MAHALLALARDAGI IBRATLI OILALAR ANIQLANDI

Oila – muqaddas qoʻrgʻon. Oila qadriyatlari, asrlar osha avlodan-avlodga oʻtib kelayotgan anʼana va urf-odatlar esa oilaning har bir aʼzosi uchun qadrli. Sogʻlom, maʼnan va jismonan yetuk insonni tarbiyalab voyaga yetkazishda oilaning oʻrni katta. Ayniqsa, nuroniy otaxon va onaxonlarimizning oʻziga xos hayotiy tajribalari jamiyatimiz koʻzgusi boʻlgan ibratli oilalarning shakllanishida muhim ahamiyat kasb etadi.

15-may – Xalqaro Oila kuni munosabati bilan tumanimizda 10-17-may kunlari Oila haftaligi oʻtkazildi. Boʻlib oʻtgan Oila haftaligida ovul va mahalla fuqarolar yigʻinlarida istiqomat qiluvchi barcha oilalar qamrab olinib, ularning turmush tarzlari, mahalla ijtimoiy-maʼnaviy hayotida tutgan oʻrni, oilalarda yaratilgan ishbilarmonlik va oʻziga xos tarbiyaviy muhit masʼullar tomonidan oʻrganib chiqildi.

Tuman Xotin-qizlar qoʻmitasi hamda Respublika Oila ilmiy-amaliy tadqiqot Markazining tuman Kengashi hamkorligida oʻtkazilgan ushbu haftalik davomida Xalqaro Oila kuniga bagʻishlangan “Ibratli oila” respublika koʻrik-tanlovining mahalla bosqichi ham boʻlib oʻtdi. Unda har tomonlama yetuk va barkamol farzandlarni tarbiyalab voyaga yetkazgan, oʻz oilalarida hayotning abadiyligini, avlodlar davomiyligini taʼminlagan, muqaddas urf-odat va anʼanalarimizni saqlagan, kelajak nasllarni munosib insonlar qilib voyaga yetkazib, ona Vatan ravnaqiga munosib hissa qoʻshib kelayotgan oilalarning sohib va sohibalari “Ibratli Oila” koʻrik-tanlovining mahalla bosqichi gʻoliblari boʻldilar.

Joriy yilning 17-may kuni Mangʻit shahar istirohat bogʻida Xalqaro Oila kuni munosabati bilan oʻtkazilgan Oila haftaligida faol ishtirok etgan “Ibratli Oila” koʻrik-tanlovining mahalla bosqichi gʻoliblarini taqdirlash marosimi boʻlib oʻtdi.

Tadbirda tumanimizdagi OFY va MFYlarda istiqomat qiluvchi tadbirkor oilalarning tadbirkorlik mahsulotlari aks etgan koʻrgazma ham namoyish etildi. Hunarmand Abdusharif Masharipov, yosh innovatsiyachi Abrorbek Hayitboyev, tikuvchi-modeler Tamara Yusupovalarning mahsulotlari barchaga manzur boʻldi.

Gʻoliblarni taqdirlash marosimida tuman Xotin-qizlar qoʻmitasi raisi Maryam Ahmedova Oila haftaligida faol ishtirok etgan tumanimizdagi ibratli oilalarning oʻziga xos goʻzal tutumlari, ularda shakllangan milliy mentalitetmizga mos maʼnaviy-maʼrifiy tarbiya usullarini barchaga namuna qilib koʻrsatdi hamda bu oilalarda voyaga yetgan farzandlarning hayotda erishayotgan yutuqlari, “Ibratli oila” koʻrik-tanlovining ahamiyati haqida gapirdi.

Shuningdek, Respublika Oila ilmiy-amaliy tadqiqot Markazining tuman Kengashi rahbari Gulshod Yusupova, “Gulzor” MFYda istiqomat qiluvchi ibratli oila sohibi Abdulla Xoʻjametov, “Doʻstlik” mahallasida istiqomat qiluvchi Jongilbeka hoji Rahim Bobojon qizi va boshqalar ham soʻzga chiqishib, mustahkam oilaning shakllanishida milliy urf-odat va anʼanalarning ahamiyati gʻoyat muhim ekanligini taʼkdladilar.

“Ibratli oila” respublika koʻrik-tanlovining mahalla bosqichi gʻoliblari tashkilotchilar tomonidan munosib taqdirlandilar va mazkur koʻrik-tanlovning joriy yil iyun oyida boʻlib oʻtadigan tuman bosqichiga yoʻllanma oldilar. Tuman madaniyat boʻlimi tomonidan tayyorlangan maroqli kontsert dasturi barchaga xushkayfiyat bagʻishladi.

Robiya YOʻLDOShEVA.