ENG ULUGʻ, ENG AZIZ AYYoM ShUKUHI

Kun oʻtgani sari xalqimizning azaliy orzulari ushalgan, Oʻzbekistonimiz mustaqillikka erishgan tarixiy sana - 1-sentyabr ham tobora yaqinlashmoqda. Yurtimizda har yili bu eng ulugʻ, eng aziz ayyomni katta tayyorgarlik, katta taraddud bilan kutib olish ezgu anʼanaga aylangan. 2013-yil 12-iyun kuni qabul qilingan Oʻzbekiston Respublikasi Prezidentining «Oʻzbekiston Respublikasi davlat mustaqilligining yigirma ikki yillik bayramiga tayyorgarlik koʻrish va uni oʻtkazish toʻgʻrisida»gi Qarori bu ishlarni yangi bosqichga koʻtaradigan hujjat boʻldi.

Qarorda taʼkidlanganidek, xalqimiz bu yil Oʻzbekiston davlat mustaqilligining yigirma ikki yillik toʻyini katta tantana, shodu xurramlik bilan keng nishonlaydi. Haqiqatan ham, umummilliy bayramimiz boʻlgan bu qutlugʻ sana haqida soʻz borar ekan, oʻtgan davr mobaynida bosib oʻtgan yoʻlimizni, amalga oshirgan ishlarimizni xolisona sarhisob qilib, bugungi yutuq va marralarga avvalo qanday ogʻir va mashaqqatli mehnat evaziga erishganimizni yana va yana bir bor koʻz oʻngimizdan oʻtkazishimiz tabiiydir.

Bugun yurtimizdagi tinchlik va osoyishtalik, totuvlik va hamjihatlik, taraqqiyot va farovonlikni koʻrgan kishi bunday yutuqlar tarixan qisqa davr ichida qoʻlga kiritilganiga hayrat bilan qaraydi. Har yili bu qutlugʻ ayyom yaqinlashar ekan, mustaqilligimiz tobora mustahkamlanib, yurtimiz obod, xalqimiz turmushi farovon boʻlib borayotganini koʻrib, Yaratganga shukronalar aytamiz.

Yurtimizning har bir fuqarosi qatori men ham Mustaqillik bayramini munosib tarzda kutib olish va oʻtkazish maqsadida qabul qilingan Yurtboshimizning yuqoridagi Qarorini katta hayajon bilan oʻqib chiqdim. "Qadr-qimmatim, tayanchim va iftixorimsan, mustaqil Oʻzbekiston!” degan shiorni asosiy gʻoya sifatida oʻzida mujassam etgan holda yurtimizning har bir goʻshasi – shahar va qishloqlarda, ovul va mahallalarda uyushqoqlik bilan, koʻtarinki ruhda oʻtkaziladigan tashkiliy-amaliy, madaniy-maʼnaviy tadbirlar hamda targʻibot-tashviqot ishlarida ham deputat sifatida, ham shu elning farzandi sifatida faol qatnashishim lozimligini yurakdan his qildim.

Haqiqatdan ham, xalqimizda toʻyga toʻyona bilan borishdek ajoyib udum bor. Mustaqillik bayramimizni katta yutuqlar bilan kutib olish har birimizga yarashadi. Shunday ekan, keling, azizlar hammamiz bir yoqadan bosh chiqarib, tumanimizning barcha hududlarini - mahalla va guzarlarimiz, koʻp qavatli uylar, oʻzimiz mehnat qilayotgan, oʻzimiz yashayotgan maskanni toza va ozoda, koʻrkam va obod maskanga aylantiraylik! Zero, eng ulugʻ, eng aziz bayramimizni munosib kutib olish, qadr-qimmatimiz, tayanchimiz va iftixorimiz boʻlmish mustaqil Vatanimizning rivojiga hissa qoʻshish har birimiz uchun sharafli vazifadir.

Hayitgul ALLAKOVA,

xalq deputatlari tuman Kengashi deputati,

Kengashning reglament va deputatlik odobi masalalari boʻyicha doimiy komissiyasi raisi.

(Foto - http://xs.uz)