Donolar suhbati

Umr daftari

Faridun farzandi uchun qogʻozga quyidagi soʻzlarni yozdi: «Hayot varaqlari kishi amalining sahifalaridir. Unga eng yaxshi ishlargina yozib qoldiriladi».

Sabrning xosiyati

Bir donishmandga ayoli faqirliklaridan shikoyat qildi. U javob berdi:

– Sabr qil. Oldinda shunday bir choʻqqi borki, unga faqat yuki yengillargina chiqa oladilar.

Kuyov tanlovi

Bir donishmandning yolgʻiz qiziga bir boy va bir nochor xonadondan sovchi kelibdi. U esa qizini kambagʻal yigitga beribdi. Doʻst-u yaqinlari:

– Nega bunday qilding? – deb tanbeh berishsa, shunday debdi:

– Badavlat yigitning esi pastroq koʻrinadi, hademay u mol-dunyosidan ajralib qolishi mumkin. Kambagʻal yigit esa aqlli va gʻayratli ekan – bunday odam sira kam boʻlmaydi.

Hasad va gʻiybat

Bir shogird ustoziga shikoyat qildi:

– Falon kishi meni koʻrolmaydi – hasadning zoʻridan tars yorilib ketay deydi.

Ustozi bunga javoban dedi:

– Xoʻsh, hasad-ku yomon ekan, lekin kim senga gʻiybat yaxshi deb aytdi?! Boshqalarni yomonlagan kishi seni ham birovga yaxshi demaydi.

(Foto - http://fikr.uz)