Hosil yuqori navlarga topshirilmoqda

OʻzA, Aminboy Ortiqboyev, 03.10.2013 16:34

Qoraqalpogʻiston Respublikasi paxtakorlari bu yil ob-havo injiqliklariga qaramay, moʻl hosil yetishtirdilar. Hosilni yogʻin-sochinli kunlarga qoldirmay yigʻib-terib olish borasidagi ishlar qizgʻin davom etmoqda.

– Prezidentimiz rahnamoligida amalga oshirilayotgan keng koʻlamli islohotlar, mamlakatimizda fermerlik harakatini rivojlantirishga qaratilayotgan ulkan eʼtibor bugungi yutuqlarimizning asosiy omili boʻlmoqda, – deydi Amudaryo tumani hokimi Rajabboy Yoʻldoshev. – Sugʻoriladigan yerlarning meliorativ holatini yaxshilash dasturi doirasida tumanimizda davlat byudjetidan 11,2 milliard soʻm, jumladan, shu yilning oʻzida 3,2 milliard soʻm mablagʻ sarflanib, 1 ming 410 kilometrlik kollektor-drenaj tarmoqlari rekonstruktsiya qilindi va taʼmirlandi. Natijada 25 ming gektardan ortiq ekin maydonining meliorativ holati yaxshilanib, hosildorlik darajasi oshdi.

Tumanda selektsiya ishlarining toʻgʻri yoʻlga qoʻyilgani, hududning iqlim va tuproq sharoitiga mos yangi navlar tanlangani, gʻoʻza parvarishida zamonaviy ilm-fan yutuqlaridan keng foydalanilib, ilgʻor agrotexnologiyalar amaliyotga joriy etilgani bugun oʻz samaralarini bermoqda. Buni hosildorlikning yildan-yilga ortib borayotganida ham koʻrish mumkin. Oʻtgan yili 26 fermer xoʻjaligi gektaridan 40 tsentnerdan oshirib hosil olgan boʻlsa, joriy yilda bunday fermerlar soni oltmishga yaqinlashib qoldi. Eng muhimi, terilgan paxta hosili toʻliq yuqori navlarga topshirilayotir.