HAM RAHBAR, HAM TADBIRKOR

Nilufar ziyoli oilada tugʻilib, voyaga yetdi. Alloh rahmat qilsin, otasi Ilhom Davletov hayotligida davlat va jamoat ishlarida koʻzga koʻringan obroʻli insonlardan edi.
Ana shunday obroʻli xonadonda voyaga yetgan Nilufarxon Davletova umumtaʼlim maktabida faqat aʼlo baholarga oʻqidi. Maktabni tugatgach, 1987-1992-yillarda Respublika rus tili va adabiyoti institutida tahsil oldi. U oʻzining ilk pedagogik faoliyatini 1992-2005-yillarda 31-sonli maktabda rus tili va adabiyoti fani oʻqituvchisi vazifasida ishlashdan boshladi. Keyinchalik 64-sonli umumtaʼlim maktabida va yana 31-sonli maktabda oʻquvchilarga rus tili va adabiyoti fanidan saboq berdi. Nilufarning dars oʻtish uslubidagi oʻziga xoslik, feʼlidagi intiluvchanlik va qatʼiyat, innovatsion gʻoyalarni  oʻz fanida qoʻllash iqtidori tufayli uni oʻquv ishlari boʻyicha direktor oʻrinbosari lavozimiga tayinlashdi. Uning tirishqoqlik va qatʼiyat bilan ish yuritishiga alohida eʼtibor qaratgan tuman xalq taʼlimi boʻlimi rahbariyati uni 2010-yilda oʻzi mehnat qilayotgan 31-sonli maktab direktori lavozimiga tayinlashdi.
Tuman Kengashi deputati sifatida taʼlim tizimiga joriy etilayotgan islohotlarning faol ishtirokchisidan bu islohotlarning ijrochisiga aylangan N.Davletova mana 10-yildirki, maktab direktori vazifasini mahorat bilan ado etmoqda. U rahbar boʻlgan pedagogik jamoada hamisha oʻziga xos intizomga asoslangan mehnat jarayoni hokim. Bilimlar bellashuvi, fanlar olimpiadalarida va boshqa koʻrik-tanlovlarda maktab oʻquvchilari doimo yuqori oʻrinlarni zabt etishadi.
2015-yilda N.Davletova umr yoʻldoshi, tuman Tibbiyot birlashmasi shifokori Ozod Matqurbonov bilan bamaslahat tadbirkorlik sohasiga qoʻl urdi. Qandolat va sut mahsulotlarini tayyorlash va qayta ishlashga ixtisoslashtirilgan “Jayxun lazzati” oilaviy korxonasini tashkil etish boʻyicha oʻz biznes-loyihasini tayyorladi va shu yili “Tadbirkor ayolning eng yaxshi loyihasi” koʻrik-tanlovining Qoraqalpogʻiston Respublikasi bosqichida “Qishloq joylarining eng yaxshi loyihasi” yoʻnalishi boʻyicha gʻolib boʻldi.
Korxona 2016-yilda konditer mahsulotlarini ishlab chiqarishni boshladi. 2017-yilga kelib korxona oʻz qaddini ancha tiklab oldi va sut mahsulotlarini qayta ishlash tsexi ishga tushirilib, 10 nafar kishi doimiy ish bilan taʼminlandi.
–  Kuniga 1 tonna sutni qayta ishlab, ekologik toza va sifatli mahsulotlar tayyorlab, ichki bozorga sotuvga chiqarmoqdamiz, – deydi Nilufar.
Korxona mahsulotlari xaridorgir. Ayni kunda 10 ta maktabgacha taʼlim tashkilotlariga smetana, tvorog va boshqa sut mahsulotlari yetkazib berayotgan “Jayxun lazzati” oilaviy korxonasi bir maromda faoliyat yuritishi uchun Nilufarga farzandlari eng yaqin koʻmakdosh. Katta oʻgʻli Temur Allamberganov korxonaning ijrochi direktori. Boburjon esa malakali texnolog sifatida barcha ishga bosh-qosh. Katta qizi Nazokatxon 55-sonli maktabda oʻqituvchi, Malohatxon esa Toshkent axborot texnologiyalari Universiteti talabasi.
– Farzandlarimdan koʻnglim toʻq, – deydi Nilufar mehr bilan. – Barchasi oʻqimishli, hunarli. Umr yoʻldoshim esa hamisha bizga yaqin maslakdosh. Shuning uchun ishlarimga bemalol ulgurayapman.
Ham maktab rahbari, ham tadbirkor, N.Davletovaning faoliyat koʻlami ancha keng. U xalq deputatlari tuman Kengashi deputati sifatida saylovchilari bilan uchrashishga, ularning hayotiga doir muammolarini oʻrganib, deputatlik soʻrovi bilan tuman Kengashiga murojaat etishga, taʼlim tizimiga innovatsion loyihalarni joriy etishga, tadbirkorlik faoliyatini zamon talablari darajasiga koʻtarishga vaqt topadi. Izlanishdan, intilishdan aslo charchamaydi. Zotan, oldinga intilib yashash Nilufar uchun hayotdagi oltin qoidadir.

Robiya YOʻLDOShEVA.