IQTISODIY ISLOHOTLAR SAMARASI
Bugun Oʻzbekistonda izchil amalga oshirilayotgan shiddatli islohotlar natijasida mamlakatni jahon tanimoqda va tan olmoqda. Bu borada Prezident Shavkat Mirziyoyevning shaxsiy tashabbusi va hayotbaxsh gʻoyalari asosida ishlab chiqilgan “2017-2021-yillarda Oʻzbekiston Respublikasini rivojlantirishning beshta ustuvor yoʻnalishi boʻyicha Harakatlar strategiyasi” davlat va jamiyatni rivojlantirishning mutlaqo yangi bosqichini boshlab berganini alohida eʼtirof etish lozim.
2017–2021-yillarda Oʻzbekiston Respublikasini rivojlantirishning beshta ustuvor yoʻnalishi boʻyicha Harakatlar strategiyasida uchinchi yoʻnalish sifatida iqtisodiyotni rivojlantirish va liberallashtirishning ustuvor vazifalari belgilab berildi.
Ushbu vazifalarni bajarish yuzasidan keng miqyosli ishlar amalga oshirildi. Bunda oddiy bir haqiqatdan kelib chiqildi: xalq boy boʻlsa, davlat ham boy va qudratli boʻladi.
Oʻzbekiston 2017-yilning 5-sentyabridan milliy valyutani erkin konvertatsiya qilish tizimiga toʻliq oʻtdi. Bu borada aholi uchun yuzaga kelishi mumkin boʻlgan salbiy oqibatlarni yumshatish boʻyicha barcha zarur choralar koʻrildi.
Xalqaro moliyaviy institutlar bilan hamkorlik muvaffaqiyatli rivojlanmoqda. Oʻzbekiston Birlashgan Millatlar Tashkiloti, Islom hamkorlik tashkiloti, Shanxay hamkorlik tashkiloti, Mustaqil Davlatlar Hamdoʻstligi kabi xalqaro tuzilmalar bilan aloqalarni yangi bosqichda davom ettirmoqda. Mamlakatimiz Yevropa tiklanish va taraqqiyot banki (YeTTB) bilan sheriklik aloqalarini yangitdan tikladi. Yevropa investitsiya banki bilan sheriklik aloqalari oʻrnatildi. Jahon banki, Xalqaro valyuta jamgʻarmasi, Osiyo taraqqiyot banki, Islom taraqqiyot banki, Osiyo infratuzilma investitsiyalar banki bilan oʻzaro hamkorlik samarali tus olmoqda. Respublikamizda xorijiy kapital jalb qilish uchun sharoitlar yaratilmoqda.
Harakatlar strategiyasi doirasida Oʻzbekistonda amalga oshirilayotgan islohotlar xalqimizni rozi qilib yashash, odamlarning tobora ortib borayotgan ehtiyojlarini taʼminlash, milliy iqtisodiyot koʻlamini kengaytirish va surʼatlarini oshirish maqsadini koʻzlaydi. Ushbu strategiya iqtisodiy xavfsizlikning birlamchi asosi boʻlgan ishlab chiqarishning tarkibiy yangilanish yoʻllarini belgilab beradi.
Tijorat banklari endi xalqimizni tadbirkorlikka, ishbilarmonlikka oʻrgatish va shunga yetaklash, real iqtisodiyotni tarkib toptirishga asoslangan yondashuvni qaror toptirish borasida harakat qilmoqda. Banklar vakillari mijozlarni koʻpaytirish uchun xonadonlarga borib, odamlarga kredit olishlarini taklif qilib, uni samarali ishlatish yoʻllarini oʻrgatmoqda.
Konstitutsiyamizning 36 va 53-moddalarida muhrlab qoʻyilgan «Har bir shaxs mulkdor boʻlishga haqli» hamda «Xususiy mulk boshqa mulk shakllari kabi daxlsiz va davlat himoyasida»dir degan normalarni amalda roʻyobga chiqarish maqsadida Oʻzbekiston Respublikasi Prezidenti huzurida Tadbirkorlik subʼektlarining huquqlari va qonuniy manfaatlarini himoya qilish boʻyicha vakil instituti taʼsis etildi.
Taʼkidlash joizki, Oʻzbekiston Respublikasi Prezidentining
2019-yil 8-yanvardagi «Iqtisodiyotni yanada rivojlantirish va iqtisodiy siyosat samaradorligini oshirishning qoʻshimcha chora-tadbirlari toʻgʻrisida»gi, 2019-yil 10-yanvardagi «Iqtisodiy rivojlanish sohasida davlat siyosatini amalga oshirish tizimini tubdan takomillashtirish chora-tadbirlari toʻgʻrisida»gi farmonlari hamda 2019-yil 10-yanvardagi «Oʻzbekiston Respublikasi Iqtisodiyot va sanoat vazirligi faoliyatini tashkil etish toʻgʻrisida»gi qarori aynan Oʻzbekistonning iqtisodiy maydonini mustahkamlashga qaratilgan.
Mamlakatimizda turli iqtisodiy tahdidlarga qarshi chora-tadbirlar, islohotlarni amalga oshirish, modernizatsiya va diversifikatsiya jarayonlarini yanada jadallashtirish natijasida mamlakatimizda barqaror iqtisodiy oʻsish surʼatlarini saqlab qolishga erishib kelinmoqda. Prezidentimiz Shavkat Mirziyoyev «yashirin» iqtisodiyot mamlakat rivojiga salbiy taʼsir koʻrsatayotganini, soliq yukini kamaytirish, biznes yuritish uchun yanada qulay sharoitlar yaratish «yashirin» iqtisodiyotga barham berishning yagona yoʻli ekanligini taʼkidladi. Shuning uchun bu borada taʼsirchan choralarni nazarda tutadigan alohida dastur ishlab chiqish zarurligini koʻrsatib oʻtdi.
Ilgʻor xorijiy tajribalar va Konstitutsiyamiz talablari asosida Prezidentimiz tashabbusi bilan
2019-yilning boshidayoq Oliy Majlisning Qonunchilik palatasida Korruptsiyaga qarshi kurashish boʻyicha qoʻmita tashkil etildi. Mavjud vaziyatni hisobga olib, avvalambor, milliy iqtisodiyotni jadal rivojlantirish, mamlakatimizning investitsiyaviy jozibadorligini oshirish maqsadida soliq siyosatida muhim oʻzgarishlar joriy qilindi. Jumladan, jismoniy shaxslar uchun hozirgacha amal qilib kelgan eng yuqori 22,5 foizlik daromad soligʻi stavkasi oʻrniga 12 foizlik stavka belgilandi. Sohadagi oʻzgarishlar roʻyxatini yana uzoq davom ettirish mumkin.
Bulardan tashqari, bugungi va ertangi taraqqiyotimiz bevosita bogʻliq boʻlgan qishloq xoʻjaligi sohasida tarkibiy oʻzgarishlar amalga oshirilmoqda. Ayniqsa, qishloq xoʻjalik ekinlarini joylashtirishda anʼanaviy yondashuvlardan voz kechib, dehqonlar daromadini koʻpaytiradigan, eksportga yoʻnaltirilgan mahsulotlarni yetishtirishga investitsiyalar jalb qilinmoqda. Bugun odamlarimiz bogʻdorchilik, chorvachilik, yilqichilik, baliqchilik, parrandachilik, pillachilik, asalarichilik, hunarmandlik, kasanachilik, xizmat koʻrsatish va boshqa sohalarda tadbirkorlik bilan shugʻullanib, kichkina boʻlsa ham oʻz korxonasini tashkil etib, qonuniy asosda daromad topmoqda. Oʻzini ham, oilasini ham moliyaviy jihatdan mustahkamlab, mahallalarimiz, tumanlarimiz va shaharlarimiz, viloyatlarimiz, qolaversa mamlakatimiz rivojiga munosib hissa qoʻshmoqda.
Milliy iqtisodiyot rivojini koʻzlab, iqtisodiyotning barcha sohalarini raqamli texnologiyalar asosida yangilashni nazarda tutadigan Raqamli iqtisodiyot milliy kontseptsiyasi asosida maxsus dasturni hayotga tatbiq etish masalasi ilgari surilmoqda. Raqamli iqtisodiyot yalpi ichki mahsulotni kamida 30 foizga oʻstirish, korruptsiyani keskin kamaytirish imkonini beradi. Nufuzli xalqaro tashkilotlar oʻtkazgan tahlillar ham buni tasdiqlamoqda. Raqamli iqtisodiyotni rivojlantirish gʻoyasi zamirida mamlakatimizda moliyaviy barqarorlik, biznes yuritish, investitsiya muhiti uchun yanada qulay sharoitlar yaratish, korruptsiya va «yashirin» iqtisodiyotga barham berish masalasi yotadi.
Elmurod Tursunov, Qoraqalpogʻiston Respublikasi adliya vaziri oʻrinbosari
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
