MUHIM IJTIMOIY-SIYoSIY TADBIRNI demokratizm va oshkoralik tamoyillari asosida oʻtkazaylik

Oʻzbekistonda demokratlashtirish va fuqarolik jamiyatini qurish barobarida bugungi turmushimizga inson qadr-qimmati, huquq va erkinliklari va ijtimoiy adolat masalalariga yangicha munosabatlar, yangicha qarashlar shakllanmoqda. Jamiyat hayotidagi bu jarayonlar har birimizdan ijtimoiy faollik va yuksak masʼuliyat talab qiladi.

Maʼlumki har bir shaxs oilada kamol topadi. Insonning ongi va dunyoqarashining shakllanishida oilalar, oilalardan tarkib topgan mahallaning oʻrni beqiyosdir. Har birimizning turmush tarzimiz mahallaga – oʻzimiz yashayotgan muhitga bogʻliq ekan, bu daxldorlikning ham oʻziga yarasha masʼuliyatini his qila olishimiz lozim.

Bu masʼuliyat fuqarolar yigʻinlari va ularning maslahatchilarining vakolat muddati shu yil noyabr-dekabr oylarida tugashi munosabati bilan mamlakatimizda fuqarolarning oʻzini oʻzi boshqarish organlariga navbatdagi saylovni oʻtkazishga tayyorgarlik koʻrilayotgan ayni kunlarda ayniqsa yaqqol namoyon boʻlmoqda.

Oʻzbekiston Respublikasi Oliy Majlisi Senati Kengashining shu yil 12-sentyabrda boʻlib oʻtgan majlisida "Fuqarolar yigʻinlari raislari va ularning maslahatchilari sayloviga tayyorgarlik koʻrish va uni oʻtkazish toʻgʻrisida”gi qarori qabul qilindi. Majlisda qayd etilganidek, oʻtgan davr mobaynida oʻtkazib kelingan fuqarolar yigʻinlari raislari va ularning maslahatchilari saylovi fuqarolarning huquqiy ongini va siyosiy-huquqiy madaniyatini oshirish, mahalliy ahamiyatga molik masalalarni hal qilishda talabchanlikni kuchaytirish maktabiga aylandi.

Navbatdagi fuqarolar yigʻinlari raislari (oqsoqollari) va ularning maslahatchilari saylovini oʻtkazish muddati 2013-yil noyabr-dekabr oylari etib belgilandi.

Bu saylovlar jarayoni yangi tahrirda qabul qilingan «Fuqarolar yigʻinlari raislari (oqsoqollari) va uning maslahatchilari saylovi toʻgʻrisida»gi qonun asosida oʻtkazilishi bilan ahamiyatlidir.

Tumanimizda boʻlajak saylovlarda 47 nafar fuqarolar yigʻini raisi (oqsoqoli) va ularning 420 nafardan ortiq maslahatchisi saylovi rejalashtirilmoqda.

Qonunga muvofiq, fuqarolar yigʻini raisi va uning maslahatchilari saylovi oshkoralik, muqobillik va teng saylov huquqi printsiplari asosida oʻtkaziladi.

Yangi tahrirdagi qonunga asosan 2013-yil 27-sentyabr kuni Xalq deputatlari tuman Kengashi qarori bilan fuqarolar yigʻinlari raislari va ularning maslahatchilari saylovini tashkil etish hamda oʻtkazishda fuqarolar yigʻinlariga amaliy yordam berish uchun tuman hududida fuqarolar yigʻinlari raislari (oqsoqollari) va ularning maslahatchilari saylovini tashkil etish hamda oʻtkazishga koʻmaklashuvchi tuman komissiyasi tarkibi tasdiqlandi. Tuman komissiyasi tarkibiga fuqarolar yigʻinlarining, davlat organlarining, nodavlat-notijorat tashkilotlarining vakillari kiritildi. Shu bilan birga bevosita joylarda saylovni tashkil etish hamda oʻtkazish boʻyicha yangi tahrirdagi qonunga koʻra fuqarolar yigʻini (fuqarolar vakillarining yigʻilishi) qarori bilan fuqarolar yigʻini raisi va uning maslahatchilari saylovini tashkil etish hamda oʻtkazish boʻyicha ishchi guruhlar tuziladi. Ishchi guruh tarkibiga qoida tariqasida fuqarolar yigʻinining tegishli hududida joylashgan nodavlat-notijorat tashkilotlar va boshqa tashkilotlarning vakillaridan tashqari Xalq deputatlari tuman Kengashining deputati ham kiritiladi.

Fuqarolar yigʻini raisi lavozimiga nomzodlar Oʻzbekiston Respublikasi fuqarolari boʻlishi, oliy maʼlumotli, bevosita saylovga qadar kamida besh yil tegishli hududda doimiy yashayotgan, tashkilotchilik qobiliyatiga ega, davlat organlarida yoki nodavlat-notijorat tashkilotlarda yoxud tadbirkorlik va boshqa xoʻjalik faoliyati sohasida ish tajribasiga, shuningdek, hayotiy tajribaga va aholi oʻrtasida obroʻ-eʼtiborga ega boʻlishi kerak.

Fuqarolar yigʻini raisi va uning maslahatchilari saylovi yakunlarini chiqarish tartibiga koʻra ovoz berishda ishtirok etgan fuqarolarning yarmidan koʻprogʻining ovozini olgan nomzod fuqarolar yigʻini raisi yoki uning maslahatchisi lavozimiga saylangan hisoblanadi. Umuman olganda saylovga puxta tayyorgarlik koʻrib, uni qonunga muvofiq yuqori tashkiliy-huquqiy darajada oʻtkazishni taʼminlashimiz zarur. Bu jarayonlardafaol ishtirok etish, fuqarolarimizga saylov maqsad-mohiyatini, bu boradagi amaldagi qonunlarimizni keng tushuntirishni tuman komissiyasi eng asosiy vazifalaridan, deb hisoblaydi. Shundagina saylovlarda eng munosib nomzodlar saylanishiga erishamiz.

Rustam Roʻzmetov,

tuman hududida fuqarolar yigʻinlari raislari (oqsoqollari) va ularning maslahatchilari saylovini tashkil etish hamda oʻtkazishga koʻmaklashuvchi tuman komissiyasi raisi, "Mahalla” xayriya jamoat fondi tuman boʻlinmasi raisi.