Istiqlol ilhomlari

TABRIK

Esganda orombaxsh yurtim shamoli,

Qoʻlga qalam ol, der koʻrkam zamoni,

Jahonni lol etgan koʻrki-kamoli,

Elni el qilganlar doim sogʻ boʻlsin!

 

Bugun yurt aʼlodir Eram bogʻidan,

Doʻstlar qoʻllab turar soʻl-u sogʻidan,

Qoʻshiq yangratib yurt hamma yogʻidan

Madhin kuylaganlar doim sogʻ boʻlsin!

 

Yigitlari alpdir, qizlari sanam,

Ular kamol topgan makoni shinam,

Taʼrifin yozmoqqa shoshilar qalam,

Baxtdan sheʼr aytganlar doim sogʻ boʻlsin!

 

Ulkan, ahil davlat koʻtarmoqda qad,

Jahonda yagona boʻlmoqdir maqsad,

Bunda har fuqaro dehqonga madad,

Madadkor boʻlganlar doim sogʻ boʻlsin!

 

Hormay-tolmay borar elim karvoni,

Qolmagay hech kimning dilda armoni,

Yozilar olqishlab shoir dostoni,

Dostonga loyiqlar doim sogʻ boʻlsin!

 

Oʻzni yurt ishiga bogʻlasak agar,

Toʻgʻri yoʻl koʻrsatib tursa  har rahbar,

Ne tadbir boshlasak qolmas besamar,

Yurtga bosh boʻlganlar doim sogʻ boʻlsin!

 

El ravnaqin tilab, qarimi yo yosh,

Ish boshlar hali yuz koʻrsatmay quyosh,

Elim, qutlugʻ boʻlsin yigirma besh yosh,

Istiqlolga yetgan hamma sogʻ boʻlsin!

Ahmad NAFASOV.

 

Vatan

Koʻnglim tugʻyonlari bebosh boladay,

Seni madh etmoqqa undaydi Vatan!

Yuragim qaʼrida ungan loladay,

Ifori ilhomim jamlaydi Vatan!

 

Seni yorim, deymi yoki volidam,

Baribir men uchun sevimli Vatan!

Sening ishqing meni tark etmas bir dam,

Bayraming muborak, onajon Vatan!

 

Ayni kuchga toʻlgan yigitsan bugun,

Fuqarolar sen-la bir jon-u bir tan.

Senga hamroh boʻlay, yuz yoshingda ham

Mening-chun sevimli jonajon Vatan!

 

Sening madhing uchun qayrab qalamim,

Mudom maqtamoqqa tayyorman, Vatan!

Sening doʻstlaring ham doʻstimdir manim,

Sening dushmaningga agʻyorman, Vatan!

 

Farhodning sen uchun fidodir joni,

Jon bermoqqa tayyor sen uchun har dam.

Qani, boʻlsa edi shuning imkoni,

Yigitlik davrimga qaytardim, Vatan!

Farhod AVEZOV,

"Jayxun ilhomlari” NNT aʼzosi.

 

ISTIQLOL TARONALARI

Serviqor qudrat bergan,

Istiqlolga shon-sharaf!

Shon hamda shuhrat bergan,

Istiqbolga shon-sharaf!

 

Bu ajib zamonada,

Qudratli davronada.

Yuksalish pogʻonada,

Istiqlolga shon-sharaf!

 

 

Oʻzbekni oʻzbek qilgan,

Erk bergan, oʻzlik bergan.

Katta dovrugʻ keltirgan,

Istiqlolga shon-sharaf!

 

Tahsin aytib chin dildan,

Borurmiz toʻgʻri yoʻldan.

Deyman xalqim tilidan,

Istiqlolga shon-sharaf!

 

Dilsayyor der, iqbolni,

Koʻrib oʻzgacha holni.

Aytsam, qutlugʻ timsolni,

Istiqlolga shon-sharaf!

Xudoybergan

Jumamurodov.

 

JONAJON YuRTIM

(Badiha)

Alloh nazar solgan jannatmakon yurt,

Taʼrifing dunyoga bir doston boʻldi.

Bebaho neʼmating - tinchlik, ozodlik -

Ajdodlar armoni gul, chaman boʻldi!

 

Koʻzlarni quvnatar ona yurt koʻrki,

Har yonimiz chaman, gul-rayhon boʻldi.

Shukronalar aytgan keksalarimiz

Duolari ijobat bir on boʻldi.

 

Bulbul kuyi arimaydi bogʻlardan,

Bobo dehqonlaring mulkdor, xon boʻldi.

Ona xalqim qadri baland togʻlardan,

Qizing oy, oʻgʻloning zoʻr polvon boʻldi.

 

Muqaddas, tabarruk qadamjolarda,

Ahli dunyo kelib zoʻr mehmon boʻldi.

Koʻrdilar, HURLIK deb Yutboshimiz ham

Ulugʻ yoʻlda xalqaro sarbon boʻldi.

 

Vatan, desam qalbim toʻlib gʻururga,

Dil soʻzlarim sheʼrimga marjon boʻldi.

Shunday yurtda yashamoqlik oliy baxt,

Ushalgan orzularim ummon  boʻldi.

Nasiba YeShMURODOVA,

55-sonli maktab oʻqituvchisi.

 

TUPROFING TOʻTIYo

Vatan, beqiyossan har bir insonga,

Tuprogʻing hamisha koʻzimga ziyo.

Sening bahoringni sogʻinganlarga,

Bogʻlaring ifori misli moʻmiyo.

 

Sening tabiating oʻzga bir olam,

Oʻzga bir olamdir butun borligʻing,

Sayohatga chiqib kelgan har bolang,

Bosh qoʻyib oʻpadi aziz tuprogʻing.

 

Men havas qilmasman oʻzga yurtlarga,

Vatanim, tuprogʻing oʻpib yashayman,

Shukronalar aytib obod damlarga,

Barkamol avloding quchib yashayman.

Gulsara BOBOJONOVA,

73-sonli maktab.

 

BIZNING OʻLKA

Biz yashaymiz doʻstlar, shunday oʻlkada,

Aslo qiyosi yoʻq, zamin-u koʻkda.

Bogʻlari toʻladur hil-hil mevaga,

Daryolari toʻla sirli navoga.

 

Bu shunday oʻlkaki, shukrona yangrar,

Har faslida bordur goʻzal bayramlar.

Har goʻshada baxt kuyi jaranglar,

Toʻy-u tomoshaga boydur ellari.

 

Begʻubor goʻdaklar uxlar beshikda,

Baxtiyor onalar aytadi alla.

Toʻyga tadorik bor har bir eshikda ,

Tinchlik tantanasi, har bir qadamda.

 

Oh, naqadar totli bu goʻzal damlar.

Baxtdan bahs etar nurafshon onlar.

Osmonni toʻldirgan yorugʻ yulduzlar,

Mangu boʻlsin doʻstlar, davr-u davronlar.

Inobat OTAJONOVA,

"Jayxun ilhomlari” NNT aʼzosi.

 

 

ULUFIM VATAN!

Vatan, sendan ayro boʻlgim kelmaydi,

Qayda boʻlmay, suratlaring koʻzimda.

Qanchalar sevsam-da koʻnglim toʻlmaydi,

Umrim senga berib, oʻtay taʼzimda.

 

Azim daryolaring, soʻlim bogʻlaring ,

Purviqor togʻlaring quchgim keladi.

Yalang oyoqlarim oʻpgan tuprogʻing,

Hovuchlab yuzimga surtgim keladi.

 

Toʻrt fasl, kun-u tun dalalaringda,

Bobodehqoningga hamroz-u hamroh.

Qurtlar ipak sochgan pallalaringda

Seni qoʻllab turar yaratgan Alloh.

 

Musaffo osmoning nurdan yaralgan,

Nurlarga qorishib uchgim keladi.

Onamday, otamday suyuksan Vatan,

Bolajon bagʻringda yotgim keladi.

 

Yakka-yu yagonam, ulugʻim - Vatan,

Barcha imkonlarga toʻlugʻim Vatan!

Nodira YaNGIBOYeVA.

 

MAHALLAM

"Qoramon” mahallasi,

Dur, gavharning shodasi.

Shu obod mahallaning

Biz baxtiyor bolasi.

Goʻzal Vatan quchogʻida,

Bunyod boʻldi mahallam.

Mustaqillik yillarida,

Obod boʻldi mahallam.

Fayziyob dalalarda,

Mehnat qilar dehqonlar.

Handalak, qovun, tarvuz,

Xalqimiz uchun rizq-roʻz.

Yam-yashil bogʻlaridan,

Ketmaydi aslo bahor.

Chamanzor gulzoridan,

Vatanga sochar ifor.

Fazilat Ollaberganova,

53-sonli maktab.

 

MUSTAQILLIK BAYRAMI

Bu kun ulugʻ kundir, unutilmas kun,

Tarix chehrasida porlar quyoshing.

Istiqlol bayrami muborak bugun,

Seni qutlar bugun keksa-yu yoshing.

 

Shukurkim, yetkazdi ulugʻ kunlarga,

Vatanim ozodlik bagʻrida yashar.

Bayramning shukuhi har bir yurakda,

Mangu mustaqillik senga yarashar.

 

Shundayin quvonchlar, shundayin gʻurur,

Buyuk ajdodlarim ruhi mangu yor.

Qancha faxrlansam arziydi axir,

Sening nomingga men bitaman ashʼor.

 

Mustaqillik abadiy, mangusan endi,

Har bitta qadamni tashlaymiz erkin.

Oldimizda turar nurli kelajak,

Ulgʻayib, yurtga bosh boʻlamiz bir kun!

Umida ABDULLAYeVA,

Amudaryo akademik litseyi oʻquvchisi.

 

Sajdagohim, panohim mening

Sen qalblarga quvonch berguvchi,

Sen barchani bolam deguvchi.

Sen dunyoni birdek sevguvchi,

Jannatmakon yurtimsan Vatan,

Senga fido, bu jon ila tan.

 

 

Tuprogʻingda unib-oʻsyapman,

Yosh niholman, suving ichyapman.

Senga jonim fido, deyapman,

Oʻxshashi yoʻq makonim mening,

Sajdagohim, panohim mening.

 

 

Seni desam, issiq quchogʻing,

Yuragimga oʻt yoqib turar.

Bulbullarni sayratgan bogʻing,

Jonga orom baxsh yetib turar,

Seni desam, bu olam kular.

Dildora RAJABOVA,

Amudaryo qishloq xoʻjalik

kasb-hunar kolleji oʻquvchisi.

 

HUR OʻZBEKISTON

Men tugʻilgan muqaddas diyor,

Bu hur Vatan – Oʻzbekistondir.

Kindik qonim toʻkilgan tuproq,

Boylikka kon ulugʻ makondir,

Aziz Vatan – Oʻzbekistondir!

 

Dehqonlari tinmay ter toʻkar,

Yetishtirar paxta-yu gʻalla.

Bogʻlarida olma-anorlar,

Bozorlari toʻkin dasturxon,

Aziz Vatan, hur Oʻzbekiston!

 

Polizlarda handalak pishgan,

Keksa-yu yosh ogʻziga tushgan.

Bu rizqi moʻl muqaddas Vatan,

Allohimning nazari tushgan

Bu hur diyor – Oʻzbekistondir.

 

Yuksalaver, jonajon oʻlkam,

Ey obod yurt, farovon Vatan!

 

Aziza OʻROZBOYeVA,

32-sonli maktab oʻquvchisi.

 

VATAN MEHRI

Bu buyuk yurt farzandi,

Osmonlarga talpinar.

Mard oʻgʻloni, dilbandi,

Davronlarga talpinar.

 

Orzularning bogʻida,

Unib-oʻsgan niholman.

Kurashlarning togʻida,

Eng yengilmas bolangman.

 

Yurak yonar ishq sabab,

Baxtdan bedor kunlarim.

Vatan sergak, yurt chorlar,

Nur belangan yoʻllarim.

 

Muhabbatning bagʻrida,

Ruhim oydin, pokiza.

Kel doʻstim, yurt mehriga,

Sodiq yasha hamisha!

 

Oʻzbekiston farzandi

Osmonlarga talpinar.

Mard oʻgʻloni, dilbandi

Davronlarga talpinar.

Shahzod Anvar oʻgʻli.

 

KOʻRING BUGUN, OʻZBEKISTONNI!

(Bagʻishlov)

Gulzor  oʻlkam, guliston oʻlkam,

Oʻzbegim boʻlmas hech kimdan kam.

Zavol  koʻrmay yasharmiz har dam!

Asl Oʻzbek qiziman men ham,

Lahza ayro boʻlmasman sendan.

 

Va hech qachon oʻchmasin noming,

Asragaymiz shavkat-u shoning.

 

Bagʻri kengsan, ey Ona Yurtim,

Er-osmoning bepoyon sening.

Toʻmarisning yoʻlidan yurdim,

Ajdodlarim qoʻllaydi meni.

Komil  bugun har  bir farzanding,

Ravnaqingga qoʻshajak hissa.

Olamga mashhur Samarqanding,

Registon maydoni – bir qissa.

Imon-diyonatli xalqsan sen,

Mustaqil, hur Oʻzbekistonim!

Sening jajji, bir gʻunchangman men,

Abadiy gulla, gulistonim,

Nurga toʻla bogʻ-u boʻstonim!   

 

Men ham bir  kun boʻlaman katta,

Ulugʻlayman har qarich ering.

Qadrlayman seni albatta,

Allalagan onamsan mening.

Dunyo tan oldi bugun bizni,

Dunyo lol Oʻzbek yoshlariga,

Albatta, hayrat nuri yogʻilgay,

Sururbaxsh toʻy-u oshlariga.

 

Viqor-la  turadi togʻlaring,

Alvon lolalaring ochilar.

Togʻ yonida soʻlim bogʻlaring,

Ajib guldan ifor sochilar.

Navolaring sehrli biram,

Insoniyat  qalbin zabt etar,

Mustaqillik koʻklarga yetar.

 

Jonim qurbon boʻlsin oʻzingga,

O, ona yurt, goʻzal diyorim.

Ne tong, aslo oʻchmas yurakdan:

"Istiqlol yashasin!” - shiorim,

Millatim nomus-u orim!

 

Sportda ham, ilm-fanda ham

Engilmas qudratga aylanding.

Noming ila barcha qalblarga

Goʻzal Vatan  hissini solding.

Alloh seni asrasin har dam.

 

Farzandlarim kam boʻlmasin, deb,

Imkoniyat eshigin ochding.

Dorilomon kunlar koʻrsin, deb,

Olamga mehr nurini sochding.

 

Oʻzbeklar doim oʻziga bek,

Zamon bilan hamnafasdir lek,

Bugun Oʻzbek oʻzgardi tubdan, 

Elib oʻtar, Ovroʻpadan ham!

Koʻring bugun, Oʻzbekistonni,

Istiqlol quchgan gulistonni.

Sportdagi buyuk qudratingga,

Tan bermoqda jumlai-jahon.

Olam aro oʻchmasin noming,

Noz-neʼmatga toʻlar xirmoning.

Islom bobo, sizga ming rahmat,

Mustaqillik boʻlsin, to abad! 

Iroda Yerdosheva, 

38-sonli maktab oʻquvchisi.

 

OSTONASI OLTIN KOShONAM

Bugun baland tutib qaddingni,

Tinchlik, deya dunyoga boqding.

Yuksaltirib shaʼn-u qadringni

Har dilda erk olovin yoqding.

 

Husning hamma eldan suluvroq,

Kundan-kunga ochasan chiroy.

Bormi menga sendan ulugʻroq.

Vatan, oʻzing zamin uzra oy.

 

Sen otamsan, mehribon onam,

Porlab turgan oy-u quyoshim.

Ostonasi oltin koshonam –

Baxt berguvchi gʻamxoʻr yoʻldoshim!

Dinora KARIMBOYeVA,

Amudaryo akademik litseyi oʻquvchisi.

 

BETAKRORIM, BAXTIMSAN

Vatan, mening taxtimsan,

Osmonimsan bepoyon.

Quyoshimsan porlagan,

Betakrorim, baxtimsan.

Koʻzlarimning qorasi,

Qalbimning durdonasi.

Kindik qonim tomgan yer -