SPORT MAKTABIMIZDA UMIDLI SPORTChILAR KAMOLGA YeTMOKDA

Butun mamlakatimizda boʻlgani kabi tumanimizda ham sportning ayniqsa, bolalar sportining ommalashuviga erishilmoqda. Buni bugungi kunda Bolalar-oʻsmirlar sport maktabida 1612 nafar  oʻquvchi-yoshlar sportning 16 turi bilan muntazam shugʻullanayotganida ham koʻrishimiz mumkin.

Oʻquvchilarning yozgi taʼtilidagi boʻsh vaqtlarini mazmunli tashkil etish maqsadida yoz faslida ham turli musobaqalar oʻtkazilib, yoshlarning sport turlariga qiziqishini oshirishga erishilmoqda. Natijada tarbiyalanuvchilar orasida musobaqalarning tuman, Qoraqalpogʻiston Respublikasi bosqichlari gʻoliblari safi tobora koʻpaymoqda. Xususan, yaqinda Nukus shahrida boʻlib oʻtgan sportning karate-do turi  boʻyicha musobaqada BOʻSM tarbiyalanuvchilaridan Azamat Qurbonboyev mutloq vaznda birinchi, Dilshod Yovmutboyev 30 kg. vaznda ikkinchi, Javohir Bahromov 25 kg. vaznda uchinchi, Qunduzoy Jamilova 40 kg. vaznda uchinchi oʻrinlarni yengib oldilar. Erishilgan natijalar murabbiy Ildar Erimmetov oʻz shogirdlari bilan muntazam va qunt bilan shugʻullanganini koʻrsatadi.

Yaqinda Qoraqalpogʻiston Respublikasi VI "Teleturnir - 2016” musobaqasining kurash turi tumanimizdagi BOʻSMda oʻtkazilganligi ham bejiz emas. Chunki bizning tumanimizda milliy sport turi – kurash boʻyicha koʻpgina nufuzli musobaqalarda qatnashib, yutuqqa erishayotgan yosh polvonlar koʻp.

Respublikamizning barcha tumanlaridan va Nukus shahridan umidli yosh polvonlar ishtirok etgan mazkur musobaqaga Qoraqalpogʻiston Respublikasi kurash federatsiyasi vitseprezidenti Serik Jusipbekov, Qoraqalpogʻiston Respublikasi xalq taʼlimi vaziri oʻrinbosari, Bolalar sportini rivojlantirish jamgʻarmasi Qoraqalpogʻiston boʻlimi ijrochi direktori Sansizboy Safarniyozovlar qatnashib, oʻsmir-yoshlarning bellashuvini qiziqib tomosha qildilar.

Shuningdek, "Mahallamiz pahlavonlari” musobaqasining Qoraqalpogʻiston Respublikasi bosqichida BOʻSM oʻquvchi-yoshlaridan Xursand Joʻlliboyev birinchi, Sapura Bobojonova esa ikkinchi oʻrinlarni yengib oldilar.

Xursand Joʻlliboyev 27-iyul kuni Oʻzbekiston Respublikasi "Yoshlik” jismoniy tarbiya va sport jamiyati Markaziy kengashi birinchiligida ham birinchi oʻrinni  egallab, chempion boʻlib qaytdi. Yana bir tarbiyalanuvchimiz Karamaddin Oʻrozboyev esa mazkur musobaqada ikkinchi oʻrinni zabt etdi.

Shu yilning 29-30 iyul kunlari sportning karate-do turi boʻyicha Nukus shahrida boʻlib oʻtgan Bolalar-oʻsmirlar sport maktabi ochiq birinchiligida Quvonchbek Safarboyev ikkinchi, Ulugʻbek Otajonov uchinchi, Nursulton Yerdoshev uchinchi oʻrinlarni yengib olishdi.

Shuningdek, 29-30 iyul kunlarida oʻtkazilgan Nukus shahri 2-sonli Bolalar-oʻsmirlar sport maktabi ochiq birinchiligida bizning tarbiyalanuvchilarimizdan oʻz vazn toifalarida  Alibek Rajabboyev birinchi, Temur Shomurodov birinchi, Otajon Komilov ikkinchi, Faxriddin Xidirboyev ikkinchi, Lochin Qurbonboyev uchinchi, Javohir Rajabov uchinchi, Odilbek Bozorboyev uchinchi, Samir Nazirboyev uchinchi oʻrinlarni egalladilar.

Sport maktab tarbiyalanuvchilarining oʻzlari shugʻullanayotgan sport turiga qiziqishlarini oshirish  maqsadida turli tadbirlar – sport ustalari, faxriylari bilan  uchrashuvlar, "Ochiq darslar” oʻtkazib turamiz. Murabbiylar bilan tarbiyalanuvchilar orasida doʻstona munosabat oʻrnatilganligi mashgʻulotlar yanada samarali  boʻlishiga xizmat qilayotir. Maqsadimiz esa – bolalarni sport maktabimizga koʻproq jalb qilish, tumanimiz sport sharafini yuqori koʻtaruvchi sportchilarni kamolga yetkazishdir.

Chorsham TAJIMURODOV,

BOʻSM direktori, xalqaro toifadagi hakam.