YuRTIM QIZLARINING YOʻLLARI OYDIN, KELAJAGI PORLOQ

Ajdodlarimiz asrlar davomida orzu qilib kelgan mustaqillik xalqimizga milliy oʻzligini, or-nomus va gʻururini, oʻz yurtiga bekligini qaytarib berdi, oʻz farzandlari taqdiri haqida gʻamxoʻrlik qilish, asrlar osha ajdodlarimizning hayotidan muhim oʻrin tutgan milliy urf-odatlarimiz, anʼanalarimiz va qadriyatlarimizning tarbiyaviy ahamiyatidan foydalanish imkonini berdi Yangi tarixiy sharoitda mamlakatning oyoqqa turib, qudratli davlatga aylanishida hal qiluvchi kuch sifatida yoshlarga ulkan ishonch bildirildi.

Mamlakatimizda ayni kunda amalga oshirilayotgan ulkan oʻzgarishlar va yangilanishlarda yoshlar, ayniqsa ayol-qizlar manfaatlari ustuvorlik kasb etmoqda. Yosh qizlar, ayollar masalasi, ularning salomatligini yaxshilash, taʼlim olishiga shart-sharoit yaratish, ijtimoiy muammolarini hal etishga koʻmaklashish davlat siyosati darajasiga koʻtarildi. Ayniqsa, millat davomchisi boʻlmish qizlarni maʼrifatli, ziyoli va onalik maqomiga munosib yuksak axloqli qilib voyaga yetkazishga alohida eʼtibor berilayotir.

Shuning uchun ham 11-oktyabr – Xalqaro qizlar kuni mamlakat miqyosida keng bayram qilinmoqda. Bu haqda maʼlumot berishdan oldin eʼtiboringizni dunyo miqyosidagi qizlarga qanday munosabat hukmronligiga qaratmoqchiman: bugungi kunda dunyoda 1,1 milliard qiz yashaydi. Bu qizlar kelajagimizni yuksaltirishda muhim vosita boʻlar edi – agar butun dunyoda qizlarga bizning mamlakatimizdagiday eʼtibor, imkoniyatlar mavjud boʻlganida. Taasufki, ular turli hududlarda turlicha sharoitlarda yashashadi. Fikrim isboti sifatida YuNISEF xalqaro tashkiloti maʼlumotlariga toʻxtalaman: ayni kunda jahon boʻyicha 31 million nafar maktab yoshidagi qiz taʼlim olmaydi, 17 million nafar qiz esa umuman maktabga bormaydi. Ayrim mamlakatlarda oilalarning iqtisodiy nochorligi tufayli toʻyib ovqat yemasligi, yomon sharoitda yashashi koʻp sonli qizlarning bolalikdan nogiron boʻlib qolishiga yo nobud boʻlishiga olib kelayapti.

Shuning uchun ham 2011-yil, 11-oktyabrdan beri BMT Bosh assambliyasi tashabbusi bilan mazkur sana Xalqaro qizlar kuni sifatida qizlarning ijtimoiy muammolariga eʼtibor qaratish, kamsitilishining oldini olish maqsadida nishonlanib kelinayotir. Xalqaro qizlar kuni jahonda 2012-yilda erta nikohga qarshi, 2013-yilda taʼlim olish muammolari, 2014-yilda qizlarga zoʻravonlikka barham berish, 2015-yilda 2030-yilga qadar oʻsmir qizlar uchun yetarli sharoitlar yaratishga, 2016-yilda qizlarni kamsitishga, ijtimoiy muammolariga qarshi kurash, 2017-yilda esa jahon inqirozigacha, inqiroz paytida va inqirozdan keyingi davrda qizlarga imkoniyatlar, ular duch kelayotgan qarama-qarshiliklarga global eʼtibor qaratishni kuchaytirish masalalariga bagʻishlab oʻtkazildi.

Ushbu maʼlumotlarning oʻziyoq yil oʻn ikki oyi ham oʻziga xos fayzli, tinch-osoyishta yurtimizda davlatimiz va oilasi ardogʻida ulgʻayayotgan qizlarimizning naqadar tolei baland ekanligidan dalolat beradi.

Ha, ana shunday jannatmakon yurtda tugʻilishning oʻzi ham baxt. Baxtki har bir goʻdak, qizning sogʻlom boʻlib dunyoga kelishi, sogʻlom ulgʻayishi uchun gʻamxoʻrlik qilinadi. Maktabgacha taʼlim muassasalari, umumtaʼlim maktablari, keng jamoatchilik ularning maʼnaviyatli, madaniyatli, iqtidorli boʻlib voyaga yetishlari uchun xizmat qiladi. Har bir qiz xohishiga koʻra maktabni tugatganidan soʻng oliy taʼlim olishi, ishlashi, biror kasb-hunar oʻrganishi oʻz ixtiyoridadir. Mamlakatimizda yoshlarga oid normativ huquqiy hujatlarga asoslanib, “2017-2021-yillarda Oʻzbekiston xotin-qizlar qoʻmitasining yosh oilalar va qizlar bilan ishlash boʻyicha strategiyasi” ishlab chiqilib, amalga oshirilmoqda.

Oʻzbekiston Respublikasi Xotin-qizlar qoʻmitasining tashabbusi bilan 11-oktyabr – Xalqaro qizlar kunga bagʻishlab oʻtkazilayotgan Respublika qizlar festivalidan koʻzlangan maqsad ham yoshlarga oid davlat siyosatining mazmun-mohiyatini xalqimiz, ayniqsa, yoshlarga yetkazish, qizlarga boʻlgan eʼtiborni yanada yuksak pogʻonaga koʻtarish, qizlarning bilim olishga, kasb-hunarga qiziqishlarini oshirishga qaratilgan.

Sana munosabati bilan tumanimizda ham qizlar festivali boʻlib oʻtdi. Qizlarning bilim olishiga, kitob oʻqishiga boʻlgan qiziqishini, ijtimoiy-siyosiy faolligini oshirish, iqtidorli qizlar safini kengaytirish bilan bir qatorda uyushmagan qizlarni har tomonlama qoʻllab-quvvatlash, ularning kiyinish va muomala madaniyatini oshirish, amalga oshirilayotgan islohotlarga faol munosabatini shakllantirish maqsadida tuman Madaniyat boʻlimi tomoshalar zalida oʻtkazilgan festivalga tumanimizning barcha hududlaridan turli kasb, mutaxassislik egalari boʻlgan, shuningdek, vaqtincha ishsiz qizlar ishtirok etdilar.

Tadbir elimizning qoʻli gul, iqtidorli qizlarining turli sohalardagi ijod namunalari koʻrgazmasi bilan boshlandi.

Turli sohalarda, xususan, noyob va innovatsion ixtiro sohiblari, ijodkor qizlar, tengdoshlariga eng koʻp ish oʻrinlari yaratgan hunarmand va tadbirkor qizlar, ilm-fanda yuksak muvaffaqiyatlarga erishgan qizlar, eng koʻp xorijiy tillarni oʻzlashtirgan qizlar, sport sohasida yuksak marralarni egallagan chempion qizlar, sanʼat sohasida muvaffaqiyatlarga erishgan qizlarning chiqishlari ishtirokchilarda ulkan taassurotlar qoldirdi.

Hur va ozod yurtimizni, baxtiyor turmush tarzini va qizlar shaʼnini ulugʻlovchi kuy-qoʻshiqlar, mohirona ijro etilgan raqslar barchaga manzur boʻldi.

Butun mamlakatimiz boʻylab oʻtkazilgan 11 Respublika qizlar festivali, festival doirasida hududlarda oʻtkazilgan tadbirlar yurtimizning yoʻllari oydin, kelajagi porloq qizlariga hurmati-ehtiromi, eʼzozi namunasidir.

Oygul RAJABOVA.