QUDUQDAGI YuLDUZLAR

Gohida shunday moʻʼjizalarga guvoh boʻlamizki, hayratdan yoqamizni ushlaymiz. Bizning yurtimiz shunday - moʻʼjizalarga boy hisoblanadi. 2014 yilning avgust oyida oʻquv yili oldidan oila aʼzolarimiz bilan Norimjon buva ziyoratgohiga borgan edik. Oyim menga bu yerdagi moʻʼjizakor quduq haqida aytib bergan edi. Bizni shu quduq qarshisiga olib bordi. U yerda quduq ustiga chertak qurilgan ekan. Quduq yonida keksaroq kishi oʻtirgan ekan. U ham ziyoratga kelganlardan edi. Bu quduq karomati shundan iborat-ki, u quduqning suvi shifobaxsh boʻlishi bilan bir qatorda unda odamlar kelajagiga bashoratni koʻrish mumkin. Qanday qilib deb oʻylayotgandirsiz?

Quduqqa boshingizni egib, ustidan yorugʻlik tushmaydigan qilib qalin mato yopish kerak, keyin tilagingizni tilaysiz va bir necha soniyalardan soʻng yo yulduzlar koʻrinadi, yo hech narsa koʻrinmaydi. Agar yulduzlar yorishib tursa, kelajaging porloq, tilaklaring amalga oshar ekan. Mabodo hech narsa koʻrinmasa, tilaklaring amalga oshmas ekan. Men ham shunday qilgan edim. Avvaliga ikkita yulduz chiqib, yorishdi. Keyin yulduzlar koʻpayib ketdi. Buni boyagi keksaroq kishiga aytgan edim. Barcha tilaklaring, rejalaring amalga oshadi, dedi u.

Men oʻshanda uchta tilak tilagan edim. Birinchisi – ota-onam sogʻ-omonligi, ikkinchisi esa oʻshanda 9-sinf oʻquvchisi boʻlganim uchun tumanimizdagi 3-sonli Amudaryo akademik litseyiga oʻqishga kirish edi. Bu ikkisi ham amalga oshdi. Xudoga shukur, ota-onam, yaqinlarim sogʻ-salomat, oilamiz baxtli, oʻzim esa orzuimdagi litseyda oʻqiyapman. Men bundan judayam baxtliman. Uchinchi tilagim esa hali oldinda. Amalga oshsa, albatta sizlarni  xabardor qilaman.

Dinora KARIMBOYeVA,

Amudaryo akademik litseyi oʻquvchisi.

(Foto - http://ic.pics.livejournal.com)