ISTIQLOL QUYoShING PORLASIN, ELIM!

Mamlakatimizda istiqlol tongi otganiga mana bu yil roppa-rosa yigirma ikki yil toʻlmoqda. Bu nurli tong yogʻdusidan butun mamlakatimiz nurafshon boʻldi. Qalblarimiz istiqlol quyoshi nurlari bilan munavvar boʻlib, erkinlik, ozodlik va hurriyat kabi asriy orzularimiz roʻyobga chiqdi. Mamlakatimizda huquqiy demokratik davlat va erkin fuqarolik jamiyatining poydevori qoʻyilib, yangi rivojlanish, taraqqiyot va gullab-yashnash davri boshlandi. Muhtaram Prezidentimiz I.A.Karimov tashabbusi va bevosita rahbarligida taraqqiyot yoʻlining beshta tamoyili asosida "Oʻzbek modeli” – Oʻzbekiston taraqqiyoti strategiyasi ishlab chiqilib, izchillik bilan hayotga tatbiq etilishi va mamlakatimizning barcha sohalari hamda jabhalarida tub islohotlar oʻtkazilib, jamiyatimiz qiyofasi tubdan yangilandi. Nihoyatda koʻlamdor va benihoya keng miqyosda oʻtkazilayotgan chuqur islohotlar ayni davrda oʻzining yuksak samaralarini berib, mamlakatimiz keng va ravon rivojlanish hamda barqarorlik yoʻliga tushdi hamda jahon hamjamiyatida oʻzining munosib oʻrniga ega boʻldi.

Darhaqiqat, mustaqil mamlakatimiz bosib oʻtgan yigirma ikki yillik tarixiy rivojlanish davri-istiqlolimiz solnomasiga zarhal harflar bilan bitilgan barcha tarmoq va sohalardagi mislsiz muvaffaqiyatlar va yutuqlar davri boʻldi. Endilikda mamlakatimiz iqtisodiyoti yildan yilga yuksalib, shaharlarimiz va qishloqlarimiz qiyofasi yangi chiroy, yangi koʻrk bilan yuz ochib yanada goʻzallashdi, tanib boʻlmas darajada boshdan oyoq oʻzgardi, yangilandi. Bunday chiroyli oʻzgarishlar va yangilanishlarni tumanimiz misoli va qiyofasida ham yaqqol koʻrishimiz mumkin. Qishloqlarimizda shu kungacha 227 ta yangi namunaviy loyihadagi uy-joylar qad rostladi. Yangi maktablar, kasb-hunar kollejlari, akademik litsey va shifo maskanlari, yangi ishlab chiqarish korxonalari, maʼmuriy, madaniy-maishiy va servis xizmati binolari, yangi buyum bozori qurilib ishga tushirildi. Bunga minglab yakka tartibda qurilgan va qurilayotgan yangi uy-joylarniyam qoʻshsak, tumanimiz keng koʻlamdagi qurilish - bunyodkorlik maydoniga aylanganini koʻramiz.

Shu maʼnoda istiqlol nafaqat erkinlik va hurriyat, rivojlanish va yuksalish, balki, bunyodkorlik va yangilanish ham demakdir. Bizlarning har birimiz, qariyosh barchamiz mana shu mislsiz koʻlamdor bunyodkorlik maydonida oʻzlarimizning joʻshqin kuch-gʻayratimizni, ijodkorlik va yaratuvchilik salohiyatimizni sarflab, yangi jamiyat qurilishida faol qatnashmoqdamiz. Bunday faollik va yaratuvchilik bizning barchamizga cheksiz baxtiyorlik va iftixor tuygʻularini baxsh etadi. Mana shunday joʻshqin baxtiyorlik va iftixor tuygʻulari "Qadr-qimmatim, tayanchim va iftixorimsan, mustaqil Oʻzbekiston!” shiori ostida oʻtkazilgan tumanimiz ahlining istiqlol bayramida yaqqol namoyon boʻldi. Joriy 2013-yil 29-avgust kuni Mangʻit shahridagi 3-sonli BOʻSM sport maydonida oʻtkazilgan istiqlol bayramiga ertalabdanoq minglab odamlar tashrif buyurishdi. Ularning koʻpchiligi yoshlardan iborat boʻldi.

Tumanimiz yosh sanʼatkorlari va madaniyat xodimlari tomonidan tayyorlangan teatrlashtirilgan kontsert dasturida jaranglayotgan Vatanni, istiqlol va tinchlik hamda porloq istiqbolimiz, baxtu saodatimizni sharaflab ulugʻlovchi kuy-qoʻshiqlar bayram ishtirokchilari qalblariga yoʻl topib, ularga koʻtarinki ruh, shodon kayfiyat bagʻishladi.

Bayram maydoniga kiraverishda tumanimiz xoʻjaliklarining alohida-alohida oʻtovlarida mirishkor dehqonlarimiz, sohibkor bogʻbonlarimiz va mohir chor-vadorlarimiz hamda tadbirkor fermerlarimiz tomonidan yetishtirilgan qishloq xoʻjalik mahsulotlari, pazandalarimiz tayyorlagan har xil taomlar va pishiriqlar, qoʻli gul usta hunarmandlarimiz ishlagan uy-roʻzgʻor buyumlari har bir kishining diqqatini oʻziga tortib, bayram tarovatiga tarovat, koʻrkiga koʻrk qoʻshib turdi.

Tadbirda tumanimiz hokimi, Qoraqalpogʻiston Respublikasi Joʻqorgʻi Kengesi deputati Rajabboy Yoʻldoshev barchani istiqlol bayrami bilan tabriklab nutq soʻzladi. U oʻz nutqida mustaqillik sharofati tufayli tumanimizda erishilgan yutuqlar va muvaffaqiyatlar, ayni kunlarda olib borilayotgan koʻlamdor bunyodkorlik ishlari va kelgusidagi yuksak marralar, katta-katta rejalar hamda loyihalar haqida batafsil toʻxtaldi.

Bayram kuy-qoʻshiqlari zamonaviy sport oʻyinlari va anʼanaviy sport turlaridan kurash, arqon tortish, qoʻchqor urishtirish, xoʻrozlar bahsi, itlar olishuvi, dorbozlar oʻyini, masxarabozlar tomoshalariga ulanib, bayram ishtirokchilarining zavqiga zavq, shavqiga shavq qoʻshdi.

Bayram shukuhi barchaning qalblarida joʻsh urdi.

Davru davron, tinch zamon endi seniki,

Hurriyat bayrogʻin baland tut, oʻgʻlim.

Musaffo, osuda osmoning uzra,

Istiqlol quyoshing porlasin, elim.

Qobul ShOMURODOV.