ChORVAChILIK MAHSULOTLARI YeTIShTIRIShNI KOʻPAYTIRISh VA SIFATINI OShIRIShGA XIZMAT QILAMIZ

Tuman Veterinariya va chorvachilikni rivojlantirish boʻlimi mutaxassislari tomonidan qishloq xoʻjalik va uy hayvonlarini kasalliklardan himoya qilish, aholini odam va hayvonlar uchun umumiy boʻlgan kasalliklardan muhofaza qilish, tuman hududini boshqa hududlardan hayvonlarning yuqumli kasalliklari kirib kelishidan muhofaza qilish kabi vazifalar amalga oshirilmoqda. Shu bois xodimlarning malakalarini oshirish, fan hamda texnika yutuqlarini veterinariya amaliyotiga tatbiq etishga ahamiyat berilmoqda.

Bugungi kunda boʻlimda 29 nafar xodim, jumladan, 24 nafar veterinariya mutaxassisi faoliyat koʻrsatib kelmoqda. Shundan 9 nafari oliy, 20 nafari oʻrta-maxsus maʼlumotli mutaxassislardir.

Tumandagi mavjud 49 ta ovul va mahallalar hududlarida 9 ta veterinariya boʻlinmalari faoliyat koʻrsatmoqda. 2020-yilning 1-yanvar holatiga tuman hududidagi chorvachilikka ixtisoslashgan fermer xoʻjaliklari va aholi qaramogʻidagi 150 247 bosh yirik shoxli mol, 41 491 bosh sigirlar, 98 358 bosh qoʻy va echkilar, 861 153 bosh parranda,  578 bosh otlarga veterinariya xizmatlari koʻrsatildi. Shuningdek, hayvonlarni diagnostik tekshirish, ehtiyotdan emlash, dezinfektsiya, dezinsektsiya va deratizatsiya ishlari ham olib borildi.

Tuman Veterinariya boʻlimi tomonidan 2019-yil davomida 43 376 bosh yirik shoxli, 1837 bosh mayda shoxli mollarga brutsellyoz kasalligiga diagnostik tekshirish oʻtkazilib, ehtiyotdan emlandi. Oqsil kasalligiga 144 800 bosh yirik shoxli, 60 400 bosh mayda shoxli mollar, kuydirgi kasalligiga qarshi 149 040 bosh yirik shoxli, 98920 bosh mayda shoxli mollar, 572 bosh otlar emlandi. Shuningdek, chechak kasalligiga qarshi, 47 000 bosh mayda shoxli, qorason kasalligiga qarshi 60 500 bosh yirik shoxli, 18 437 bosh mayda shoxli mollar, 10 594 bosh qoramol esa fatsiolyoz kasalligiga qarshi emlandi va chorva mollarining yaxshi oʻsishiga sharoit yaratildi.

Qoraqalpogʻiston Respublikasi Veterinariya qoʻmitasi tomonidan berilgan biopreparatlar boʻlim dorixonasidan boʻlinma  mudirlariga yuk xati asosida tarqatilmoqda va biopreparatlarning ishlatilishi ustidan veterinariya mutaxassislari nazorati olib borilmoqda. Sohani rivojlantirish va veterinariya xizmati koʻrsatish darajasini yaxshilash boʻyicha boʻlim mutaxassislarini ragʻbatlantirish maqsadida Qoraqalpogʻiston Respublikasi Veterinariya qoʻmitasi va tuman hokimligi  tomonidan veterinariya sohasida faoliyat yuritayotgan xodimlarga 2 ta xizmat mototsikli, 15 ta maxsus kiyim, 14 ta termojamlama, 25 ta veterinariya sumkasi va 19 ta xizmat velosipedlari berildi.

Tumandagi mavjud 1 ta zamonaviy koʻrinishdagi avtomatlashtirilgan kushxonada veterinariya mutaxassislari nazorati ostida 2019-yilda 3015 bosh qoramollar goʻsht  sifatida soʻyildi.

Bugungi kunda tuman Tashxis markazi tomonidan brutsellyoz, leykoz, trixomonoz, askolizatsiya va vibrioz kasalliklariga qarshi diagnostik tekshirish ishlari olib borilmoqda.

Tumandagi “Mangʻit-dehqon bozori” masʼuliyati cheklangan jamiyatida veterinariya sanitariya-ekspertiza laboratoriyasi mutaxassislari tomonidan bozorga olib kelingan qishloq xoʻjalik mahsulotlarining sifati ustidan doimiy nazorat ishlari olib borilmoqda.
 Hududiy “Nasl xizmat” masʼuliyati cheklangan jamiyati tomonidan 8 ta sunʼiy urugʻlantirish nuqtalari tashkil etilgan boʻlib, bugungi kunda ular toʻliq faoliyat yuritayapti.  

Veterinariya tadbirlarini amalga oshirish uchun 49 ta chorvachilik, 8 ta parrandachilik fermer xoʻjaliklari va aholi qaramogʻidagi qoramollar uchun ovul va mahallalar bilan shartnomalar tuzilib, shu asosda veterinariya xizmatlari amalga oshirilmoqda.

Tuman Veterinariya va chorvachilikni rivojlantirish boʻlimi mutaxassislari  aholining sifatli chorvachilik mahsulotlariga boʻlgan ehtiyojini qondirishga oʻz hissalarini qoʻshib kelmoqda.

A.MATKARIMOV,
tuman Veterinariya va chorvachilikni rivojlantirish boʻlimi boshligʻi.