MANGʻITNING YoRQIN SPORT YuLDUZI

Mamlakatimizda bolalar sportini rivojlantirishga eʼtibor tobora kuchaytirilayotgani bois, bugungi kunda yoshlar orasidan nufuzli bellashuvlarning, xalqaro musobaqalarning koʻplab gʻoliblari yetishib chiqmoqda. Eʼtibor va ragʻbat ularning qobiliyatlarini yanada rivojlantirishga va oʻz ustlarida tinimsiz shugʻullanishga undamoqda.

Sportdagi yutuqning asosi mehnat, deyishadi soha mutaxassislari. Barcha jabhalarda ham mehnatsiz muvaffaqiyatga erishib boʻlmaydi. Lekin sportning biror turiga qiziqqan oʻgʻil-qizning mahorati albatta, mashqlar davomida sayqallanishini hammamiz bilamiz.

Elyor Masharipov taniqli polvon Chorsham Tajimurodov rahbarligidagi 1-sonli Bolalar va oʻsmirlar sport maktabining dzyudo kurashi toʻgaragiga kelib, ilk mashqlarini oʻtagan davrlarida hali maktabning boshlangʻich sinfi oʻquvchisi edi.

Dastlabki mashqlaridayoq chapdast, uddaburon va kuchliligi koʻrinib turgan bolakay darrov ustoz eʼtiborini tortdi. Chorsham Tajimurodov Elyor bilan erinmay, qunt bilan shugʻullandi. Alohida mashqlar ham oʻtdi. Shogird-ustozning tinimsiz mehnatlari yillar oʻtib, turli musobaqalarda oʻz natijalarini koʻrsatdi. Elyor dastlab tuman miqyosidagi, Qoraqalpogʻiston respublikasi miqyosidagi musobaqalarda muvaffqiyatli qatnashgan boʻlsa, umumtaʼlim maktabini tugatish arafasida Oʻzbekiston  chempioni boʻldi. Chirchiqdagi Olimpiya zahiralari sport kollejida tahsil olgan yillari Elyorning kamolot yillari boʻldi, desak adashmaymiz. Bu yutuqlari evaziga u oʻtgan yili Qoraqalpoq Davlat universiteti jismoniy tarbiya fakulteti talabaligiga imtihonsiz qabul qilindi.

Shu yilning iyun oyida Ukrainada boʻlib oʻtgan yoshlar oʻrtasidagi dzyudo kurashi boʻyicha Yevropa kubogi ochiq chempionatida Elyor Masharipov oʻz vazn toifasida bronza medalini yengib oldi. Musobaqada oʻz vazni boʻyicha uchinchi oʻrinni zabt etgani Elyorga shu yilning 6-17-iyul kunlari Rossiyaning Qozon shahrida boʻlib oʻtadigan XXVII jahon yozgi Universiadasida sportning 14 turi boʻyicha ishtirok etadigan Oʻzbekiston yoshlari safida qatnashish imkonini berdi.

Shuningdek, Oʻzbekiston yoshlar va kattalar dzyudo terma jamoalari aʼzosi Elyor shu yil Koreyada boʻladigan yoshlar jahon chempionatida, Braziliyada boʻladigan kattalar oʻrtasidagi jahon chempionatida ham qatnashish huquqlarini qoʻlga kiritdi.

Elyor Masharipov 27-iyul - 3-avgust kunlari Chexiyaning Liberek shahrida Yevropa kubogi chempionatida qatnashib, faxrli birinchi oʻrinni yengib oldi.

Xushxabarning qanoti bor, deyishadi. Kuragi yerga tegmagan taniqli polvon, koʻplab milliy, sambo kurashining taniqli polvonlarini tarbiyalab, voyaga yetkazgan murabbiy, faxriylar oʻrtasida milliy kurash boʻyicha jahon chempioni Shomurod Masharipovning kenjatoy farzandi Elyorning gʻalabasi  tumanimizga tezda tarqaldi. Oʻspirin yigit jahon miqyosida gʻolib boʻlib, uning sharafiga davlatimizning bayrogʻi koʻtarilib, madhiyasi yangrasa, quvonmay boʻladimi? Jahon xaritasida kichkinagina oʻrinni egallab turgan shu moʻʼjaz yurtimizning dovrugʻini dunyoga yoygan oʻgʻlonning gʻalabasi goʻyo bayram boʻldi. Elyorni, otasi Shomurod polvonni, onasi Soliya opani qutlab kelganlarning bir necha kun oyogʻi uzilmadi. Mangʻit shahrining soʻlim goʻshalaridan biri - "Shomurod polvon” toʻyxonasida bir necha kun haqiqiy toʻy boʻldi. Tashrif buyuruvchilarning oldiga Elyorning akasi Doniyor quvona-quvona dasturxon yozdi.

- Elyorning ilk mashqlariyoq uning kelajagiga umid qilish  mumkinligini koʻrsatib turardi. Esimda, u dastlab sport maktabimizga kelganida 8-9 yoshlarda edi, - deydi ilk ustozi Chorsham Tajimurodov. – Qarasam epchil, chapdast, vaziyatni baholay olishi va shunga monand  harakat qilishidan quvondim va oʻzgacha ixlos bilan shugʻullandim. Elyor qatnashgan musobaqalarga, respublikamizning turli hududlariga doim birga borib, unga dalda boʻlishga intilardim. Har safargi gʻalabasida oʻzimda yoʻq quvonardim.

Uning ilk ustozi boʻlganimdan baxtiyorman.

Dunyoda ota-ona borki, bolam, deb yashaydi. Bekam-u koʻst voyaga yetkazib, yaxshi oʻgʻil-qiz boʻlib yetishishini orzu qiladi. Shunga intiladi. Orzularining roʻyobga chiqishi esa ota-onaga tuganmas baxtdir.

Shomurod polvonlar oilasini haqli ravishda sportchilar oilasi, deb aytish mumkin. Asli sport murabbiysi boʻlgan Shomurod Masharipov va turmush oʻrtogʻi Soliya opalar farzandlarining maktabda aʼlo oʻqishi bilan bir qatorda sport bilan shugʻullanishlariga ham eʼtibor berishdi. Ota-onaning mehnatlari oʻz samarasini berdi: katta oʻgʻil Doniyor sambo kurashi bilan shugʻullanib, koʻpgina yutuqlarga erishdi. Respublika miqyosidagi musobaqalarda ishtirok etib, sovrindor boʻldi. Keyinchalik sogʻligi toʻgʻri kelmaganligi uchun tadbirkorlik yoʻlini tutdi. Mangʻitda muhtasham toʻyxona qurib, ishga tushirdi va yurtdoshlarimizning xizmatini qilayapti. Qizlari Muborak jismoniy tarbiya fani oʻqituvchisi, Ozoda tarbiyachi, basketbol boʻyicha tuman terma jamoasi faol aʼzosi, Nilufar matematika fani oʻqituvchisi boʻlsa-da, tumanimiz voleybolchi qizlari safida, Muyassar talabaligida ikki marta student yoshlarning eng ulkan bellashuv maydoni - universiada musobaqalarida voleybolchilar safida ishtirok etib, jamoasi gʻalabalariga munosib ulush qoʻshgan boʻlsa, Guloyim tennischi - 1-BOʻSMda yosh oʻgʻil-qizlarga sportning mazkur turi boʻyicha murabbiylik qiladi. Gulshod Mangʻit iqtisodiyot kasb-hunar kollejida kimyo fanidan dars beradi, uning ham sport doim hamrohi. Oilaning kenjatoyi Elyor esa bugun butun dunyoga polvon boʻlib tanildi.

- Butun hayotimni tumanimizning sportini rivojlantirishga bagʻishladim. Sport ustaligiga nomzodlar, Oʻzbekiston chempionlarini tarbiyalab, yetishtirdim. Dunyoning menman, degan polvonlari bilan bel olishib, gʻolib boʻldim. Faxriylar oʻrtasida jahon chempioni boʻldim. Lekin hayotimdagi eng ulkan yutugʻim – oʻgʻlimning ana shunday polvon boʻlib yetishgani boʻldi.

Farzandlarimning hammasi sportchi, maqtaydigan muvaffaqiyatlari koʻp. Biroq 20 yoshda bunchalik yutuq kamdan-kam odamga nasib qiladigan baxt. Iloyo, oʻgʻlim doim Oʻzbekistonimizning sport sharafini yuqori koʻtaraversin, - deydi Elyorning otasi Shomurod Masharipov.

- Oʻgʻlingiz davrada kurash tushayotgan damlarida koʻnglingizdan nimalar kechadi? – qiziqib soʻradim Elyorning onasi Soliya opadan.

- Shu kenjatoyim chet elga ketsa, ilojim yoʻq, oʻzimizda yurganida u qayerda boʻlsa, men ham shu yerdaman. Vaqtida ovqatlanib, dam olib, mashq qilishiga gʻamxoʻrlik qilaman. Musobaqalarda davraga tushish oldidan bagʻrimga bosib, yaxshi tilaklar aytaman. Sizga yolgʻon tuyular, oʻzimga chin, Elyor davradaligida jonim qil ustida turadi, goʻyo. Iloyim, biron joyi lat yemasin, deb qaygʻuraman (kurash-kurashda axir), xudodan bolamga kuch-quvvat soʻrayman. Ming qatla shukur, yuzimizni yerga qaratayotgani yoʻq.

Soliya opa koʻzlaridan sevinch yoshlari sizib chiqqanini ham  sezmay, oʻgʻli haqida toʻlqinlanib gapiradi. Quvonchining chegarasi yoʻq.

Elyor Masharipov bilan suhbatimiz ham Chexiyada boʻlib oʻtgan dzyudo boʻyicha Yevropa chempionati haqida boʻldi.

- Elyor, avvalo Yevropa chempioni boʻlganligingiz bilan tabriklayman, - yuzlanaman polvonga.

- Rahmat!

- Ayting-chi, Liberekka borib, oʻz vazn toifangizda Yevropa miqyosida eng baland shohsupani zabt etdingiz. Sizning sharafingizga madhiyamiz yangrab, bayrogʻimiz yuqori koʻtarilgan damlarda koʻnglingizdan nimalar kechdi?

- Bilasizmi, London olimpiadasi gʻoliblarini taqdirlash marosimida Yurtboshimiz mamlakatimizda sportga berilayotgan eʼtibor, shart-sharoitlar, gʻamxoʻrliklar hali koʻp yutuqlarga zamin boʻladi, - degandilar. Mening yutugʻim ham har bir bolasiga shunchalar gʻamxoʻrlik qilib, voyaga yetkazayotgan mamlakatim tufayli, Yurtboshimizning eʼtibori tufayli desam, mubolagʻa boʻlmas. Liberekdagi gʻalabamga kelsak, buni soʻz bilan taʼriflay olmayman. Shu lahzalarda shohsupada oʻzim emas, oʻzim tugʻilib oʻsgan, dzyudoning ilk mashqlarini olganim - Mangʻit, ota-onam, oʻzim oʻqiyotgan oliygohim, butun Oʻzbekiston turganday boʻldi. Bir farzand sifatida yurtimga yorugʻ yuz bilan qaytdim.

Umuman joriy yilning yozi Elyor uchun muvaffaqiyatlar pallasi boʻldi. Uning Yevropa kubogida erishgan yutugʻi nafaqat tumanimiz, balki mamlakatimiz sport tarixiga zarhal harflar bilan bitilib qoldi: Elyor Masharipov – Yevropa chempioni boʻldi! Musobaqaning oltin medalini halol yengib oldi!

Istiqlol yillarida mamlakatimizda oʻsib kelayotgan yosh avlod kamoloti yoʻlidagi saʼy-harakatlarning bir mevasi - 20 yoshli mangʻitlik polvon gʻalabasidan barchamiz birdek quvonib:

"Iloyo kuraging hech qachon yerga tegmasin”, deb qolamiz.