SEKTORLAR RAHBARLARI VA YoShLAR UChRAShUVI OʻTKAZILDI

Tumanimizda “Yoshlar oyligi” doirasidagi tadbirlar davom etmoqda va ularda yoshlar katta qiziqish bilan ishtirok etishmoqda.
Shu yilning 25-iyunida ushbu oylik doirasida yoshlar bandligini taʼminlash, muammolarini oʻrganish, fikr va takliflarini tinglash, ularni qoʻllab-quvvatlash hamda munosib sharoit yaratish maqsadida “Sektor rahbarlari va yoshlar” nomli uchrashuv oʻtkazildi. Uchrashuvda 4 ta sektorlar rahbarlari, hokim oʻrinbosarlari, korxona, tashkilotlar rahbarlari, tumanimizdagi kasb-hunar kollejlari bitiruvchilari, faol yoshlar ishtirok etdilar.

Yigʻilishni tuman hokimi Sultonboy Yoʻldashev ochdi hamda yigʻilish maqsadi bilan tanishtirib oʻtdi. Kun tartibidagi masala boʻyicha soʻzlagan nutqida mamlakatimizda yoshlarning yuksak marralarni egallashlari uchun yaratilayotgan shart-sharoitlar, cheksiz imkoniyatlar haqida toʻxtalib, yoshlarni oʻqib, bilim olishga, shijoat bilan olgʻa intilishga hamda Vatan xizmatiga yaraydigan munosib farzand boʻlishga daʼvat qildi. “Erishgan yutuqlarimiz oʻzimizniki, biz xato va kamchiliklarni oʻrganib, ularni bartaraf qilishga harakat qilmogʻimiz kerak!” degan fikrni barcha yoshlar hayotiy shior qilib olishi kerak, deya taʼkidladi. Shuningdek, bilimga chanqoq, izlanuvchan tumanimiz yoshlari haqida oʻzining samimiy fikr-mulohazalarini bildirdi.

Shundan soʻng, soʻz tuman prokurori, adliya maslaxatchisi Javlon Muftullayevga berildi. Maʼruzachi oʻz soʻzida hozirgi kunda tumanimizda yoshlar, xususan, kollej bitiruvchilarining bandligini taʼminlash maqsadida ishlab chiqarish korxonalari, maishiy xizmat koʻrsatish shoxobchalari sonini koʻpaytirib, yangi ish oʻrinlarini yaratishga harakat qilinayotganligini  aytib oʻtdi. Yoshlarni  buyuk ajdodlar farzandi ekanligini unutmaslikka chaqirdi. Har birining ilm-fan choʻqqilarini puxta egallab, ularga munosib avlod boʻlishi lozimligini alohida taʼkidladi. Shuningdek, muhtaram Prezidentimizning Oliy Majlisga qilgan Murojaatnomasida ilm-maʼrifatning inson hayotidagi ahamiyati haqidagi fikrlariga toʻxtalib, bularning barchasi isbot talab qilmaydigan haqiqat ekanligini eʼtirof etdi.

Maʼruzalardan soʻng, yoshlarning muammolari va takliflari atroflicha tinglandi. Amudaryo melioratsiya va suv xoʻjaligi kasb-xunar kolleji bitiruvchisi Hilola Jabborberganova tumanimizda temir yoʻl chiptalarini sotishni yoʻlga qoʻyishi uchun amaliy yordam berishini, Amudaryo qishloq xoʻjaligi kasb-hunar kolleji bitiruvchisi Temur Yoʻldoshev hunarmandchilik faoliyatini yoʻlga qoʻyishda zarur boʻladigan asbob-uskunalar sotib olish uchun imtiyozli kredit olishda amaliy yordam soʻrab murojaat qildi.

Amudaryo transport va xizmat koʻrsatish kasb-hunar kolleji bitiruvchilari  Dostonbek Iskandarov ipak qurtini parvarishlash, Muhammadjon Bobojonov akfa romlari ishlab chiqarish tsexi qurish uchun yer maydonini ajratib berish, Amudaryo qishloq xoʻjaligi kasb-hunar kolleji bitiruvchisi Shahnoza Tangirberganova tikuv mashinasi xarid qilishga kredit olishda amaliy yordam soʻradi.

Shuningdek, tumandagi kasb-hunar kolleji bitiruvchilaridan ayrimlari egallagan  mutaxassisligi boʻyicha ishga joylashishda amaliy koʻmak, oʻn nafardan ortigʻi esa parrandachilik, chorvachilik, baliqchilik va xizmat koʻrsatish sohalarida oʻzlarining tadbirkorlik faoliyatini tashkil etmoqchi ekanliklarini bildirib, yordam va yoʻl-yoʻriq soʻradilar.

Yoshlar bandligini taʼminlash, muammo va takliflarini oʻrganish, ularni qoʻllab-quvvatlash hamda munosib shart-sharoitlar yaratib berish maqsadida oʻtkazilgan “Sektor rahbarlari va yoshlar” uchrashuvi soʻnggida yoshlar tomonidan bildirilgan barcha taklif va muammolarning tegishli yechimini topishga erishish, belgilangan muddatda bajarilishi boʻyicha zarur choralarni koʻrish yuzasidan tegishli tadbirlar amalga oshirilishi maʼlum qilindi.

Oygul Rajabova.