“Armiya – tinchlik qalqoni” tadbirida Vatan himoyachilari ulugʻlandi

Tinchlik – dunyodagi eng buyuk neʼmat. Bu neʼmatni koʻz qorachigʻidek asrab-avaylayotgan, yurt osoyishtaligini taʼminlash uchun jonini fido qilib kelayotgan Vatan himoyachilari bilan har qancha faxrlansak arziydi. Zero, ular bu yoʻlda uchraydigan har qanday mashaqqatni jasorat bilan yengib, yurt, xalq uchun koʻksini qalqon qiladi. Darhaqiqat, Vatanning buyuk kelajagi va baxtu iqboli uchun jon kuydirish eng oliy saodat boʻlsa, tinchligini, osoyishtaligini avaylab-asrash yuksak sharafdir.

Bugungi kunda mamlakatimizda armiya va harbiy xizmatning nufuzi oshib, harbiylik sharafli kasblardan biriga aylandi. Mamlakatimiz mustaqilligini asrash, yurtimiz tinchligi, chegaralarimiz daxlsizligini taʼminlashning ishonchli qalqoniga aylangan Qurolli Kuchlarimizning ham salohiyati tobora yuksalib borayapti. Yoshlarni  milliy armiyamiz saflariga tayyorlash, qalbida Vatanga yuksak muhabbat, Qurolli Kuchlarimizdan gʻururlanish va harbiy-vatanparvarlik tuygʻularini kamol toptirish maqsadida joylarda oʻtkazilayotgan turli maʼnaviy-maʼrifiy tadbirlar esa faxr-u iftixor tuygʻularini yanada yuksaltirmoqda.

9-yanvar kuni Xitoy ovulidagi 86-sonli maktabda vatanparvarlik oyligi doirasida “Armiya – tinchlik qalqoni” tadbiri oʻtkazildi. Mamlakat Qurolli Kuchlari va xalqimiz oʻrtasidagi rishtani yanada mustahkamlab, yoshlarning harbiy kasbga qiziqishini, oʻz armiyasiga nisbatan faxr, gʻurur, iftixor tuygʻularini oshirish maqsadida oʻtkazilgan ushbu tadbirda tuman hokimligi, oʻzini oʻzi boshqarish organlari faoliyatini muvofiqlashtirish boʻyicha tuman Kengashi va tuman Mudofaa boʻlimi masʼullari ishtirok etdilar.

Tadbirda soʻzga chiqqan masʼullar yurt tinchligi va osoyishtaligini mardonavor himoya qilayotgan harbiy xizmatchilarning sharafli faoliyatlarini alohida eʼtirof etdilar. Shuningdek, tenglikda onaga mengzaladigan Vatanni koʻz qorachigʻidek asrash va uni mardlarcha himoya qilish sharaf ekanligi, mana shunday muqaddas vazifani sidqidildan ado etayotgan yurtning asl oʻgʻlonlari doim el ardogʻidaligini alohida taʼkidlab oʻtishdi. Undan tashqari, masʼullar Qurolli Kuchlarimizda olib borilayotgan keng qamrovli islohotlar, harbiy xizmatchilar uchun yaratilayotgan shart-sharoit va imkoniyatlar xususida ham atroflicha fikr yuritishdi.

Yosh avlodni harbiy-vatanparvarlik, milliy anʼana va qadriyatlarimizga hurmat ruhida tarbiyalash maqsadida oʻtkazilgan tadbirda Vatan taqdiri, yurt tinchligi va himoyasi yoʻlida bor salohiyati bilan masʼullikni zimmasiga olishga qodir, shijoatli yoshlar qalbidagi vatanparvarlik tuygʻulari yanada mustahkamlandi.

O.Xudoyberganova.