn toifamda gʻoliblik shohsupasiga koʻtarildim, sovrinli oʻrinlarni qoʻlga kiritdim.

- Shogirdlarim orasida oʻzgacha qobiliyatli yoshlar anchagina, - deydi murabbiy Tozaboy Matchonov. - Shulardan biri – Muhiddin Madiyorov dzyu-do kurashi boʻyicha bir qancha bellashuvlarda gʻoliblikni qoʻlga kiritib, mening ishonchimni oqlab kelayapti. Shogirdlarim orasida uning qobiliyati oʻzgacha. Mashgʻulotlarga oʻz vaqtida keladi, koʻrsatilgan uslublarni bekam-u koʻst bajaradi, oʻz kamchiliklari ustida qunt bilan ishlaydi. Kelajakda undan umidimiz katta.

Biz 2-sonli Bolalar va oʻsmirlar sport maktabida bolalar sportini rivojlantirish borasida olib borilayotgan ishlar bilan tanishar ekanmiz, bu yerda oʻz oldilariga kelajakda haqiqiy sportchi boʻlib, Vatanimiz bayrogʻini jahon arenalarida baland koʻtarishni maqsad qilib qoʻygan yoshlarni, ularning oʻz maqsadlari sari intilishlarini koʻrib, benihoya quvondik. Bir soʻz bilan aytganda, bu yerda haqiqatan ham zamonamiz alplarining – bahodir va pahlavonlarining kamol topayotganiga ishonch hosil qildik.

Allambergan JUMANIYoZOV,

"Taraqqiyot koʻzgusi” gazetasi muxbiri.

M.ShOMURODOV olgan suratlar.