Jinoyatchilik profilaktikasini yanada kuchaytirishga bagʻishlangan yigʻilish oʻtkazildi

Bugungi kunda mamlakatimizda jinoyatchilik va huquqbuzarliklarning oldini olish yuzasidan keng koʻlamli ishlar olib borilmoqda. Huquq-tartibot organlari tomonidan jinoyatchilik va huquqbuzarliklarning kamayishiga, ularni keltirib chiqaruvchi omillarni bartaraf qilishga qaratilgan qator chora-tadbirlarni amalga oshirilmoqda.

 10-mart kuni tuman hokimligining majlislar zalida joriy yilning shu davrigacha boʻlgan vaqt oraligʻida sodir etilgan jinoyatlar, ularni keltirib chiqargan omillarni tahlil qilish yuzasidan yigʻilish boʻlib oʻtdi.

Mazkur yigʻilishda  Qoraqalpogʻiston Respublikasi Ichki ishlar vaziri Aytboy Temirxanov, vazir oʻrinbosari Oʻmirboy Turdibayev, tuman bosh prokurori Javlon Muftullayev, tuman hokimi oʻrinbosari, mahalla va oilani qoʻllab-quvvatlash boʻlimi boshligʻi Alisher Yoʻldoshev, tuman Ichki ishlar boshligʻining birinchi oʻrinbosari podpolkovnik Otabek Masharipov, tuman Davlat soliq inspektsiyasi boshligʻi oʻrinbosari Odilbek Ashirbayev, tuman IIB boshligʻi oʻrinbosari Aziz Qurboniyozovlar qatnashdilar. Qolaversa korxona va tashkilotlar rahbarlari, tuman Ichki ishlar boʻlimining huquqbuzarliklar profilaktikasi boʻlinmasi profilaktika inspektorlari, fuqarolar yigʻinlari raislari, masʼul kotiblari, mutaxassislari hamda profilaktika inspektorlari yordamchilari ham ishtirok etdilar.

Yigʻilishni tuman hokimi Sultonboy Yoʻldashev kirish soʻzi bilan ochdi hamda olib bordi.

Kun tartibidagi masala yuzasidan dastlab Qoraqalpogʻiston Respublikasi Ichki ishlar vaziri Aytboy Temirxanovning axboroti tinglandi.

Axborotda taʼkidlanganidek, davlatimizda xar bir mahallani jinoyatchilikdan xoli hududga aylantirish, jinoyatning oldini olish boʻyicha davlat organlari hamda jamoat tashkilotlari bilan birgalikda profilaktik ishlarni amalga oshirishning yangi tizimi yaratilganligi natijasida soʻnggi 3-yilda mamlakatimizda jinoyatchilikni keksin kamaytirishga erishildi. Xususan, Qoraqalpogʻiston Respublikasi hududida 2019-yilda sodir etilgan jinoyatlar 98 taga, yaʼni 4,98 foizga, shuningdek, tumanimizda esa bu koʻrsatkich 19,4 foizga, yaʼni 124 tadan 100 taga kamayishiga erishildi.

Yigʻilish davomida, shuningdek, 2020-yilning 2 oy 10 kuni davomida tuman hududida jami jinoyatlar soni, ayniqsa, xotin-qizlarning jinoyat sodir etish holatlari oʻtgan yilning shu davriga nisbatan koʻpayganligi tanqid hamda tahlil qilindi. Bu borada yoʻl qoʻyilgan xato va kamchiliklar aniqlanib, tegishli xulosalar chiqarildi.  

Shundan soʻng, Qoraqalpogʻiston Respublikasi Ichki ishlar vazir oʻrinbosari Oʻmirbek Turdiboyev masala yuzasidan fikr va mulohazalarini bildirdi. U oʻz soʻzida jinoyatlarning oldini olish, ularning soni oshib ketishiga yoʻl qoʻymaslik uchun profilaktika inspektorlari mahalla raisi bilan birgalikda har kuni Ichki ishlar boʻlimi va Tibbiyot birlashmasida hisobda turgan shaxslar bilan profilaktik suhbatlar olib borish, ularning yaqinlari bilan alohida muloqotlar oʻtkazish ishlari jonlantirilsa, jinoyat sodir etilishi kamayishiga erishilishini taʼkidladi.

Tuman hokimi oʻrinbosari, Mahalla va oilani qoʻllab-quvvatlash boʻlimi boshligʻi Alisher Yoʻldoshev, Namuna mahalla fuqarolar yigʻini raisi Koʻklan Yusupov, Qilichboy ovul fuqarolar yigʻini raisi Bahrom Qodirovlar ushbu masalalar yuzasidan oʻz munosabatlarini va takliflarini bildirishdi.

Shuningdek, tuman hokimi Sultonboy Yoʻldashev tumanda jinoyatchilik va huquqbuzarliklarni oldini olish, profilaktika qilish, aholining huquqiy ongini oshirish borasida targʻibotni yanada kuchaytirish yuzasidan zarur tavsiyalar berdi hamda fuqarolar yigʻinlarida yoshlar bilan ishlash holatini yaxshilash, ularning bandligini taʼminlashni yoʻlga qoʻyish, kelgusida jinoyatchilik va huquqbuzarliklarning oldini olish va profilaktika qilish borasidagi ishlar samaradorligini yanada oshirish lozimligini taʼkidladi.

Kun tartibidagi masala yuzasidan berilgan axborot va bildirilgan takliflar atroflicha muhokama qilinib, tegishli qarorlar qabul qilindi.  

Charos Arslonova,

tuman hokimligining Axborot xizmati rahbari.