OʻZBEKISTON MAHALLASINING IQTIDORLI QIZLARI

Har bir bola iqtidor egasi boʻlib tugʻiladi. Uning iqtidorini yuzaga chiqarish esa ota-ona va maktabgacha taʼlim, umumiy oʻrta taʼlim muassasalari xodimlari zimmasidadir. Bolalarning ilmli, aqlli va yetuk boʻlib voyaga yetishi jamiyat taraqqiyoti uchun ham zarurdir. Shuning uchun oʻqituvchi-murabbiylar iqtidorli oʻquvchilarni aniqlashi, ularni shu yoʻnalishda rivojlantirishi, uni yuzaga chiqarishga intilmogʻi lozim.

Buningdek sharafli vazifani ado etish yoʻlida harakat qilayotgan Amudaryo tumanidagi 44-sonli maktab oʻqituvchilari koʻpgina yutuqlarga erishmoqdalar.

Muassasa binosi quvvati 464 nafar oʻquvchi oʻrniga moʻljallangan boʻlib, hozirda 495 nafar oʻquvchilarga 46 nafar oʻqituvchilar taʼlim-tarbiya berishmoqda. Ularning 12 nafari kasb malakasiga koʻra oylik ustamaga ega.

“Taraqqiyot koʻzgusi” gazetasi tahririyati amalga oshirayotgan “Bilimli va maʼnaviyatli yoshlar bilan – Uchinchi Renessans sari” grant loyihasi ish rejasiga muvofiq ularning bir guruhi bilan yaqindan tanishdik.

Maktabning 11-sinf oʻquvchisi Rayhon Nazarboyeva iqtidorli, intiluvchan, umidli yoshlaridan biri. U aʼlo xulqi, fan asoslarini puxta egallayotganidan oʻqituvchilarning eʼtiboriga tushgan. Shu boisdan ular Rayhon bilan darsdan tashqari alohida ham shugʻullanishadi va dars mashgʻulotlari davomida olgan bilimlarini mustahkamlaydilar.

Rayhon badiiy kitoblar oʻqishni ham yaxshi koʻradi. U “Yosh kitobxon” koʻrik-tanlovining quyi bosqichlarida gʻolib boʻlib, tuman bosqichida ishtirok etdi va faxrli ikkinchi oʻrinni egalladi. Asosiy fanlar olimpiadasining tuman bosqichida ona tili va adabiyot fanidan ishtirok etib, qayd etgan natijalariga koʻra, kuchli oʻntalikka kirdi.

Rayhon Nazarboyevaning oʻz kelajagi uchun belgilagan orzulari yuksak -boshlangʻich taʼlim oʻqituvchisi boʻlib, jajji oʻgʻil-qizlarni ilmlar dunyosi sari yetaklash, oʻqib, bilim olishga qiziqtirish, iqtidorlariga koʻra rivojlantirish.

Mazkur maktabning 2-sinf oʻquvchisi Dilnura Ahmadjonova esa aʼlo oʻqish bilan birga tuman sport maktabining gimnastika toʻgaragida badiiy gimnastika bilan shugʻullanadi. Bu jajjigina qizaloqning Oʻzbekiston mahallasidan Mangʻit shahriga qatnab, ustozi Shahodat Rajabova mashgʻulotlarida ushbu sport turini nechogʻlik yaxshi egallayotganini turli musobaqalarda erishgan natijalari yaqqol koʻrsatib turibdi.

U 2023-yilda Toshkent shahrida “Vesyolie zvyozdochki” nomli bilan 2009-2019-yillarda tugʻilgan qizlar oʻrtasida oʻtkazilgan badiiy gimnastika boʻyicha respublika ochiq turnir, Urganch shahar, Nukus shahar, Bogʻot tuman sport maktablari oʻtkazgan ochiq birinchilik musobaqalarining gʻolibi. Kelajakda sportchi boʻlishni niyat qilib mashgʻulotlarni puxta oʻzlashtirayotgan qizaloq oʻz natijalari bilan tumanimiz sport sharafini yuksaltirishni niyat qilgan.

Tuman sport maktabining gimnastika toʻgaragida badiiy gimnastika mahoratini qunt bilan oʻrganayotgan iqtidorli qizlarning biri Sevinchoy Gulimbetovadir. U 44-sonli maktabning 3-sinfida oʻqiydi. Uch yildan beri darsdan boʻsh vaqtlarida Oʻzbekistondan Mangʻitga qatnab, tuman sport maktabida murabbiy Shahodat Rajabova rahbarligidagi badiiy gimnastika guruhi mashgʻulotlarida qatnashadi.

Oʻz mahoratini oshirishga sidqidildan intilayotgan qizaloqning sportda erishgan yutuqlari koʻpchilikka ibrat boʻlgulik. Xususan, u “Sport malikalari”, “Qish ertagi” respublika musobaqalarida birinchi, ikkinchi oʻrinlarni, Beruniy tuman sport maktabi, Navoiy shahar sport maktabi, Nukus shahar 1-sonli sport maktab ochiq birinchiliklarida faxrli oʻrinlarni egalladi. 2023-yil “Vesyolie zvyozdochki” nomli respublika musobaqasida birinchi, “Yangi yil sarguzashtlari” respublika ochiq turnirida ikkinchi oʻrinni yengib oldi. Uning hisobidagi medallar shodasining 9tasi 1-oʻrin uchun berilgan.

Sevinchoy oʻzi erishayotgan gʻalabalari zamirida murabbiyi Shahodat Rajabovaning, oʻzining sport bilan shugʻullanishiga sharoit yaratib bergan ota-onasining eʼtibori, gʻamxoʻrligi borligini faxr bilan aytadi.

Orzulari osmon qadar yuksak Oʻzbekiston mahallasining bu iqtidorli qizlarining kelajagi porloq boʻlishini tilab qolamiz.

Oygul RAJABOVA.