BYuDJET MABLAGʻLARINING ShAKLLANIShI HAMDA SARFLANIShI PARLAMENT VA JAMOATChILIK NAZORATIDA BOʻLADI

2018-yil 22-avgust kuni Oʻzbekiston Respublikasi Prezidentining “Byudjet maʼlumotlarining ochiqligini va byudjet jarayonida fuqarolarning faol ishtirokini taʼminlash chora-tadbirlari toʻgʻrisida”gi Qarori qabul qilindi.

Byudjet maʼlumotlarining ochiqligi va shaffofligini yanada oshirish, byudjet mablagʻlarining shakllanishi va sarflanishi ustidan parlament va jamoatchilik nazoratini kuchaytirish maqsadida qabul qilingan ushbu Qaror bilan Davlat byudjetini shakllantirish va ijro etishning yangi tartiblari belgilandi.

Shunga asosan 2019-yildan boshlab byudjet mablagʻlarini taqsimlashda fuqarolar ishtirokining tuman (shahar)lar byudjetlari qoʻshimcha manbalarining kamida 10 foizini jamoatchilik fikri asosida shakllantirilgan tadbirlarga yoʻnaltirishni nazarda tutadigan mexanizm joriy etiladi.

2020-yildan boshlab esa Davlat byudjeti va davlat maqsadli jamgʻarmalari byudjetlari axborotlar batafsil bayon etilgan, ilgʻor xalqaro standartlarga muvofiq tayyorlangan qonun bilan tasdiqlanadi. Davlat byudjeti va davlat maqsadli jamgʻarmalari byudjetlari, soliq va byudjet siyosatining asosiy yoʻnalishlari loyihalari, shuningdek, Davlat byudjeti va davlat maqsadli jamgʻarmalari byudjetlari ijrosi toʻgʻrisidagi hisobotlar Oʻzbekiston Respublikasi Oliy Majlisi Qonunchilik palatasiga taqdim etilishidan oldin majburiy jamoatchilik muhokamasiga qoʻyiladi.

2019-yil 1-yanvarga qadar Davlat byudjeti va davlat maqsadli jamgʻarmalari byudjetlari, soliq va byudjet siyosatining asosiy yoʻnalishlari loyihalari, Davlat byudjeti va davlat maqsadli jamgʻarmalari byudjetlari ijrosi toʻgʻrisidagi hisobotlar va boshqa shu kabi maʼlumotlarni oʻz ichiga olgan fuqarolar bilan qayta aloqani tashkil etishni nazarda tutadigan “Ochiq byudjet” axborot portali ishga tushiriladi.

Endilikda Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari uchun belgilangan vazifalarda tuman (shahar)lar xalq deputatlari Kengashlari tomonidan mahalliy byudjetlar parametrlari va ijrosi haqidagi hisobotlarning koʻrib chiqilishi va tasdiqlanishi jarayoni ommaviy axborot vositalarida har tomonlama yoritib boriladi.

Shuningdek, endilikda aholi oʻrtasida byudjet savodxonligi va byudjetning ochiqligi darajasini oʻrganishga qaratilgan tegishli soʻrovlar oʻtkaziladi va soʻrovlar natijalariga koʻra, aholining byudjet savodxonligini oshirish uchun texnik koʻmak jalb etiladi, umumtaʼlim maktablari uchun oila byudjeti va davlat byudjeti boʻyicha oʻquv qoʻllanmalari yaratiladi.

Oʻzbekiston Respublikasi Prezidentining ushbu Qarori mamlakatimizda byudjet haqidagi maʼlumotlarning ochiqligi va shaffofligining yanada oshishiga, byudjet mablagʻlarining shakllanishi va sarflanishi ustidan parlament va jamoatchilik nazoratining yoʻlga qoʻyilishiga xizmat qiladi.

Ulugʻbek BEKNIYoZOV,

tuman Moliya boʻlimi mudiri.