MAKTABGAChA TAʼLIM TAShKILOTI TARBIYaChILARINING “BALLI, QIZLAR!” KOʻRIK-TANLOVI OʻTKAZILDI

Bahor – biri-biridan goʻzal bayramlar fasli. Uning ilk kuni – 1-martdanoq baxt va mangu bahor kuychisi shoira Zulfiyaxonim tavalludiga bagʻishlangan sheʼriyat kechalari, mushoiralar boshlanadi. Har bir adabiyot shinavandasi qalbida Zulfiya nomi takror-u takror jaranglaydi. Shoiraning hayoti va ijodiy faoliyati bilan bogʻliq aziz xotiralar tilga olinadi.

Jahonga taniqli soʻz sanʼati dargʻalarining oʻzbekning nazokatli, qalbi sadoqat nurlaridan munavvar, hijronga boʻy bermagan vafo malikasi Zulfiyaxonim haqida toʻlib-toshib, toʻlqinlanib aytgan soʻzlari, fikrlari quvvai hofizamizda jonlanadi. Zulfiyaning dilbar sheʼrlari jarang sochadi har bir goʻshada. Oʻzbekning hazrati Ayoli – Zulfiyaxonimni xotiralash, bu zoti mukarramaga hurmat va ehtirom koʻrsatish xalqimiz uchun doimiy anʼanaga aylangan.

Ayni kunlarda tumanimizda ham Zulfiyaxonim tavalludining 105 yilligiga bagʻishlangan sheʼriyat kechalari boʻlib oʻtmoqda. Yaqinda tuman Madaniyat markazi binosida Zulfiyaxonim tavalludining 105 yilligi hamda 8-mart – Xalqaro xotin-qizlar kuniga bagʻishlangan “Balli, qizlar!” koʻrik-tanlovi boʻlib oʻtdi. Tuman Maktabgacha taʼlim boʻlimi tomonidan tashkillashtirilgan koʻrik-tanlovda 73-,24-,42-,38-,2-,13-sonli maktabgacha taʼlim tashkiloti tarbiyachilari oʻzaro bellashdilar.

Asosiy 5 ta shart boʻyicha oʻtkazilgan koʻrik-tanlovda ishtirokchilarning avvalo til va adabiyot boʻyicha nechogʻlik bilimga ega ekanliklariga  eʼtibor qaratildi. Yaʼni, oʻzlarini sheʼriy tanishtirish asnosida ishtirokchilarning  oʻz ona tiliga eʼtibori, nutqiy madaniyati, kasb etikasiga amal qilishlariga ahamiyat  berildi.
Bevosita sheʼriyatga taalluqli boʻlgan ikkinchi shart esa Zulfiya sheʼrlari asosida bahri-bayt aytish bilan davom etdi. Ushbu shartda ishtirokchilarning Zulfiya ijodiga boʻlgan eʼtibori, sheʼr tanlash sanʼati, har bir satrni ifodali oʻqishi inobatga olindi.

Koʻrik-tanlovning uchinchi sharti yanada qiziqarli va hayajonli boʻldi. Bu shartda ishtirokchilar oʻzlariga ajratilgan 15 daqiqalik vaqt ichida qoʻl mehnatining moʻʼjizasi sifatida rang-barang gulqogʻozlardan erkin syujet, biron bir manzara yoki holat yaratishi talab etildi.

Toʻrtinchi shart ijrosi uchun 10 daqiqalik vaqt berildi. ushbu vaqt ichida ishtirokchilar erkin mavzuda oʻz sanʼatlarini namoyish etishdi. Ishtirokchi qizlar Shohida Hayitboyeva, Shohista Kazakova, Feruza Oʻrozmetova, Yulduz Usmonova, Zevar Iskandarova hamda Iroda Bobojonovalar biri-biridan qolishmasdan oʻz mahoratlarini koʻrsatdilar. Sheʼr-u qoʻshiq, raqslar ijrosidan koʻrik-tanlovni kuzatib borayotgan tomoshabinlar ham mamnun boʻlishdi.

Oʻzlarining pazandalik sanʼatlarini 15 daqiqalik vaqt ichida mahorat bilan namoyish etgan qizlar bahoriy salatlar tayyorlashda hakamlar hayʼati aʼzolarini ham hayratlantira oldilar.

Oʻzbekning otashnafas shoirasi Zulfiyaxonim dahosiga cheksiz hurmat-eʼtirom, yaqinlashib kelayotgan 8-mart – Xalqaro xotin-qizlar kuniga bagʻishlab oʻtkazilgan “Balli, qizlar!” koʻrik-tanlovi barchaga biri-biridan zavqli lahzalarni hadya etdi. Vafo va sadoqatni, bahorni madh etuvchi sheʼrlar ohangi qalblarga sohir tuygʻularni joylab, bellashuvda oʻz mahoratlarini namoyish etgan qizlar ijrosidagi dilbar ashula va raqslar, topqirlik bahsiga chorlovchi bahri-baytlar har dilda havas uygʻotib, koʻngillarga xushnudlik bagʻishladi.

Koʻrik-tanlov gʻoliblari tashkilotchilar tomonidan munosib taqdirlandi.

Robiya YOʻLDOShEVA.