Bobur nomli ovulda “Yosh kelin-kuyovlar innovatsion maktabi”ning koʻchma oʻquv mashgʻuloti oʻtkazildi

Oʻzi ildiz qoʻygan zamindan uzilib, tamoman boshqa muhit va iqlim sharoitiga moslashish uchun niholga alohida eʼtibor va parvarish talab etiladi. Yangi bunyod boʻlgan oila ham misoli yangidan oʻtqazilgan niholga oʻxshaydi. Taʼbir joiz boʻlsa, yosh oilaga nihol kabi katta eʼtibor va ragʻbat zarur. Ikki yoshning til topishib, ahil-inoqlikda oʻz oila qoʻrgʻonlarini mustahkamlashlari uchun eng avvalo ularga atrofidagilarning mehr-muhabbati, oila tutumlari, anʼana va qadriyatlari yuzasidan maslahat va oʻgitlari juda zarur.

“Oila” ilmiy-amaliy tadqiqot markazining tuman boʻlimi qoshida tashkil etilgan “Yosh kelin-kuyovlar innovatsion maktabi”da yangi oila qurayotgan yoshlarni oila hayotiga tayyorlash maqsadida ularni qiynab kelayotgan muammolar yuzasidan mutaxassislarni jalb qilgan holda rejaviy mashgʻulotlar olib boriladi. Bundan toʻrt oy muqaddam, 2019-yilning oktyabr oyida oʻz faoliyatini boshlagan “Yosh kelin-kuyovlar innovatsion maktabi” tinglovchilari kun sayin oshib bormoqda. Oʻtgan vaqt davomida 4 ta guruhda salkam 100 nafarga yaqin yoshlar oila qadriyatlari, odob-axloq meʼyorlari yuzasidan saboq oldilar.

Yaqinda yana tumanimizning Bobur nomli ovulidagi 86-sonli umumtaʼlim maktabi binosida “Yosh kelin-kuyovlar innovatsion maktabi”ni koʻchma oʻquv-mashgʻulotlari oʻtkazildi. Unda ovulning 20 nafar  yoshlari ishtirok etishdi.

Koʻchma oʻquv-mashgʻulotida Hoji Eshon bobo jomʼe masjidi imom-xatibi Rajabboy maxsum Habibullayev “Islom dinida oila aʼzolarining oʻrni va mavqei, nikoh, taloq, koʻp xotinlilik masalasi hamda  oilaviy nizolarning oldini olish, farzand tarbiyasida ota-onaning burchi” mavzusida maʼruza qildi. Ochiq dars shaklida oʻtkazilgan oʻquv-mashgʻuloti davomida tinglovchilar oʻzlarini qiziqtirgan savollar bilan murojaat qildilar. Oʻz navbatida Rajabboy maxsum Habibullayev ulugʻ ajdodlarimiz tomonidan muqaddas tutilgan oila qadriyatlari, erning oila va rafiqa oldidagi, rafiqaning eri va qaynota-qaynonaga munosabat masalasidagi burch va maʼsuliyatlari, majburiyatlari haqida keng tushunchalar berdi. Ayniqsa, ota-onalarimiz amal qilgan oila anʼanalari, milliy mentalitetimizga mos urf-odatlar, maʼnaviy qadriyatlar, shuningdek, zamonaviy oilada shakllantirilishi lozim boʻlgan axloqiy qadriyatlarga keng toʻxtaldi.

Oʻquv-mashgʻulotida “Oila” ilmiy-amaliy tadqiqot markazi tuman boʻlimi rahbari Gulshod Yusupova “Oiladagi ijtimoiy-maʼnaviy muhitni sogʻlomlashtirish orqali oilaviy muammolarni bartaraf etishda mahallaning oʻrni hamda yosh oilalar bilan ishlashishda “Oila” markazi zimmasidagi vazifalar” yuzasidan qoʻshimcha dars oʻtdi. Gulshod Yusupova oʻz darsi davomida har bir tinglovchining faolligini taʼminlashga alohida eʼtibor qaratdi. Xususan, yosh kelin-kuyovlarning diniy, axloqiy hamda oila qadriyatlari yuzasidan bilim va koʻnikmalari oʻquv-mashgʻulotidan olgan taassurotlari bilan qiziqdi.

Qizgʻin savol-javoblar, munozarali fikrlar asosidagi darslar tez-tez oʻtkazilib turilishi lozimligini taʼkidladilar. Tinglovchilar hayotda hamisha asqotadigan oila  masalalari boʻyicha haqiqiy islomiy bilimlar, maʼnaviy-axloqiy mavzudagi mashgʻulotlar yosh oilalar uchun haqiqiy turmush saboqlari boʻlib xizmat qilishini bildirdilar.

R.YOʻLDOShEVA.