“Zulfiyaxonim qizlari − umidimiz yulduzlari”

Xalqimiz bahor faslini shoira Zulfiya Isroilovaning tavallud topgan kuni bilan boshlashni ezgu anʼanaga aylantirgan. Har yili ijodiy tashkilotlar vakillari, shoir va yozuvchilar, tarjimonlar hamda yosh ijodkorlar tomonidan sadoqat kuychisining qabriga gul qoʻyilib, shoir haykali poyida adabiy tadbir oʻtkaziladi. Qolaversa, Zulfiya tavalludi yurtimizdagi barcha taʼlim muassasalarida ham adabiyot bayrami sifatida keng nishonlanishi sir emas.

Tumanimizning Doʻrman ovulida joylashgan 84-sonli umumtaʼlim maktabida ham “Zulfiyaxonim qizlari − umidimiz yulduzlari” deb nomlangan tadbir oʻtkazildi.

Bellashuv tarzida oʻtkazilgan ushbu kechada 8-sinfning oʻquvchi qizlari 5 ta shart asosida oʻz bilimlarini va ijodkorlik qobilyatlarini sinovdan oʻtkazishdi. 1-shart “Tanishtirish” sharti boʻlib har bir ishtirokchi oʻzining tarjimai holi, qiziqishlari haqida maʼlumotlar berib oʻtishdi. 2-shart “Savol-javob” shartida shoira xayoti va ijodiga doir savollar asosida oʻquvchilarning bilim salohiyati mustahkamlandi. 3-shart “Zulfiya hayotiga doir matn hamda sheʼrlarni ifodali oʻqish” sharti boʻlib ushbu shartda ishtirokchilarning nutq mahorati sinovdan oʻtkazildi. 4-shart “Arzanda boʻlmang, pazanda boʻling” deb nomlandi. Mazkur shartda oʻquvchi qizlar oʻzining pazandalik qobilyatlarini namoyish qilibgina qolmasdan, dasturxon bezatishdagi ijodkorlik qobilyatlarini ham namoyish qilishdi. Yakuniy shart, “Erkin mavzu” shartida Zulfiyaxonim xayotiga doir sahna koʻrinishlar namoyish qilindi.

Hakamlar hayʼati aʼzolari belgilangan shartlar asosida oʻquvchilar bilimini odilona baholab bordilar. Yakuniy natijalarga koʻra 8-“A” sinfning qizlar jamoasi gʻolib deb topildi. Oʻquvchilar maktab maʼmuriyatining esdalik sovgʻalari va faxriy yorliqlari bilan taqdirlandilar.

Tadbirda soʻzga chiqqanlar Zulfiyaning boy ijodiy meʼrosi, uning hayot yoʻli va koʻrgan qiyinchiliklari haqida soʻz yuritib sabr va matonat timsoliga aylanganligini eʼtirof etishdi.

 Shuni oʻrinda aytish joizki, Zulfiya jahon minbarlarini koʻrgan shoira, shu bilan birga, goʻzal tarjimon ham edi. U oʻzining boy adabiy merosi, faol ijodkor sifatidagi faoliyatida oʻzbek ayollarining salohiyati naqadar yuksak ekanini koʻrsatib berdi. U latif ijodi bilan sharq ayollari qalbiga ezgulik, muhabbat va sadoqatdan saboq bera oldi.

U qoldirgan boy merosda jahon sheʼriyatidan qilingan tarjimalar oʻzbek adabiyoti xazinasidan munosib oʻrin oldi. Bu bilan, nafaqat adabiyotga, balki oʻzbek xalqining turli millatlar oʻrtasidagi xalqaro doʻstlik rishtalari, adabiy aloqalarning mustahkamlanishiga-da ulkan hissa qoʻshdi. Avlodlarga qoldirgan boy ijodiy meʼrosi yoshlarnining maʼnaviy dunyosini boyitib, maʼnan barkamol boʻlib ulgʻayishiga katta hissa qoʻshmoqda.

F.Eshimbetova