OʻQUVChI KAMOLIDA HAR BIR FANNING OʻZ OʻRNI BOR

Taʼlim muassasalari oʻqituvchilari zimmasiga yosh avlodga ilm-irfon oʻrgatish, tarbiyalash, komil insonlar qilib voyaga yetkazishdek masʼuliyatli vazifalar yuklangan. Har bir oʻqituvchi maktab ostonasiga qadam qoʻygan murgʻak bolaga oʻz farzandidek doʻstona munosabatda boʻlmogʻi va taʼlim-tarbiya bermogʻi, dars jarayonida bolalarning oʻzlashtirishini munosib baholab, yaxshi soʻzlar bilan ragʻbatlantirib bormogʻi lozim. Ularga qoʻyilgan noxolis baho yo nooʻrin tanbeh bolaning koʻnglidagi oʻrganishga boʻlgan ishtiyoqni soʻndirishi, ustozlariga ishonchsizlikni paydo qilishi mumkinligini unutmaslik kerak.

Men 7-yildan beri 31-sonli maktabda oʻquvchilarga geografiya fanidan dars berib kelaman. Oʻz mehnat faoliyatim davomida avvalo oʻquvchilarning koʻngliga yoʻl topish – dars samaradorligiga erishishning muhim sharti ekanligini anglab yetdim.

Shuningdek, taʼlimga joriy etilayotgan islohotlar, yangicha uslublar har bir oʻqituvchini eski, qotib qolgan ish uslubidan voz kechib, ijodiy izlanib, mashgʻulotlarni taʼsirchan va samarali oʻtishini taqozo etmoqda.

Geografiya – har bir oʻquvchiga oʻzi yashab turgan hududi, Vatanini tanishga, dunyo mamlakatlari haqida bilimlarni oʻrganishga xizmat qiluvchi muhim fanlardan biri boʻlganligidan uni oʻquvchilarning nechogʻlik puxta, yaxshi oʻzlashtirishlari ham ulkan ahamiyatga ega. Shu fan orqali yurtimizning jannatmakon oʻlka ekanligini, bunday iqlim, yashash uchun qulay tabiiy sharoit, yerosti va yerusti boyliklari yer kurrasining hamma hududlarida ham mavjud emasligini, dunyoning koʻpgina davlatlarida odamlar suvsizlikdan, qashshoqlikdan qiynalib yashayotganini tushuntirish oʻquvchilarda oʻz Vataniga muhabbat hissini kuchaytirishga xizmat qiladi.

Xulosa qilib aytganda, umumtaʼlim maktablarida oʻqitilayotgan har bir fanning, faoliyat yuritayotgan toʻgaraklarning oʻquvchilarning barkamol boʻlib ulgʻayshilarida muhim oʻrni bor.

Nafisa SAFARBOYeVA, 31-sonli maktab oʻqituvchisi.