“Asldil med” klinikasi el salomatligi uchun hamisha xizmatga tayyor

Tibbiyot faxriysi, tajribali shifokor Yangiboy Saburov el salomatligi yoʻlida 50-yilga yaqin mehnat qildi. Umrini xastalarga shifo ulashish, ularni sogʻlom hayotga qaytarib, salomatligini mustahkamlashga bagʻishlagan bu inson yurt xizmatida boʻlishni, el dilidan joy olishni eng katta baxt deb bildi.

Prezidentimizning 2017-yildagi «Sogʻliqni saqlash sohasida xususiy sektorni yanada rivojlantirish chora-tadbirlari toʻgʻrisida»gi Qarori qabul qilinganligi tibbiyot sohasi rivojiga keng yoʻl ochdi. Bu borada amalga oshirilayotgan chora-tadbirlar natijasida yurtimizda zamonaviy xususiy tibbiyot muassasalari soni koʻpaydi. Tibbiyot fidoyisi boʻlgan Yangiboy Saburov ham davlatimiz tomonidan yaratilayotgan bunday imkoniyatlardan foydalanib, sifatli tibbiy xizmat koʻrsatishni yoʻlga qoʻyish maqsadida aholi ehtiyojiga koʻra, Qipchoq shaharchasida “Asldil med” klinikasini tashkil qildi.

“Obod qishloq” dasturi doirasida 2018-yilda boshlangan klinika binosining qurilishi bir yil muddat ichida tugallandi. Bu binoda 2019-yilning may oyida klinika bilan birga dorixona, oziq-ovqat doʻkoni ham ishga tushirildi. Kunduzgi, kechki statsionar davolashga va ambulator qabulga moʻljallangan mazkur klinikani tashkil qilish maqsadida “Qishloqqurilish bank”dan 3-yil muddatga olingan 500 mln. kredit hisobidan zarur jihozlar, tibbiy uskunalar keltirildi hamda yangidan 12 ish oʻrni yaratildi. Klinika elektroforez, UZT, eletrokardiograf, darsanval, ingalyator, uqalash va umurtqa pogʻonasini choʻzishga moʻljallangan maxsus karavotlar, marvaridli va Chortoq sanatoriysidan keltirilgan sertifikatga ega maʼdanli suv vannalari bilan jihozlangan.

Shifo istab kelgan bemorlarga klinikada davolanish mobaynida 3 mahal parhezli ovqat ham beriladi. Xushmuomala hamshiralar esa shifokorlar tayinlagan muolaja amallarini oʻz vaqtida bajarishadi. Shu kunga qadar bu yerda 200 nafardan ziyod bemor kasallikdan xalos boʻlib, sogʻlom hayotga qaytdi. Kelgusida klinikada laboratoriya, ichaklarni parazitlardan tozalash xizmatlari koʻrsatiladigan boʻlimlarni ham tashkil qilish rejalashtirilmoqda.

Uzoq yillar tibbiyot sohasida mehnat qilib kelgan fidoyi tibbiyot xodimi Yangiboy Saburov va u rahbarlik qilib kelayotgan “Asldil med” klinikasi ham el salomatligi uchun hamisha xizmatga tayyor. Dardlarga darmon boʻlishni hayotdagi asosiy maqsadi deb bilgan faxriy shifokor Yangiboy Saburov va uning mehnat jamoasini kasb bayramlari bilan qutlaymiz.

O.Xudoyberganova.