Iqtisodiy sud tomonidan joriy yilning toʻqqiz oyida 73,8 foiz ishlar sayyor sudlarda koʻrildi

Mamlakatni yanada rivojlantirishning ustuvor yoʻnalishlaridan biri sud tizimini izchil demokratlashtirish, sud hokimiyatining mustaqilligi toʻgʻrisidagi konstitutsiyaviy normalariga qatʼiy rioya etilishini taʼminlash hisoblanadi.

Davlatimiz rahbari Sh. Mirziyoyev aytganidek, sudlarning asosiy vazifasi adolatni qaror toptirishdan iborat. Mamlakatimizda 2016-yil 21-oktyabrdagi “Sud-huquq tizimini yanada isloh qilish, fuqarolarning huquq va erkinliklarini ishonchli himoya qilish kafolatlarini kuchaytirish chora-tadbirlari toʻgʻrisida”gi Prezident Farmoni asosida mazkur sohadagi davlat siyosati sifat jihatidan mutlaqo yangi bosqichga koʻtarildi. Mazkur Farmon asosida sud hokimiyatining chinakam mustaqilligini taʼminlash, fuqarolarning huquq va erkinliklarini ishonchli himoya qilish kafolatlarini kuchaytirish hamda odil sudlovga erishish darajasini oshirish singari uchta asosiy ustuvor yoʻnalishlar belgilab berildi.

Shuningdek, Prezidentimizning 2017-yil 7-fevraldagi 4947-sonli “Oʻzbekiston Respublikasini yanada rivojlantirish boʻyicha “Harakatlar strategiyasi toʻgʻrisida”gi Farmoniga muvofiq qonun ustuvorligini taʼminlash va sud-huquq tizimida yangi islohotlar amalga oshirila boshladi.

Qoraqalpogʻiston Respublikasi, viloyatlar va Toshkent shahar hoʻjalik sudlari  Qoraqalpogʻiston Respublikasi, viloyatlar va Toshkent shahar iqtisodiy sudlari tarzida oʻzgartirildi. Shundan soʻng, tadbirkorlik subʼektlarining qonuniy manfaatlarini kafolatli himoya qilishga qaratilgan iqtisodiy sudlar faoliyati yoʻlga qoʻyildi. Shu bilan birga mamlakatning iqtisodiy salohiyati va tadbirkorlik subʼektlarining ortib borishini hisobga olgan holda ishlarni birinchi instantsiyada koʻrib chiqishga vakolatli boʻlgan tumanlararo, tuman, va shahar iqtisodiy sudlari tashkil etildi.

Tuman  Iqtisodiy sudi tomonidan joriy yilning toʻqqiz oyida barcha ishlarning qariyb 73,8 foizi sayyor sudlarda koʻrib chiqildi. Bundan tashqari, aholi bilan  233-marta uchrashuv va ochiq muloqotlar oʻtkazildi.   

Iqtisodiy sudning faoliyati iqtisodiyot sohalaridagi qonunchilikni mustahkamlash, odil sudlov sifati va samaradorligini oshirish, sud-huquq tizimini isloh qilish, sud mustaqilligi va taʼsirchanligini taʼminlashga qaratilgan boʻlib, tadbirkorlar va kichik biznes subʼektlari huquqlarini himoya qilish borasida bir qator ishlar amalga oshirildi. Shuningdek, aholining huquqiy ongini oshirish borasida ham qator tarigʻibot-tashviqot ishlari oʻtkazildi.  

Umuman olganda, sud tizimida amalga oshirilayotgan islohotlar natijalari mamlakatning sud-huquq tizimi faoliyatini, aholining odil sudlovga boʻlgan ishonchini, tadbirkorlik subʼektlarining sud himoyasiga erishish darajasini yanada yuqori bosqichga olib chiqadi.

T.Uzakbayeva,
tuman Iqtisodiy sudi sudya yordamchisi.