IFTIXOP

Ushbu sheʼr maktab va taʼlimni taraqqiyot sari yuksaltirishga intilayotgan oʻqituvchi va murabbiylarga, Prezident maktablariga bagʻishlanadi.

Chamanlarning ifori qulf urar quchogʻida,
Koʻngillarning izhori jam erur toʻrt yogʻida.
Dunyoning ne asrori ochilib har chogʻida,
El-u xalq iftixori ham Vatan ardogʻida –
Qadr ila eʼzoz topgan qadrdon goʻsham oʻzing!

Men sening ogʻushingda boʻldim shoh-u sultonlar,
Va mehr quyoshingdan oldim bahra, ilhomlar.
Hattoki gʻoʻr yoshimda yetib ulugʻ imkonlar,
Matonat, bardosh ila berding ilm-u irfonlar
Yoʻlim ravon aylagan maktabim, guhar soʻzing!

Mahmudxoʻja Behbudiy hazratlari etib sharh,
Bir soʻz aytdi dunyoviy, tan oldilar Gʻarb-u Sharq.
Jahonda eng zoʻr nabiy maktabdir – mehrigiyoh
Irfonidan abadiy bahramand necha ming xalq –
“Imoratlar ichida eng zoʻr” va sarvar oʻzing!

Egilmagan ne boshlar qogʻoz uzra egilgay,
Oʻsib fikr-u qarashlar har soʻz aro egilgay.
Hatto sabr-u bardoshlar parvozlarga tikilgay
Va purziyo quyoshlar – kitoblarga tikilgay –
Oftobi olam asli, ham gʻaniy doʻst-yor oʻzing!

Kel, dedi bagʻrin ochib, xushchehra muallimlar,
Mehr nurini sochib, berdi adab, taʼlimlar.
Koʻzlarda hayrat tepchib,  oldik necha bilimlar,
Erkalab, suyub, quchib, qilganda takallumlar –
Dedik: “Ustoz mehridan mangu gulbahor oʻzing!”.

Onamizday mehribon, ham aziz padar kabi,
El-u yurtga armugʻon gʻayrat-u muhabbati.
Vatan boʻlsa farovon – shudir ezgu matlabi,
Ilmi  bilan  topgay shon mustaqillik maktabi –
Taraqqiyotga kafil, ustoz-u sardor oʻzing!

Bagʻrini ochdi bugun Prezident maktablari,
Yechildi asriy tugun, el-u xalq talablari.
Aylanib charxi gardun ilm-u fan salaflari
Uygʻonsa, faqat bir kun, yangragay xitoblari:
–Jonajon Oʻzbekiston eng ilmi tojdor oʻzing!

Madhingga bir loyiq soʻz topmogʻim dushvor boʻldi,
Koʻpmillat xalqimga oʻz soʻzim shu ashʼor boʻldi.
“Sizlar oltin fondsizlar!” – degan zoʻr iqror boʻldi,
Pobiya, ayla koʻz-koʻz, bu ulugʻ viqor boʻldi –
Prezident maktablari – dilda iftixor oʻzing!

Pobiya YOʻLDOShEVA.