“QUVNOQ STARTLAR” – QUVNOQLIK VA EPChILLIK BAHSI

Umumtaʼlim maktablari oʻquvchilari oʻrtasida oʻtkaziladigan sport musobaqalari orasida  “Quvnoq startlar” oʻzining qiziqarli bahslarga boyligi bilan keng ommalashgan sport musobaqalaridan biri hisoblanadi.

 Chunki aynan ana shu sport oʻyinlari orqali bolalar epchillik va sezgirlikka oʻrganibgina qolmay, jismonan shakllanadilar va katta sportga qadam qoʻyadilar.

Tuman Xalq taʼlimi boʻlimiga qarashli umumtaʼlim maktablarining 5-6-sinf oʻquvchilari oʻrtasida har yili anʼanaviy tarzda oʻtkazilib kelinayotgan “Quvnoq startlar” sport musobaqalarining maktab va hududiy bosqichlari tumanimizda uyushqoqlik bilan oʻtkazildi.

18-yanvar kuni musobaqaning tuman bosqichi oʻtkazildi. Unda 30 ta maktab jamoalari orasida boʻlib oʻtgan hududiy bosqich gʻoliblari boʻlgan 36-, 76-, 37-, 35-, 14-, 41-, 18-, 28-sonli umumtaʼlim muassasalari oʻquvchilari qatnashishdi.

Musobaqa tumanimizdagi 16-sonli umumtaʼlim muassasasining sport zalida oʻtkazildi. Unda 112 nafar oʻquvchilar oʻzaro kuch sinashdilar. Musobaqaning 56 nafar ishtirokchisi qizlardan iborat boʻldi.  Musobaqa qizgʻin kurashlar ostida oʻtdi. “Quvnoq startlar” televizion sport musobaqasining Nizomida belgilanganidek, har bir jamoa 7 nafar oʻgʻil va qizlar, jami 14 nafar oʻquvchilardan iborat boʻldi. Jamoalar musobaqa shartlari boʻyicha oʻzaro kuch sinashib, oʻz epchilliklari va chaqqonliklarini, abjirliklarini namoyish etdilar. Oʻquvchilar biri-biridan ortda qolmaslikka intilib, gʻoliblik uchun harakat qildilar. Musobaqa yakunida 1-oʻrinni 76-sonli umumtaʼlim maktabi oʻquvchilari jamoasi, 2-oʻrinni 36-sonli umumtaʼlim maktabi oʻquvchilari jamoasi va  3-oʻrinlarni esa 18- va 28-sonli umumtaʼlim maktabi oʻquvchilar jamoalari egallashdi. I-oʻrinni egallagan 76-sonli umumtaʼlim maktabi oʻquvchilari jamoasi musobaqaning Qoraqalpogʻiston Respublikasi bosqichiga yoʻllanma oldilar.

“Quvnoq startlar” televizion sport musobaqasining tuman bosqichida gʻolib boʻlgan sportchi oʻquvchilar Oʻzbekiston “Yoshlik” jismoniy tarbiya va sport jamiyatining tuman hududiy boʻlinmasi tomonidan diplom va esdalik sovgʻalari bilan taqdirlandilar.

N.Abdullayev, tuman XTB metodisti.