Toʻylarning avvalgi fayzi yana qaytsa...

Bolalik shunday begʻubor davrki, hamma voqealar, hodisalar xuddi moʻʼjizadek tuyuladi. Salga koʻngil osmon qadar yuksalsa, salgina koʻngilsizlik vujudingizni larzaga soladi.

Inson bolalikdan qanchalik uzoqlashsa, shunchalik bu xotiralar totli tuyulaveradi.

Mangʻit shahrining Goʻna qalʼasi hududidagi koʻchalardan yursam, har gal bolalik xotiralarim esimga tushaveradi. U paytlarda televizor tugul radio ham sanoqligina oilalarda bor edi. Biz bolalar toʻylardagina qoʻshiq tinglab, tomosha koʻrar, keyinchalik buni koʻp vaqtlargacha esimizdan chiqarmay, toʻy bilan bogʻliq xotiralarimizni bir-birimizga aytishib yurardik. U paytlarda Mangʻit hozirgidan ancha kichkina, xonadonlarning barchasining ham qurli, tomoshali toʻy beraverishga qurbi yetmas, xullas, u toʻydan bu toʻyga sogʻinib, kutib, yetar edik.

Biz bolalarning u paytlarda oʻgʻil uylantirish yo sunnat toʻy boʻlsa, qanday toʻy boʻlishiga qarab, oʻynaladigan oʻyinlarimiz boʻlar edi. Masalan, qiz uzatilib ketayotgan yo kelin kelayotgan boʻlsa, oʻn-oʻn besh chogʻli bolalar yigʻilib, kelin mingan mashina oldiga xoda tutib, yoʻl bermay turish, yoʻlni oching, deya yangalarning qatlama, patir, shirinliklar ulashib yalinishlari, keyin chetga chiqib, yangalarning bergan neʼmatlarini talashib-tortishib ulashishlar, sunnat toʻylarda sunnat qilinadigan bolalarni yashirib qoʻyib, qayerdaligini aytmay qochishlarimiz, toʻy egasining joʻrangizni topib bersangiz - shu sizlarniki, deb birlik pulni koʻrsatgach, pulni olib, sunnat qilinadigan bolani goʻyoki topolmayotgandek, boshqa yerlardan izlab, kattalarni sarson qilishlarimiz biz uchun juda zavqli boʻlar edi.

Shularni oʻylab oʻtirib, hozir bir narsaga oʻzim ajablanaman: eshigiga toʻyga aytuvchi kelsa ham quvonadiganlar kamayib ketayapti. Qolaversa, hozir deyarli aytuvchi kelmaydiyam, qoʻl telefoni bor, telefonda aytiladi. Kimning toʻyiga borsangiz ham oʻsha xonanda, oʻsha boshlovchi, har kuni aytiladigan gaplar ham oʻsha-oʻsha.

Ehtimol, shuning uchun ham kun sayin toʻylar zerikarli, taʼsirsiz boʻlib borayotgandir? Ortiqcha sarf-xarajatlar, spirtli ichimliklar ham toʻy fayzini ketkazayotgandek.

Toʻylarni, marosimlarni, oilaviy tantanalarni ixcham, dabdabasiz oʻtkazish borasida bildirilayotgan fikrlar toʻylarga yangicha maʼnomazmun baxsh etishiga koʻngilda umid uygʻotadi. Qolaversa, bu barchaga birday bogʻliq, shunday emasmi?..

Yoʻldosh BOLTABOYeV, mehnat faxriysi.