“Obod turmush yili“ yangiliklari

Kollektorlar rekonstruktsiya qilinmoqda

Hozirgi kunda tumanimizda 39584 gektar sugʻoriladigan maydon mavjud boʻlib, bu maydonlarga jami 1578.4 km. uzunlikdagi kollektor drenaj tarmoqlari xizmat qiladi. Shundan 290.8 kilometrini xoʻjaliklararo kollektorlar, 1287.6 kilometrini esa ichki xoʻjalik kollektorlari tashkil etadi.

2013-yilda tumanimizda 14.5 km. uzunlikdagi "K-10” kollektorini rekonstruktsiya qilish ishlari rejalashtirilib, shundan 6.4 km qismida rekonstruktsiya ishlari tugallandi. Bu ishlarga 383 mln. soʻmlik mablagʻ sarflandi.

Ayni kunda "K-10” kollektori rekonstruktsiya ishlarida 4 ta ekskavator va 2 ta buldozer qatnashmoqda.

"K-10” kollektorining qolgan 8.1 kmlik. qismida ham rekonstruktsiya ishlarini amalga oshirish maqsadida loyiha hujjatlari tayyorlanmoqda.

Mijozlari koʻp usta

"Choykoʻl” qishlogʻida uy mehnati va oilaviy tadbirkorlik bilan shugʻullanuvchilar koʻpchilikni tashkil etadi. Duradgor usta Komiljon Qoʻchqorov ana shunday tadbirkorlardan. Otasi Usta Qoʻchqordan duradgorlik sirlarini puxta oʻrgangan Komiljon Qoʻchqorov bugun bu hunarni oʻz farzandlariga, qishloq yoshlariga oʻrgatmoqda.

- Moʻl daromad topaman, degan odamga qishlogʻimizda imkoniyat koʻp, - deydi u.

Haqiqatan ham har yili ovuldagi yakka tartibda imorat quruvchilar yangi uy-joylarining, poli, deraza romlari, eshik va darvozasi, shiftidan tortib tomini shifer bilanyopishgacha boʻlgan ustakorlik ishlarini Komiljon ustaga ishlatish uchun navbat talashishlari bejizga emas. Chunki Komiljon ustaning qoʻlidan chiqqan har bir ish sanʼat darajasida nafis, chiroy va mustahkamligi bilan ajralib turadi.

Farzandlari, yaqinlariga, ovul yoshlariga ustoz-shogird anʼanasiga muvofiq kasb-kor oʻrgatib, oilasi uchun moʻl daromad totib, koʻngli xotirjam, turmushi obod yashayotgan Komiljon usta va uning shogirdlari ayni kunlarda ham qishloqdagi yangi imoratlar qurishida mehnat qilishmoqda.

Yoʻllarimiz ravon boʻladi

"Obod turmush yili”da tumanimizda ichki xoʻjalik yoʻllarini taʼmirlash va qayta qurish ishlariga alohida eʼtibor berilmoqda.

Hozirgi kunda tumanimizdagi Amir Temur nomli, "Oʻrta qalʼa” va Qipchoq ovullaridagi 4.670 km. uzunlikdagi yoʻllarni qurish va taʼmirlash ishlari jadal olib borilmoqda.

Tender bahosi 426.913 ming soʻm boʻlgan bu qurilish ishlari tuman yoʻl xoʻjaligi, pudrat, taʼmirlash, foydalanish davlat korxonasi tomonidan amalga oshirilmoqda.

Suv tarmoqlari qurilmoqda

Ayni paytda tumanimizda shahar va qishloq aholisiga toza ichimlik suvi yetkazib berishni yanada yaxshilash maqsadida suv tarmoqlari qurilishi ishlari qizgʻin davom etmoqda.

2013-yilda tumanimizda jami 52.4 km. uzunlikdagi suv tarmoqlarini qurib bitkazish rejalashtirilgan boʻlib, bu ishlarga 32844.2 million soʻmlik mablagʻ ajratilmoqda.

Ichimlik suv tarmoqlari qurilishi "Keramika qurilish” MChJ, «Amudaryo QM» MChJ va "Amudaryo qurilish” MChJ quruvchilari tomonidan amalga oshirilmoqda.

Moʻl hosildan nishona

Bu yil tumanimiz boʻyicha 16050 gektar maydonga chigit ekilib, dalalarda toʻliq nihol undirishga erishildi. Paxtakor dehqonlarimiz bu yilning bahor oylaridagi tabiat injiqliklarini mardonavor yengib, unib chiqqan har bir tup gʻoʻza niholini saqlab qolishga harakat qildilar. Bu borada qilingan fidokorona mehnatlar zoye ketmadi.

Hozirgi kunda 255 ta fermer xoʻjaliklari va 6 ta yordamchi xoʻjaliklar dalalarida ekilgan gʻoʻzalar yaxshi parvarish natijasida rivojlanish fazasiga kirdi.

Shu kungacha tumanimiz boʻyicha barcha dalalardagi gʻoʻzalar bir marta toʻliq oziqlantirildi, 4-5-marta qator oralariga ishlov berildi. 5000 gektar maydondagi gʻoʻza qondirib sugʻorildi.

Gʻoʻza qator oralariga ishlov berishda 361 ta kultivator agregatlari betoʻxtov ishlatilmoqda.

Shunisi quvonchliki, tumanimizning 9000 gektarga yaqin maydonidagi gʻoʻzalar yoppasiga gullab, moʻl hosil toʻplanayotganidan darak berib turibdi.

Basketbolchilar musobaqasi

Shu yilning 25-iyun kuni 7-sonli umumtaʼlim maktabi sport zalida "26-iyun – Xalqaro giyohvandlikka qarshi kurash kuni”ga bagʻishlanib sportning basketbol turi boʻyicha 1-sonli BOʻSM ochiq birinchiligi oʻtkazildi.

Ushbu sport musobaqalarida 8 ta jamoa – 2 ta qizlar jamoasi va 6 ta oʻgʻil bolalar jamoalari kuch sinashdilar.

Sportning basketbol turi boʻyicha 1-BOʻSM ochiq birinchiligi uchun oʻtkazilgan musobaqalarda qizlar jamoalaridan Xoʻjayli shahri qizlari 1-oʻrinni, 1-sonli BOʻSMda sport bilan shugʻullanuvchi 7-sonli umumtaʼlim maktabi qizlari 2-oʻrinni egallashga muvaffaq boʻldilar.

Basketbolchi yigitlar oʻrtasidagi bellashuvlarda Amudaryo akademik litseyi jamoasi 1-oʻrinni, 7-sonli umumtaʼlim maktabi jamoasi 2-oʻrinni va 33-sonli maktab jamoasi 3-oʻrinni qoʻlga kiritdilar.

Basketbol oʻyini musobaqalari yakunida gʻolib jamoalar 1-sonli BOʻSM faxriy yorliqlari va qimmatbaho sovgʻalari bilan taqdirlandilar.

Oʻsimliklar himoyasi kuchaytirilmoqda

Ayni kunda tumanimizda oʻsimliklar zararkunandalari, kasallik va begona oʻtlarga qarshi kurashishni yanada kuchaytirish maqsadida bir qancha ishlar amalga oshirilmoqda. Shu maqsadda tuman oʻsimliklarni himoya qilish otryadi tomonidan 2013 yid uchun maxsus ish dasturi ishlab chiqildi va bu dastur tuman hokimi qarori bilan tasdiqlandi.

Dasturda paxtachilikda qoʻllash uchun 129 kg. trixogramma, 59.0 million dona brakon , 59.0 million dona oltinkoʻz ishlab chiqarish rejalashtirigan edi. Hozirgi kunda tumandagi barcha biolaboratoriyalarda bunday biomahsulotlarni tayyorlash ishlari tezkorlik bilan olib borilmoqda.

Shu kungacha profilaktika maqsadida ekin maydonlari atrofiga, uvatlarga, ariq-zovurlar chetlariga zarur miqdordagi trixogramma, oltinkoʻz va brakon kabi biomahsulotlar tarqatildi.

Tuman hokimining yordami bilan 16 ta biolaboratoriyaga motokolyaska olib berildi.

Hozirgi kunda tumanda qishloq xoʻjalik ekinlarini zararkunanda va kasalliklardan himoya qilish maqsadida 160 dala nazoratchisi va 29 nafar agronom entomologlar faoliyat olib borishmoqda.

Aholiga yana bir qulaylik

Mangʻit shahri markazida, "Yangiobod” mahallasi hududida yangi maishiy xizmat koʻrsatish uyi binosi qurilishi boshlandi. Tender bahosi 429.5 million soʻm boʻlgan ushbu bino qurilishi "Mangʻit invest maksimum” MChJ quruvchilari tomonidan amalga oshirilmoqda.

Ushbu maishiy xizmat koʻrsatish uyi binosi qurilib foydalanishga topshirilgach, bu yerdagi aholi yana bir qancha qulayliklarga ega boʻladi.

Panton koʻprik mukammal taʼmirlanadi

4R181 "Qipchoq-Mangʻit sh. – Turkmaniston Respublikasi chegarasi” avtomabil yoʻlining 4-kilometrida joylashgan Qipchoq panton koʻprigini Respublika yoʻl jamgʻarmasi hisobidan kapital taʼmirlash ishlari boshlanmoqda.

Ikki bosqichda, yaʼni 2013 va 2014-yillarda amalga oshirilishi moʻljallangan bu kapital taʼmirlash ishlarining umumiy tender bahosi 5 mlrd. 108 million soʻmni tashkil etadi.

Panton koʻprigini taʼmirlash ishlari Taxiatoshdagi Qoraqalpogʻiston koʻprik xujaligini saqlashga ixtisoslashtirilgan taʼmirlash, foydalanish korxonasi tomonidan amalga oshiriladi.

Yangi uy-joylar qurilmoqda

Oʻzbekiston Respublikasi Mustaqilligining 22-yilligi bayrami arafasida tumanimizda 70 ta namunaviy loyiha asosida qurilgan uy-joylar aholi ixtiyoriga topshiriladi. Ayni kunda ushbu uy-joylar qurilishi jadal surʼatlar bilan olib borilmoqda.

Umumiy tender bahosi 8991.4 million soʻm boʻlgan bunday joylarning 42 tasi "Choykoʻl” ovulidagi "Bosu” massivida, 18 tasi Vaxum massivida, 10 tasi esa Amir Temur nomli ovulning "Taqir qalʼa” massivida qad koʻtarmoqda.

"Parvoz 2013”

Mangʻit shahrida joylashgan NDPI qoshidagi 3-sonli akademik litseyda tugallangan oʻquv yilida 700 nafardan ortiq iqtidorli ygit-qizlar 4 ta yoʻnalish boʻyicha bugungikun talabi darajasida taʼlim-tarbiya oldilar. Shularning 232 nafari litseyni muvaffaqiyatli tamomlashdi.

Shu yilning 26-iyunida bitiruvchilarga diplom topshirish marosimi – "Parvoz 2013” deya nomlangan tadbir boʻlib oʻtdi.

Tadbirni litsey direktori Otabek Yoʻldoshev ochdi va oʻquv muassasasidan uchirma boʻlayotgan polaponlarning parvozi yuksak boʻlishini tiladi. Soʻzga chiqqan bitiruvchilar 3-yil mobaynida oʻz farzandlaridek gʻamxoʻrlik qilib, taʼlim-tarbiya bergan ustozlariga minnatdorchilik bildirdilar.

Sugʻorish maromida olib borilayapti

Choykoʻldagi Nurulla Yerdoshev rahbarligidagi fermer xoʻjaligi dehqonlari joriy yilda 80 gektar paxta maydonidan 168 tonna hosil yetishtirish niyatida mehnat qilmoqdalar.

Ayni kunlarda begona oʻtlardan tozalangan paxta nihollarini sugʻorish ishlari maromida olib borilmoqda.

Xoʻjalik paxta dalalarida nihollar toʻliq va rivoji yaxshi.

Nodiraning doʻstlari koʻpaydi

83-maktab bogʻcha majmuasining 4-sinfini aʼlo baholarga tugatgan, faol oʻquvchi Nodira Eshimbetova Mangʻit shahrining "Olmazor” mahallasida yashaydi.

U yozgi taʼtilni bekor oʻtkazmaslik uchun Toshkentdagi "Chimyon” bolalar yozgi oromgohida boʻlib qaytdi.

Oromgohda oʻz tengqurlari bilan turli sport musobaqalari va tanlovlarda faol ishtirok etib koʻplab doʻstlar orttirgan Nodiraning oromgohda bolajonlar uchun yaratilgan sharoitlardan quvonchli cheksiz.