"Obod qishloq" dasturi amalga oshirilayotgan Qilichboy ovulidagi madaniyat markazida kutubxona tashkil etildi
Inson hayotida kitob mutolaasining, kitoblardan olinadigan maʼnaviy-ruhiy ozuqaning oʻrnini hech bir vosita bosa olmaydi. “Kitob – jaholat kushandasi”, “Kitob oʻqigan avvalo oʻzini tanib oladi” degan hikmatli iboralar zamirida ulkan maʼno yashirin.
Muhtaram Yurtboshimizning aholi, ayniqsa, yoshlar kitob mutolaasiga katta eʼtibor berayotgani mamlakatimizning barcha hududlarida kutubxonalar fondining boyib, yangi kutubxonalarning bunyodga kelishiga zamin boʻlayotir.
Shu yilning 13-aprelida tuman hokimi S.Yoʻldashev “Obod qishloq” dasturiga kiritilgan Qilichboy ovulidagi Madaniyat markaziga 500 ta kitob sovgʻa qildi va markaz kutubxonasiga asos soldi.
Shu munosabat bilan markazga yigʻilgan 15-sonli maktab oʻquvchilari bilan S.Yoʻldashev kitobxonlik borasida samimiy suhbatlashdi, yana qanday kitoblar oʻqishni xohlashlariga qiziqdi.
Shuningdek, kutubxonaning joriy yilgi eng faol kitobxonini aniqlab, ragʻbatlantirish uchun markaz direktori Ikromjon Siytimovga velosiped topshirdi.
Kutubxona tashkil etilishi oʻquvchi-yoshlarnigina emas, hudud aholisini, keksalarni ham juda sevintirdi.
-Bolalarimiz kitob oʻqimay qoʻydi, deya xavotir olar edik. Aslida bolalarga kitob berib, ular kitoblarga qanchalik tashna ekanligini bilish mumkin ekan. Hozir oʻquvchilarning kitoblarni javonlarga avaylab terayotganlarini koʻrib, buni chuqur angladim.
Kutubxona tashkil etilganidan biz ham xursandmiz, mutolaa albatta, hammaga kerak, - deydi mehnat faxriysi Amina Yusupova.
Qilichboy bu yil “Obod qishloq” dasturi asosida obod va koʻrkam ovulga aylantiriladi, yangi infrastruktura obʼektlari qad rostlaydi, aholi turmushi farovonlashadi. Madaniyat markazida tashkil etilgan kutubxona qilichboyliklar uchun xayrli oʻzgarishlarning boshlanishi boʻlsa ajab emas.
O.PAJABOVA.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
