RIZQIMIZNI YoNGʻINDAN ASRAShIMIZ KERAK
Tumanimizda gʻalla oʻrim-yigʻimi boshlanmoqda. Mirishkor dehqonlarimizning zahmatli mehnatlari evaziga yetishtirilgan gʻallani nobudgarchiliksiz yigʻishtirib olish, mavsumni namunali oʻtkazish barchamiz uchun muhim. Ayniqsa, yongʻin xavfsizligini taʼminlash, don mahsulotlarini yongʻindan asrash uchun bor imkoniyatlarimizni ishga solishimiz zarur.
Oʻrim-yigʻim arafasida Yongʻin xavfsizligi boʻlimi tomonidan tuman hududidagi donni qayta ishlash, saqlash va qabul qilish korxonalarida sodir boʻlishi mumkin boʻlgan yongʻinlarning oldini olish maqsadida tegishli profilaktik chora-tadbirlar amalga oshirildi.
Donni oʻrish va tashish vaqtida yongʻin xavfsizligi qoidalariga doir eslatma va plakat, turli hajmdagi rangli bannerlar tayyorlandi. Mavsum oldidan belgilangan joylarga oʻrnatildi. Don saqlash omborlari va xirmonlarida yongʻin, asosan, elektr taʼminoti nosozliklari, nuqsonli gʻalla yuklash-tushirish kichik mexanizmlarini ishlatish, xirmon hududida sigareta chekish va ochiq olovdan foydalanishdan kelib chiqadi. Bularning oldini olish uchun xirmonlar birlamchi yongʻin oʻchirish vositalari bilan taʼminlanishiga alohida eʼtibor qaratildi.
Shuningdek, oʻrim-yigʻimga jalb etilgan kombayn, don tashishga moʻljallangan yuk avtomobillari, yonilgʻi tashuvchi transportlar va plugli traktorlarning texnik sozligi hamda birlamchi yongʻin oʻchirish vositalari bilan taʼminlanganligi koʻrikdan oʻtkazilib, fermer xoʻjaliklarining rahbarlari, mutasaddilari, ishchi-xizmatchilar va haydovchilar oʻrtasida yongʻin xavfsizligi qoidalariga rioya qilish borasida yoʻriqnomalar, suhbatlar oʻtkazildi. Bundan tashqari, donni qayta ishlash, saqlash va qabul qilish korxonalarida tashkil etilgan koʻngilli yongʻin oʻchirish drujinalari va tegishli xizmatlar bilan hamkorlikda sodir boʻlishi mumkin boʻlgan yongʻin va boshqa koʻngilsiz hodisalarni zudlikda bartaraf etishga erishish maqsadida amaliy mashqlar tashkil etildi.
Maʼlumki, gʻallasi oʻrilgan maydonning yoqib yuborilishi tuproq unumdorligining pasayishiga, havoga zaharli moddalar ajralib chiqishiga sabab boʻladi. Bundan tashqari, atrofdagi oʻrilmagan maydonlarga ham yongʻin oʻtib ketish xavfi ortadi. Fuqarolar bilan suhbatlarda ana shu masalaga katta eʼtibor qaratildi.
Don – rizq-roʻzimiz. Gʻalla oʻrim-yigʻimi mavsumida yongʻin havfsizligini taʼminlash esa gʻoyat muhim masala. Agar yongʻin xavfsizligi qoidalariga toʻla amal qilinsa, oʻrim-yigʻim mavsumi koʻngildagidek, hech qanday talafotlarsiz oʻtadi.
H.MATYoQUBOV, tuman YoXB boshligʻi, mayor.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
