XITOY OVULI KEKSALAPI XIVA ShAHPIGA SAYoHATGA OLIB BOPILDI

Yurtimizda keksalarni eʼzozlashga , ularning munosib sharoitlarda yashashi va dam olishini  taʼminlashga , keksalik davrini ham oʻziga xos mazmunli oʻtkazishlariga  alohida eʼtibor qaratilmoqda. Yaqinda Xitoy ovul fuqarolar yigʻini  oqsoqoli Davlatboy Otajonov  ovul hududida yashovchi bir guruh keksalarning   qadimiy va hamisha navqiron  Xiva shahriga sayohatini tashkil etdi. Sayohatchilar orasida taʼlim va tibbiyot faxriylari, tumanimiz qishloq xoʻjaligi rivojiga munosib hissa qoʻshgan  kishilar bor. Ular dastlab  Xiva shahridagi tarixiy obidalarni  ziyorat qildilar, sayohatchilar uchun yaratilgan imkoniyatlardan foydalanib , koʻngilli dam oldilar.

         Xorazm diyorida   oʻzbek milliy sanʼati  rivojiga munosib hissa qoʻshib, oʻlmas qoʻshiqlarni meros qilib qoldirgan sohir ovoz sohiblari oʻtishgan.Ularning yaratgan qoʻshiqlarini  bugungi avlod vakillari ham sevib tinglaydilar va zavq oladilar. Komiljon Otaniyozov ham   ( joylari jannatda boʻlsin!) oʻz qoʻshiqlari bilan xalqimiz qalbida   mangu barhayot yashayotgan hofizlardan biridir. Ayniqsa keksa avlod vakillari uning  qoʻshiqlarini sevib tinglaydilar, hayotidagi hofizni koʻrish baxtiga sazovor boʻlgan damlarini   umridagi eng yorqin lahzalar sifatida qadrlaydilar. Shu boisdan ham xitoylik keksalar oʻzlarining sayohatini  Urganch tumanidagi Imorat bobo qabristoniga borib,  mashhur hofiz Komiljon Otaniyozov qabrini ziyorat  qilish bilan davom ettirdilar.Shuningdek, Shovot tumanidagi  yurtdoshlarimiz   Ulli pir deb ham ataydigan Yusuf Hamadoniy ziyoratgohida  ham boʻlishib, ulugʻ bobokalonimiz haqiga fotiha qildilar.

-  Sayohat har birimiz uchun ham juda koʻngilli oʻtdi. Tashkilotchi Davlatboy Otajonovdan juda minnatdor boʻldik,- deydi  sayohatchilarning biri Farhod Avezov.

 Yurgan- daryo,  deydi xalqimiz. Yurtimizning har bir hududida sayohat qilishga arzigulik maskanlar koʻp. Ularni koʻrish , bilish keksa-yu yosh uchun birday zavqlidir.

Oygul PAJABOVA.