EZGULIK YOʻLIDAGI OʻZGARIShLAR
Yaqinda qoʻshni kelinchak endigina chillasidan chiqqan chaqalogʻining isitmasi chiqib, tinmay yigʻlayotganini aytib, qanday yoʻl tutish borasida maslahat soʻradi.
Bechora yosh ona nima qilarini bilmas, qoʻlidagi chaqaloq esa xarxashasini qoʻymasdi. Peshonasiga qoʻlimni qoʻyib koʻrsam, harorati yuqori ekanligi bilinib turardi.
Men darrov ovulimizdagi faoliyati tugatilgan "Toʻlqin” QVP binosida ish boshlagan tuman Tibbiyot birlashmasi "Tez tibbiy yordam” boʻlimining shoxobchasiga qoʻngʻiroq qilishni maslahat berdim. Kelinchak shunday qildi. Hademay shoxobcha xodimlari yetib kelishdi. Chaqaloqni obdon tekshirib, tibbiy yordam koʻrsatishdi. Ancha oʻziga kelib qolgach, onasiga bolani shamollatib qoʻyganini aytib, davolatishi lozimligini taʼkidlab, parvarishlash borasida maslahatlar berib ketishdi.
Chaqaloq muolajadan soʻng joni orom topib, tinchlanib qoldi. Uning bir maromda nafas olib, qoʻl-oyoqlarini oʻynatib yotganini koʻrib, biz ham yengil nafas oldik. Yaxshiyam ovul aholisining baxtiga "Tez tibbiy yordam” boʻlimi shoxobchasi bor. Axir sogʻligʻida muammo tugʻilgan odam tuman markaziga borib, tuman Tibbiyot birlashmasiga murojaat qilgunicha oradan ancha vaqt oʻtib ketadi-da.
Shu boisdan ham "Toʻlqin” qishloq vrachlik punkti faoliyati tugatilayotgan vaqtda biroz tashvishga tushgan ham edik. Koʻp oʻtmay tashvishimiz oʻrinsiz ekanligini angladik. Albatta, sohada amalga oshirilgan oʻzgarishlar yaʼni QVPlar oʻrnida "Tez tibbiy yordam” boʻlimi shoxobchalari, koʻptarmoqli oilaviy poliklinikalar tashkil etilgani tibbiy xizmat koʻrsatish sifatini yaxshilashga xizmat qilayotir.
Umuman, barcha sohalarda ham amalga oshirilayotgan islohotlar insonlar manfaatlari uchun, ularning baxtiyor va farovon yashashlari uchun ekanligini hayotning oʻzi koʻrsatib turibdi.
Jongil RAJABOVA, taʼlim faxriysi.
(Foto - http://www.medicalexpress.uz)
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
