“Ulugʻ mutafakkir xotirasiga ehtirom” nomli badiiy kecha oʻtkazildi

Tumanimizdagi barcha taʼlim muassasalari qatorida 53-sonli umumtaʼlim maktabida ham gʻazal mulkining sultoni Nizomiddin mir Alisher Navoiy tavalludi keng nishonlandi.

Taʼlim maskanida 9-fevral Alisher Navoiy tavalludiga 579-yil toʻlishi munosabati bilan ajoyib bayram tadbiri tashkil etildi.  

Aytish joizki, adib oʻzbek mumtoz adabiyotida munosib iz qoldirgan. Uning buyuk merosi avlodlar maʼnaviyatini yuksaltirishga xizmat qilib kelmoqda. Tadbirni ochib bergan maktab direktori Hakimboy Madaminov Navoiyning avlodlarga qoldirgan maʼnaviy merosi, uning lirik hamda nasriy asarlari xususida soʻzladi.
Taʼkidlanganidek, ulugʻ mutafakkir, soʻz mulkining sultoni Alisher Navoiyning boy maʼnaviy merosi asrlar osha butun bashariyatni hayratga solib kelmoqda. Alisher Navoiy dunyo adabiyoti tarixida tengi topilmas bir siymo hisoblanadi. Isteʼdodining ulugʻvorligi-yu teranligi jihatidan ham, xalqparvar davlat arbobi sifatida jamiyatda tutgan yuksak mavqei yuzasidan ham, ilm-fan, madaniyat va sanʼat, adabiyot ahliga koʻrsatgan homiyligi jihatidan ham oʻxshashi yoʻq siymodir.

Shuningdek, mamlakatimizda mustaqillik yillarida shoir xotirasi abadiylashtirilgani uning jahon adabiyoti xazinasiga qoʻshgan buyuk hissasi hamda isteʼdodiga boʻlgan yuksak hurmat ifodasi ekani taʼkidlandi.

Badiiy kechada maktabning maʼnaviyat-maʼrifat ishlari boʻyicha direktor oʻrinbosari Nurimmat Eshboyev soʻzga chiqib, oʻquvchilarni shunday buyuk ajdodlarga munosib farzand boʻlishga, oʻqib, ilm oʻrganib kelajakda Vatan ravnaqiga hissa qoʻshadigan avlod boʻlishga daʼvat qildi. Shuningdek, shoirning tengsiz maʼnaviy merosini qunt bilan oʻrganishga, asarlaridagi chuqur maʼno-mazmunni anglab, dunyoqarashlarini yanada kengaytirishga chorladi hamda u zotning tavalludi sanasini munosib nishonlash har birimizning burchimiz ekanligini alohida taʼkidladi.  

Darhaqiqat, Alisher Navoiyning tavallud ayyomi xalqimiz, butun dunyo uchun adabiyot bayrami, desak, arziydi. Boisi, Alisher Navoiy oʻzining ijodi, insoniy gʻoyalari bilan butun dunyoda ezgulikni, insonparvarlikni, yaxshilikni tarannum etgan. Hazratning soʻz mulkining sultoni, deb atalishi ham bejiz emas. Shu paytgacha dunyo adabiyotida ulugʻ mutafakkir bobomizchalik biron ijodkor oʻz ijodida koʻp va xoʻb soʻz ishlatgan emas. U kishining maʼnaviy merosi xalqimiz uchun bitmas-tuganmas xazinadir.

Tadbirda oʻquvchilar tomonidan shoirning gʻazallari, ruboiylaridan parchalar aytildi. Oʻquvchilar adibning nasriy asarlaridagi qahramonlar obrazlariga kirib qiziqarli sahna koʻrinishlarini ijro qildilar. Badiiy kechani maktabning deyarli barcha fan oʻqituvchilari yuqori qiziqish bilan tomosha qildilar. Oʻquvchi qizlarning Navoiy gʻazallariga bastalangan qoʻshiqlariga ijro qilgan raqslari barchaga koʻtarinki ruh bagʻishladi.
Badiiy kecha Vatanni madh etuvchi kuy-qoʻshiqlar bilan yakunlandi.

Charos Arslonova.