Iqtisodiy sud tomonidan Amudaryo tumaniga doir 304 ta ish koʻrildi

Sud – fuqarolarning huquq va erkinligini ishonchli himoya qiluvchi, jamiyatda qonun ustuvorligini va adolatni taʼminlovchi, odil sudlovni amalga oshiruvchi mustaqil hokimiyat organi hisoblanadi. Shu bois tuman Iqtisodiy sudi tomonidan oʻtgan yil mobaynida qonunchilikni mustahkamlash, odil sudlovni amalga oshirish, tadbirkorlik subʼektlarining qonuniy manfaatlarini himoya qilish maqsadida ishlarni koʻproq sayyor sud majlislarida jamoatchilikni jalb qilgan holda oʻtkazishga alohida eʼtibor qaratilib kelindi.

Iqtisodiy sud tomonidan 2019-yil 12 oyi davomida jami koʻrilgan ishlar soni 1115 ta, shundan tumanga doir koʻrilgani 304 tani tashkil qildi.

Shuningdek, sud tomonidan daʼvogarlar foydasiga 45,09 mlrd. soʻm miqdorida qarz va neustoykalarni undirish toʻgʻrisida qarorlar qabul qilindi. Pespublika byudjetiga davlat boji hisobidan 1,03 mlrd. soʻm mablagʻ undirish toʻgʻrisida qarorlar qabul qilingan boʻlsa, shundan, tuman boʻyicha 293,2 mln. soʻmni tashkil qildi. Ixtiyoriy toʻlangan davlat boji pul miqdori birinchi instantsiyada 50,6 mln. soʻm, shundan tuman boʻyicha 12,3 mln. soʻm boʻldi.

Soliq va boshqa majburiy toʻlovlar boʻyicha qarzlarini oʻz vaqtida toʻlamagan 628 xoʻjalik yurituvchi subʼektlarning 31,3 mlrd. soʻmlik boqimanda qarzlarini ularning mol-mulki hisobidan undirish toʻgʻrisida sud qarorlari qabul qilindi. Tuman boʻyicha shundan 188 xoʻjalik yurituvchi subʼektlarning 17,1 mlrd. soʻmlik boqimanda qarzlari undirildi.

Shuningdek, kichik biznes subʼektlari va yakka tartibdagi tadbirkorlar ishtirokida jami 6 ta ishlar koʻrilgan boʻlib, ular foydasiga 130,2 mln. soʻm undirish toʻgʻrisida qarorlar qabul qilindi. Dehqon va fermer xoʻjaliklar ishtirokida jami 12 ta ish koʻrildi va ular foydasiga 80,1 mln. soʻm undirildi.
Bundan tashqari, 67 subʼekt, shundan  tuman boʻyicha 30 subʼekt «bankrot» deb topildi.

Iqtisodiy sud tomonidan ushbu davrda ishlarni koʻrish paytida aniqlangan qonunbuzarlik holatlari boʻyicha mansabdor shaxslarga nisbatan Oʻzbekiston Pespublikasi Prezidentining “Xoʻjalik yurituvchi subʼektlarning iqtisodiy nochorligi va shartnoma majburiyatlarining bajarilishi uchun mansabdor shaxslarning javobgarligini kuchaytirish toʻgʻrisida”gi 1938-sonli Farmoniga asosan jami 13 sud taʼsir choralari qoʻllanildi.

Ayni paytda ham odil sudlovni amalga oshirish, sudni «Adolat qoʻrgʻoni»ga aylantirish maqsadida aholi oʻrtasida targʻibot tadbirlari oʻtkazilib borilmoqda. Fuqarolarning muammolarini hal qilishda yaqindan yordam berish orqali buzilgan huquqlarini tiklash boʻyicha tegishli chora-tadbirlar belgilab olinib, bu boradagi amaliy ishlar davom ettirilmoqda.

Oʻtkir Sobirov, tuman Iqtisodiy sudi raisi.