ShOH VA ShOIR, MATONATLI SARKARDA Z.M.BOBUR DAHOSIGA EHTIROM KOʻRSATILDI

Fevral oyi xalqimiz, ayniqsa oʻquvchi-yoshlar uchun biri-biridan ahamiyatli sanalarga boyligi bilan juda fayzli oʻtadi. Mazkur oyning ilk kunlaridanoq buyuk soʻz sanʼatkori, milliy tilimizning asoschisi, gʻazal mulkining sultoni, yirik davlat va jamoat arbobi Mir Alisher Navoiy tavalludining 579-yilligi munosabati bilan adabiy-badiiy, maʼnaviy-maʼrifiy tadbirlar, tantanali musiqiy kechalar xotira marosimlari oʻtkazilib, oʻquvchi-yoshlar tomonidan tashkillashtirilgan sahna koʻrinishlari barchaga quvonch va shodlik ulashdi. Shuningdek, shoh va shoir, matonatli sarkarda Zahiriddin Muhammad Bobur dahosiga ham ehtirom koʻrsatilib, umumiy oʻrta taʼlim va maktabgacha taʼlim muassasalarida turli tadbirlar oʻtkazildi.

Bobokalonimiz Bobur ijodiga bagʻishlab, 16-sonli ixtisoslashtirilgan davlat umumtaʼlim maktabida boʻlib oʻtgan Boburxonlik kechasida ham maktabning oʻzbek tili va adabiyoti fani oʻqituvchilari uning asarlari dunyoning koʻplab tillariga tarjima qilinib, qayta-qayta nashr etilayotganligini va sevib oʻqilayotganligini, jahon ahli mutolaa qilayotganligini taʼkidladilar. Uning shoir sifatidagi siymosi oʻzbek mumtoz adabiyotida Hazrat Alisher Navoiydan keyingi eng ulugʻ siymo ekanligini, keng dunyoqarashi va mukammal aql-zakovati bilan Hindistonda Boburiylar sulolasiga asos solib, bu mamlakat tarixida davlat arbobi sifatida nomi qoldirganini, serjilo oʻzbek tilida yozilgan “Boburnoma” asari bilan jahonning mashhur tarixnavis olimlari qatoridan ham joy olganini faxr bilan eʼtirof etdilar. Boburning nafis gʻazal va ruboiylari sheʼriyatning eng nodir durdonalari boʻlib, «Mubayyin», «Xatti Boburiy», «Harb ishi», Aruz haqidagi risolalari esa islom qonunshunosligi, sheʼriyat va til nazariyasi sohalariga munosib hissa boʻlib qoʻshilganini ham tilga oldilar.

Oʻz navbatida 8-sinflar oʻquvchilari bu ulugʻ siymoning jahon adabiy muhitida tutgan oʻrni, davlat ishlarini olib borishdagi yuksak  mahorati haqida soʻz yuritdilar. Shuningdek, millatimiz faxri boʻlgan buyuk ajdodimizning oila, farzandlar tarbiyasidagi namunali ibrati, oʻz asarlari, ayniqsa, tarixiy-memuar janrdagi “Boburnoma” asari orqali dunyo maʼnaviyati hamda tarixiga qoʻshgan ulkan hissasi haqidagi oʻz bilimlarini namoyish etdilar.

Boburning yoshligi, ilm-maʼrifat, davlat ishlarini boshqarishdagi betakror qobiliyati, milliy mumtoz adabiyotimizga  qoʻshgan katta hissasini sahna koʻrinishlari orqali namoyish etishdi. Ayniqsa, “Boburnoma” asaridan tayyorlangan sahna koʻrinishidagi tarixiy lavhalar, Boburning vatanparvarlik ruhidagi, ishq-muhabbatni tarannum etuvchi dilbar gʻazallari har bir qalbda shoh va shoir, buyuk davlat va jamoat arbobi, matonatli sarkarda Zahiriddin Muhammad Bobur ijodiga va uning boy adabiy merosiga hurmat hamda ixlos uygʻotdi.

“Biz Bobur izdoshlarimiz” deb nomlangan mazkur maʼnaviy-maʼrifiy tadbirni tashkil etishda oʻquvchi-yoshlar oʻz ustozlari Komila Xudoyberganova hamda Qunduz Ibodullayevalar rahbarligida Bobur hayoti va ijodi bilan bogʻliq tarixiy voqealarni puxta oʻrgandilar, asarlaridan parchalar yodladilar. Gʻazallar mazmun-mohiyati, shoir asarlarining tili, uslubi boʻyicha qoʻshimcha dars-mashgʻulotlarda ishtirok etdilar. Natija esa kutilganidan ziyoda boʻldi.
Tadbir barchada Bobur adabiy merosiga mehr-muhabbat tuygʻularini yanada mustahkamladi.

R.YOʻLDOShEVA.