Xotira turniri oʻtkazildi

29-yanvar kuni 3-sonli Amudaryo akademik litseyi sport zalida Rajapboy Yoʻldashev xotirasiga bagʻishlanib, sportning karate turi boʻyicha oʻtkazilgan ochiq turnir yaxshilar yodi abadiy boʻlishini barchamizga yana bir bor eslatdi.

Rajapboy Yoʻldashev! Uning samimiylik yogʻilib turadigan nurli siymosi tumanimiz xalqi xotirasida bir umr yashaydi. Shu el tinch-osoyishtaligi, farovonligi uchun huzur-halovat bilmay mehnat qilib, tumanimizni mamlakatimizda ijtimoiy, iqtisodiy, maʼnaviy-maʼrifiy, madaniy va boshqa sohalarda oʻz oʻrniga, nufuziga ega hududga aylantirdi. Qatʼiyatli, oʻziga va atrofidagilarga nisbatan oʻta talabchan, izlanuvchan, xalqqa gʻamxoʻr, har qanday holatda ham odamlar bilan til topisha oladigan bagʻrikeng, sogʻligi yomon boʻlishiga qaramay, hayotining soʻnggi kunlarida ham xalq gʻami bilan yashab, Amudaryo ustiga zamonaviy temir-beton konstruktsiyali koʻprik qurish loyihasini kelgusi yillarning manzilli dasturiga kiritishga muvaffaq boʻlgan bu fidoyi inson taʼbir joiz boʻlsa, oʻz mehnatlari bilan oʻziga juda mahobatli haykal qoʻyib ketdi, desak mubolagʻa boʻlmas.

3-sonli Amudaryo akademik litseyining kirish foyesiga tumanimizning sobiq rahbari, hurmatli Rajapboy Yoʻldashev mehnat faoliyatining turli yillarida olingan suratlari joy olganstendlar oʻrnatilgan, katta ekranli televizorda xotira lavhalar namoyish etilib, tashrif buyuruvchilar uning hayoti va mehnat faoliyati bilan tanishtirilmoqda.

Ochiq xotira turniri mehmonlari – Qoraqalpogʻistonda karate sportini rivojlantirish maqsadida Oʻzbekiston karate Federatsiyasi bilan tuzilgan shartnoma asosida kelgan yaponiyalik mutaxassis, qorabelbogʻ 2-DAN sohibasi Oriso Kitamuri, Qoraqalpogʻiston karate Federatsiyasi raisi Rustam Kazakov, Federatsiya mutaxassislari, Xorazm viloyati karate Federatsiyasi raisi Sheripboy Sapoyev va tuman hokimligi vakillari litsey ostonasida non-tuz bilan qarshi olindi.

Ochiq xotira turnirini tuman hokimi oʻrinbosari M.Temirboyev ochdi.

Tumanimiz karate sporti bilan shugʻullanuvchi turli yoshdagi, vazndagi oʻquvchi-yoshlar, Qoraqalpogʻiston Respublikasining turli tumanlaridan, Nukusdan va Xorazm viloyatidan tashrif buyurgan karatechilar ishtirokidagi musobaqalar nihoyatda keskin va qiziqarli boʻldi.

– Bizni musobaqaga tayyorlash jarayonida murabbiylarimiz Amudaryo tumani hokimi Rajapboy Yoʻldashev oʻquvchi-yoshlarga juda gʻamxoʻr va oqil rahbar boʻlganligini taʼkidlab, uning hayot yoʻli bilan tanishtirishdi. Shuning uchun turnirga zimmamizga ulkan masʼuliyatni his qilgan holda keldik va birinchi, ikkinchi oʻrinlarni egalladik, – deydi nukuslik mohir karatechilar Dilnoza Karamaddinova, Durdona Oymurzayeva, Asal Davletovalar.

– Mening Mangʻitga ikkinchi marta kelishim. Aslida Oʻzbekiston Respublikasi karate Federatsiyasi taklifiga binoan karate boʻyicha Tokioda boʻladigan olimpiadaga qoraqalpogʻistonlik ishtirokchilarni tayyorlash uchun kelganman. Bugungi ochiq xotira turnirining ilk lahzalaridayoq Qoraqalpogʻistonda karate ommalashib, bolalarning mahorati ancha oshib qolganligiga guvoh boʻlib, quvondim, - deydi yaponiyalik mutaxassis Oriso Kitamuri.

Tumanimizda sportning karate turi rivojlanishiga ulkan xizmat qilgan murabbiy, xotira turniri tashkilotchilaridan biri Ilhom Erimmetov:

– Bugungi xotira turnirida tumanimiz yoshlarining gʻoliblik uchun intilishida ulkan maʼno bor. Chunki tumanimizning sobiq hokimi Rajapboy Yoʻldashev shu eldagi katta-yu kichikning birday hurmat-ehtiromiga sazovor inson edi, – deydi faxr bilan.

Bellashuvlar tobora qizgʻin tus oldi.

Xotira turniri gʻoliblariga medallar, turnir tashkilotchilarining Faxriy yorliqlari, esdalik sovgʻalari topshirildi.

Taqdirlash marosimida tuman hokimi S.Yoʻldashev ishtirok etdi va gʻoliblarni qizgʻin qutladi.

Oygul RAJABOVA.

M.ShOMURODOV olgan surat.