Tumanda bepul huquqiy maslahat beriladigan “Madad” NNT huquqiy-maslahat byurosi ish boshladi

Aholining huquqiy ongi va huquqiy madaniyatini yuksaltirish, jamiyatda fuqarolarning huquqiy savodxonlik darajasini oshirish, aholiga bepul yuridik yordam koʻrsatish tizimini yanada takomillashtirish maqsadida Oʻzbekiston Respublikasi Adliya vazirligining taklifiga binoan Vazirlar Mahkamasining 2019-yil 6-sentyabrdagi “Aholiga  huquqiy axborotni yetkazish va yuridik yordam koʻrsatish tizimini yanada takomillashtirish chora-tadbirlari toʻgʻrisida”gi qaroriga asosan  tashkil etilgan “Madad” — muassasa shaklidagi nodavlat notijorat tashkiloti tashkil etilgan edi.

Tashkilotning asosiy vazifasi fuqarolarga huquqiy masalalar boʻyicha onlayn maslahatlar va tushuntirishlar berish yoʻli bilan birlamchi bepul huquqiy yordam koʻrsatishdan iborat.

Undan tashqari, tashkilot tomonidan fuqarolarning huquqiy bilimlarini ijtimoiy-siyosiy oʻzgarishlar bilan uygʻun ravishda oshirib borish ishlariga koʻngillilarni safarbar etish, fuqarolar tomonidan huquqiy maslahat berishga oid soʻrovlarni tahlil qilib borish, tahlil natijasiga koʻra huquqni qoʻllash amaliyoti va amaldagi qonunchilikni takomillashtirish yuzasidan takliflar ishlab chiqish kabi vazifalar ham amalga oshiriladi. Shu qatorda tashkilot masʼullari aholining huquqiy ongi va huquqiy madaniyatini yuksaltirishda innovatsion usullarni, xorijiy davlatlarning bu boradagi ijobiy tajribalarini tatbiq etish bilan ham shugʻullanadi.

Bepul huquqiy maslahat berish bilan birga “Advice.uz”, yaʼni e-maslahat.uz huquqiy axborot portalining muntazam ravishda yuritilishi va yangilab borilishini ham taʼminlaydi.

Ushbu  huquqiy axborot portali 2019-yil  aprel oyidan boshlab, ishga tushirilgan boʻlib, unda jamoatchilik turmushining hamma jihatlarini oʻz ichiga olgan asosiy huquqiy turdagi masalalar boʻyicha mingdan ortiq kontentlar joylashtirilgan. Mazkur portal orqali Oʻzbekiston Respublikasi fuqarolari, chet el fuqarolari va fuqaroligi boʻlmagan shaxslar onlayn rejimda bepul huquqiy maslahat olishlari uchun imkoniyatlar yaratilgan. Bu ham  oʻz navbatida aholining huquqiy ongini oshirishda yaratilgan qulayliklarning bir koʻrinishi boʻlib hisoblanadi.  

“Madad” – muassasa shaklidagi nodavlat notijorat tashkilotining “Advice.uz” huquqiy axborot portaliga onlayn tarzda kelib tushadigan murojaatlarning klassifikatsiyasiga nazar tashlasak, ular asosan mehnat munosabatlari, oilaviy munosabatlar, uy-joy va kommunal masalalar, fuqarolik, sogʻliqni saqlash, ijtimoiy himoya, talim, sud-huquq masalalari, tadbirkorlik, soliqlar, davlat xizmatlari, transport, isteʼmolchi huquqi va boshqa sohalar bilan aloqador savollardan iborat.

Qarorga asosan, “Madad” – muassasa shaklidagi nodavlat notijorat tashkilotining Qoraqalpogʻiston Respublikasi, viloyatlar va Toshkent shahar hududiy boʻlinmalarini, shuningdek, tumanlarda ularning huquqiy maslahat byurolarini bosqichma-bosqich tashkil etish rejalashtirilgan boʻlib, Amudaryo tumanida joriy yilning yanvar oyidan ishga tushirildi.

Hozirgi kunda “Madad” NNT huquqiy-maslahat byurosi tomonidan tuman aholisiga bepul huquqiy yordam koʻrsatish ishlari yoʻlga qoʻyilgan boʻlib, kerakli maslahatlar berilmoqda.

Tumanda oʻz faoliyatini boshlagan “Madad” NNT huquqiy maslahat byurosi fuqarolarni qiziqtirgan barcha sohalar, yaʼni mehnat munosabatlari, oilaviy munosabatlar, uy-joy va kommunal masalalari, fuqarolik, sogʻliqni saqlash, ijtimoiy himoya, talim, sud-huquq masalalari, tadbirkorlik, soliqlar, davlat xizmatlari, transport, isteʼmolchi huquqlari kabilar boʻyicha yuzaga kelgan muammoli vaziyat boʻyicha bepul huquqiy maslahat berishga doim tayyor.

Aygul Masheripova, “Madad” NNT tuman huquqiy maslahat byurosi bosh mutaxassisi.