Obod turmush yili yangiliklari

Baynalmilal toʻy

Shu yilning 26-avgust kuni "Choykoʻl” OFYning 2 mahallasida yashovchi qozoq millatiga mansub Qurolboy Qurbonboyevning oilasida boʻlib oʻtgan kenja oʻgʻil Sardorbek va oʻzbek qizi Rohatjonlarning nikoh toʻylari bir-birlari bilan ahil-inoq qozoq, qoraqalpoq va oʻzbek millatlarining shodiyonasiga aylanib ketdi. Doʻmbira chalib aytilgan hazil-mutoyibaga boy qozoqcha, baxshiyona usuldagi oʻzbekcha va qoraqalpoqcha kelin salomlari barchani xushnud etdi. Ayniqsa, Sardorbekning chechasi – Oʻzbekiston hamda Qoraqalpogʻiston xalq artisti Gulnarmin Sirimbetova qaynisiga tabrik sifatida kuylagan qozoq, oʻzbek, qoraqalpoq xalq qoʻshiqlari toʻyxona mehmonlarining qalblarini toʻlqinlantirib yubordi.

Mahallada bayram

Mangʻit shahrining Durunki mahallasida mamlakatimiz Mustaqilligining 22-yilligi munosabati bilan "Qadr-qimmatim, tayanchim va iftixorimsan, mustaqil Vatan!” shiori ostida oʻtkazilgan tadbirda mahallada istiqomat qiluvchi barcha millat vakillari ishtirok etdilar.

- Oʻzaro ahil-inoq yashayotgan mahallamiz ahli qozoqcha, ruscha, qoraqalpoqcha va oʻzbekcha kuylarga raqs tushib, xursandchilik qilishdi, - deydi diniy maʼrifat va maʼnaviy-axloqiy tarbiya masalalari boʻyicha maslahatchi Gavhar Mingboyeva.

Yigʻim-terimga taraddud

Joriy yilda 115 gektar yerga chigit ekkan «Yusufxoʻja» fermer xoʻjaligi dehqonlari ayni kunlarda paxta yigʻim-terimiga tayyorgarlik ishlarini boshlab yuborishdi. Xoʻjalik ijarachi-dehqonlari Dilorom Rahimova va Raʼno Ramatovlar oʻzlarining qarmogʻidagi paxta dalalarida gʻoʻza chekankasini muvaffaqiyatli tamomlab, gʻoʻza qator oralarini begona oʻtlardan tozalash ishlarini oxiriga yetkazdilar.

1-sinf oʻquvchilari uchun

Yangi 2013-2014 oʻquv yilida tumanimiz maktablarining 1-sinfida 3400 nafardan ziyod bola ilk saboq olishni boshlaydilar. Ayni kunda tuman XTMFMTTEBga qarashli barcha boshlangʻich va umumtaʼlim maktablarda 148 ta sinf xonasi 1-sinf oʻquvchilarini qabul qilishga shay qilib qoʻyildi. 1-sinflarga qabul qilingan bolalarga bepul darsliklar, papkalar tarqatildi.

Innovatsion texnologiyalar-taʼlimga

Tumanimiz maktablarida 174 nafar chet tillari fan oʻqituvchilari boʻlib, ularning barchasi yangi oʻquv yilini muvaffaqiyatli boshlash maqsadida chet tili fan xonalarini yangi innovatsion texnologiyalar bilan jihozladilar. 149 nafar chet tillari fan oʻqituvchilari esa K.Ubaydullayev nomidagi Respublika pedagog xodimlarni qayta tayyorlash va malakasini oshirish institutida tahsil olib, malaka oshirib qaytishdi.