YuKSAK XIRMON YaRATISh TARADDUDI

Paxta – boyligimiz, gʻururimiz, deyishning oʻzi har birimizning qalbimizga zavq, shu bilan birga xotirjamlik bagʻishlaydi. Yigʻim-terim mavsumi xalqimizni yagona ezgu maqsad – milliy iftixorimiz boʻlgan "oq oltin”ni oʻz vaqtida yigʻishtirib olishdek xayrli yoʻlda birlashtiradi. Nafaqat paxtakor dehqonlarimiz, balki barcha soha xodimlari hamjihatlik bilan paxta yigʻim-terimi davrida oʻz oʻrinlarini dalada deb bilishadi. Ayniqsa, tumanimizning barcha hududlaridagi mahallalarda yashovchi uyushmagan aholidan iborat koʻngilli hasharchilar guruhlari tuzilib, paxtakorlarga yordam berish uchun hasharga chiqishlari anʼanaga aylangan.

Bu yilgi paxta yigʻim-terimiga har yilgidan ham puxta hozirlik koʻrildi. 507 ta fermer xoʻjaliklarida paxta yigʻim-terimini uyushqoqlik bilan tashkil etish maqsadida hududlar boʻyicha masʼul rahbarlar tayinlanib, 306 ta yigʻim-terim otryadi tashkil etildi. Fermer xoʻjaliklari ishchilari, xoʻjalik hisobidagi idora va tashkilotlar ishchi-xodimlari, uyushmagan aholidan iborat koʻngilli hasharchilar guruhlaridan tashkil topgan bu terim otryadlari tomonidan kuniga 1000-1300 tonna,  yaʼni yillik rejaning 3-4 foizi miqdorida paxta terilib, davlat xazinasiga topshirilmoqda.

Paxta yigʻim-terimida ishtirok etayotgan har bir terimchi uchun koʻngildagiday mehnat sharoiti yaratilgan. Yaʼni, terimchilarni dala boshiga olib borish va ularni terimdan soʻng oʻz vaqtida manzillariga yetkazish maqsadida zarur transport vositalari ajratildi. Dala boshida qaynatilgan suv, issiq ovqat tashkil etilib, terilgan paxtalar oʻz vaqtida tarozida tortilib, traktor aravalariga yuklanayotgani paxta nobudgarchiligining oldini olish imkonini bermoqda.

Hasharchilar uchun koʻngildagidek sharoitlar yaratib berildi. Hasharchilar yordami bilan tumanimiz dalalaridan har kuni yillik rejaning 3,20-3,25 foizi miqdorida ming tonna atrofida paxta terilayotgani har birimizning qalbimizda minnatdorchilik hissini uygʻotadi. Hasharchilarning dam olishi uchun zarur shart-sharoitlar mavjud. Bu esa ularning oʻz vaqtida dam olib, dalaga chiqishlari uchun imkon bermoqda. Bundan tashqari, hasharchilarning sogʻligi doimiy nazoratda. Hududlarga birkitilgan tibbiyot xodimlari terimchilar huzurida tez-tez boʻlishib, ularning salomatligini nazorat qilib borishadi.

Bugun – hamma paxtakor. Barchaning fikri-yodi dalalarda yetishtirilgan "oq oltin”ni yogʻin-sochinli kunlarga qoldirmay yigʻishtirib olib, davlat xazinasiga topshirishdek xayrli tashvish bilan band. Maqsadimiz – tumanimizning yuksak paxta xirmonini bunyod etib, ona Vatanimiz xazinasiga armugʻon etishdir.

Anvar Yoʻldoshev,

tuman Qishloq va suv xoʻjaligi boʻlimi boshligʻi, Qoraqalpogʻiston Respublikasi Joʻqorgʻi Kengesi deputati.

(Foto - http://uz24.uz)