Bir fikr yodga tushdi...

Bahor fasli har kimga ham xush kayfiyat, xushchaqchaqlik baxsh etavermaydi. Kimdir xayolparast, kimdir indamas boʻlib qoladi. Menga ham bu fasl shunday taʼsir koʻrsatdi. Oʻtmish xotiralari koʻz oldimga kelaverdi, kelaverdi. Birdan, lop etib rahmatlik shoir Mansur Ahmedov aytgan bir fikr yodimga tushdi: "Ahmad Nafas otashnafas shoir”, deb aytgan edilar. Demak, mavzu Ahmad Nafas haqida ketar ekan, men bu shoir haqida boshqa hech nima ayta olmayman. Birgina ayta oladiganim, Mansur Ahmedov tan olib "otashnafas” dedimi, demak, otashnafas, boshqa gap-soʻz ortiqcha.

Ahmad aka 1954-yil 27-mart kuni "Qizilcholi” qishlogʻida, ziyoli oilasida dunyoga keldi. Demak, u 60 yoshli shoir. Bobolar safiga kirib qolgan otaxon shoirimizni pir-u badavlatlik bilan tabriklaymiz. Uzoq umr, sihat-salomatlik tilab qolamiz. Ishq-muhabbat haqida koʻp sheʼr yozgan shoirimiz, hozir hayvonlar haqida masal yoza boshladilar. Yubiley tabrigi sifatida yozgan sheʼrimni bahonada siz bilan birga baham koʻrsam-da, Ahmad akam bir quvonsa. (Quvonarmikan?!)

Masalchiga hazil

Ahmad Nafas akam masalchi boʻlib,

Hayvonlar haqida yoza boshladi.

Hurgan har bir itdan gʻazabi qoʻzib,

Qalam - kaltak bilan ura boshladi.

Tunlari "huv”lashdan qoʻrqib qolishdi.

Tovuqning dushmani yovuz shoqollar.

Tulkilar oʻzini chetga olishdi,

Echkidan qutildi yam-yashil tollar.

Mushuklar sichqonga tegmay qoʻydilar,

Sichqon ham hayiqdi donga tegishdan.

Pisand qilmaganlar haqin oldilar,

Oʻzlarin panalab kaltak yeyishdan.

Shoir akam shunday boraversalar,

Hayvonlar jam boʻlib talashmasin-da.

Senmi yozadigan bizlarni, - deya,

Qalamin oʻtinga qalashmasin-da!

Farhod Avaz, "Namuna” mahallasi.

Suratda: Ahmad Nafasov.